November 24, 2020, Tuesday

सवारी साधन र शक्तिको दुरुपयोगः कांग्रेस

निर्वाचनका बेला सरकार हिंसामा उत्रियोः प्रवक्ता

काठमाडौं । नेपाली कांग्रसले मंसिर १४ गतेको निर्वाचनमा सरकारले आचारसंहिताको उल्लंघन गर्दै हिंसामा उत्रिएको आरोप लगाएको छ । आचारसंहिता विपरीत केन्द्रीय सरकारका मन्त्रीदेखि प्रदेशका मुख्य मन्त्रीसम्म चुनाव प्रचारमा संलग्न भएर र कयौं स्थानमा सरकारी साधन–स्रोतको दुरूपयोग गरेको कांग्रेसको आरोप छ ।

प्रवक्ता विश्वप्रकाश शर्माले बैतडीको दोगडाकेदार गाउँपालिका वडा नं. ४ का नेपाली कांग्रेसका वडाअध्यक्ष उम्मेदवार सुरेन्द्रप्रसाद भट्टमाथि भौतिक आक्रमण नेकपाका कार्यकर्ताहरूद्वारा गराइनुलाई उदाहरणको रुपमा प्रस्तुत गरेका छन् ।

शनिबार विज्ञप्ती जारी गर्दै पार्टी प्रवक्ता विश्वप्रकाश शर्माले चितवन खैरहनी नगरपालिका वडा नं. ४ मा मंसिर ६ गतेको चुनावी सभामा ३९ युवा सहित ४६ जना नेकपाका कार्यकर्ता नेपाली कांग्रेसमा प्रवेश गरेका र प्रवेश गराउने भूमिका निर्वाह गरेका स्थानीय प्रखर युवा टेकबहादुर परियारलाई मंसिर ९ गते राति भौतिक आक्रमण गरिएको जनाएका छन् ।

उनले निर्वाचनलाई आफ्नो पक्षमा अनुकूल बनाउने प्रयासमा कयौं कर्मचारीलाई निर्वाचन क्षेत्रबाट अन्यत्र पठाउने र अन्यत्रबाट अनुकूलका कर्मचारी निर्वाचन क्षेत्रमा खटाउने कार्य भएको जनाएका छन् । मौनअवधी शुरू भएपछि पनि कास्कीको वैदामका डिएसपीलाई सरूवा गरिएको छ । अरूबेला काममा ढिलासुस्ती भएको वेला हाल कयौं ठाउँमा रातारात डोजर चलाउने, सडक पीच गर्ने अनि योजनामै नभएका काम पनि चाँडै सम्पन्न गर्नेछौं भनेर प्रलोभनमा पार्ने प्रयत्न गरिएको छ ।

महोत्तरीको पिपरामा बम विष्फोट पश्चात मौन अवधिमा पनि चुनाव प्रचारकै शैलीमा गतिविधिहरू भएको, आचारसंहिता उल्लंघनका सबै घटना र भय–त्रासमा बृद्धि भएको भन्दै कांग्रेसले त्यसलाई रोक्न र दोषीलाई कारबाहीको पहल गर्न निर्वाचन आयोगलाई आग्रह गरेको छ । त्रिचन्द्र क्याम्पसका प्रमुखमाथि भएको आक्रमण निन्दनीय रहेको कांग्रेसले जनाएको छ । उसले शुल्क वृद्धिकाविरुद्ध आवाज उठ्नु सहि छ तर सत्तारुढ नेकपा निकटका विद्यार्थीले क्याम्पस प्रमुखमाथि भौतिक आक्रमण गर्नु दुःखद मात्रै होइन दण्डनीय भएकोले कारबाहीको माग कांग्रेसले गरेको छ ।

त्रिचन्द्रमा सम्मानित गुरु माथि आक्रमण गर्ने संगठनकै सदस्यहरुले नेपाल कमर्श क्याम्पस, मिनभवमा नेविसंघका सदस्यहरु माथि आक्रमण गरेर डुजाङ शेर्पा, सरोज तिमल्सीना र निरज शाहलाई घाइते बनाएका छन् । कालापानी लगायतको प्रकरणमा सिंगो राष्ट्र एकढिक्का भई उभिनु पर्ने समयमा नेपाली कांग्रेसले एकातिर आफू निकटका विद्यार्थीलाई फेरिपनि संयमित रहन निर्देशित गरेको छ तर सत्तापक्षमा त्यो ढंगको संस्कार नदेखिनु दुःखद भएको भन्दै पार्टी प्रवक्ता विश्वप्रकाश शर्माले घटनाका दोषीहरुलाई कार्वाही गर्न सरकारसँग माग गरेका छन् ।

उनले कालापानी लगायतको भूभागको रक्षाका लागि सरकारको भूमिका शुन्य भएको आरोप लगाएका छन् । शर्माले भनेका छन्, ‘नेपालका अविभाज्य भूमिहरू कालापानी, लिपलेक र लिम्पीयाधुरा समेत गाँसेर नक्सा सार्वजनिक गरेको महिना दिन पुग्न लाग्दा समेत सरकारले उच्चस्तरीय कुटनैतिक र राजनैतिक पहल गम्भीर ढंगले नगर्नु अत्यन्तै दुःखद छ ।

