फूलैफूलले ढाक्यो जावलाखेल

काठमाडौं । चिडियाखाना नजिकै रहेको जावलाखेलको खेल मैदान अहिले फूलैफूलले ढकमक्क भएको छ । पुष्पका पारखीहरुलाई कुन फूल लगौं भनेर भ्याइनभ्याइ छ यतिबेला । तिहार नजिकिंदै गर्दा यहाँ शुक्रबारदेखि पुष्प प्रदर्शनी गरिएको हो ।

करिब ४ सय बढी प्रजातिका फूलहरूले सजिएको खेलमैदानमा पुष्प व्यवसायीहरुले आफ्नो व्यवसायीक पन झल्काएका छन् । यो मेलामा ४८ वटा फूलहरूको स्टल राखिएको र ४ सय बढी प्रजातिका फूलहरू रहेको पुष्प व्यवसायी संघका अध्यक्ष मीनबहादुर तामाङ बताए ।

फूल मेलामा विभिन्न देशमा पाइने फूलहरु राखिएकाले फूल प्रेमीहरूको भीड देख्न सकिन्छ । फूल रोज्दै गरेका र सँघ साथीलाई फोन गर्दै आमन्त्रण गर्नेहरुको पनि कमि छैन यहाँ । फूलका सौखिनहरु यतिवेला जावलाखेल मैदानमै भेटिने गरेका छन् ।

स्टलमा विभिन्न रंगका र विभिन्न प्रजातिका गोदावरी फूल किन्न पाइने भएकाले ग्राहकले पनि खुशी व्यक्त गरिरहेका छन् भने प्रदर्शनी उत्साहजनक रहेको व्यवसायी बताउँछन् । हरेक वर्ष हुने प्रदर्शनीमा नयाँ नयाँ अनुभव साटासाट गर्न मिलेको व्यवसायी बताउँछन् ।

प्रदर्शनीले पुष्प व्यवसायीलाई मात्रै नभएर फूलप्रेमी का लागि सुनौलो अवसर भएको उनीहरुको भनाइ छ । दुई सय देखि १२ सय सम्म मूल्य रहेका फूलहरु पाइने यस मेलाबाट पाँच लाख बराबरको कारोबार गर्ने लक्ष्य आयोजकले लिएको छ ।

तस्वीरमा हेर्नुहोस…