प्रमुख प्रतिपक्षी दल नेपाली कांग्रेस लगायत सबै दल र समस्त नेपालीको सम्पूर्ण साथका वावजुद सरकारले परिणाममुखी पहल गर्न नसक्नु लज्जास्पद विषय हो । हिजोको उग्र राष्ट्रवादको नारा यो प्रकरणमा आइपुग्दा विषर्जित हुँदै गएको चित्रले जनसमक्ष वास्तविकता उजागर त गर्दैछ नै तर कालापानीबाट भारतीय सुरक्षा बल फिर्ता गराउने राष्ट्रिय एकताको ऐतिहासिक अवसर गुम्न सक्ने आशंका र खतरा पनि बढेको छ ।’

यसैगरी नेपाली कांग्रेसले शनिबार ३७ जिल्लाका ५२ स्थानको लागि भएको निर्वाचनमा सरकारी साधन–श्रोतको दुरुपयोग, सत्ताको संरक्षणमा भएका भौतिक आक्रमणका घटना, अनेक भय र प्रलोभनका घटना भएको कांग्रेसले निष्कर्ष निकालेको छ ।

कांग्रेसले सरकारको त्यस्तो क्रियाकलापको खेद व्यक्त गर्दै सरकारी पक्षको असहयोग र अनेक दबाबकावीच निर्वाचन सम्पन्न गराउने निर्वाचन आयोग, मतदानमा सरिक भएका राष्ट्र सेवक कर्मचारीहरु, सुरक्षा निकाय एवं निरन्तर समाचार सम्प्रेषण गर्ने पत्रकारहरुप्रति नेपाली कांग्रेसले धन्यवाद र आभार प्रकट गरेको छ । कांग्रेस मुख्यालले प्रेस विज्ञप्ती जारी गर्दै निर्वाचनलाई स्वतन्त्र, निष्पक्ष एवं भय र धांधली रहित वातावरणमा सम्पन्न गराउने प्रमुख दायीत्वबाट सरकार भागेको जनाएको छ ।

कांग्रेसले विगतमा आफ्नो संभावित पराजयको आंकलन गरिरहँदा पनि निष्पक्ष निर्वाचन सम्पन्न गराएको तर वर्तमान सरकारको भूमिका निश्चीत स्थानका उप निर्वाचनमा समेत त्यो ढंगको हुन नसक्नु दुःखद र लोकतान्त्रिक अभ्यासको भविष्यका लागि समेत प्रतिकुल भएको दाबी पार्टीले गरेको छ ।

सभापति देउवाले समेत निर्वाचनलाई निष्पक्ष र भयरहित वातावरणमा सम्पन्न गराउने भन्दा आफ्नो पार्टीलाई विजय गराउने ध्याउन्नमा सत्ताको दुरुपयोग गरीएको वताउँदै त्यसका बावजुद प्रतिकुल वातावरणमा मतदानमा सहभागी सवै मतदाताप्रति आभार प्रकट गरेका छन् ।

देउवाले मतगणना लगायतको बाँकि कार्य व्यवस्थित र पारदर्शी ढंगले सम्पन्न गराउन निर्वाचन आयोगलाई आव्हान समेत गरेका छन् । सभापति देउवाले मतपेटीका संकलन र मतगणनाको कार्यमा विशेष सर्तकता राख्न उपनिर्वाचन सम्पन्न भएका सबै ठाउँका साथीहरुलाई सजगता रहन अपिल गर्दै निर्वाचनमा अहोरात्र खटिनु भएका पार्टीका सवै तहका साथी एवं शुभचिन्तकहरुमा निरन्तर उत्साह र कृयाशिलताका लागि अपिल समेत गरेको पार्टी मुख्यसचिव कृष्णप्रसाद पौडेलद्धारा जारी विज्ञप्तीमा जनाइएको छ ।

सम्बन्धित समाचार

नेपाली अर्थतन्त्रमा विद्यमान चुनौती
नेपाली अर्थतन्त्रमा विद्यमान चुनौती
  • २०७६ मंसिर १६, ०७: २३: १५

दुर्गाप्रसाद गौतम, काठमाडाैं-विश्व मानचित्रमा दुई ठूला मुलुकहरू भारत र चीन विच अवस्थित सानो भूपरिवेष्ठित हाम्रो मुलुक नेपाल यसको विकासक्रम र...

उत्तर अफगानिस्तानमा हवाई आक्रमणमा परी ६ जना तालिबानीको मृत्यु
उत्तर अफगानिस्तानमा हवाई आक्रमणमा परी ६ जना तालिबानीको मृत्यु
  • २०७६ मंसिर १६, ०७: २३: १५

अफगानिस्तानको सेनाले उत्तरी बाल्ख प्रान्तको ग्रामीण इलाकामा गरेको कारबाहीमा कम्तीमा छ जना तालिबानी लडाकू मारिएको सेनाले जनाएको छ । अफगान...

बेलिजका प्रधानमन्त्री कोरोना भाइरसबाट सङ्क्रमित
बेलिजका प्रधानमन्त्री कोरोना भाइरसबाट सङ्क्रमित
  • २०७६ मंसिर १६, ०७: २३: १५

मेक्सिको सिटी–बेलिजका प्रधानमन्त्री जोन ब्रिसेनोलाई कोरोनाभाइरसको सङ्क्रमण पुष्टि भएको छ । प्रधानमन्त्रीको कार्यालयले सोमबार वक्तव्य जारी गर्दै उनी कोरोनाभाइरसबाट सङ्क्रमित...

भर्खरै

TOP