January 15, 2021, Friday

रामचन्द्रजी र हामी एकै ठाउँमा छौं, तर कतिपय कुरामा उहाँसँग चित्त बुझ्दैन

डा.शेखर कोइराला
नेता÷केन्द्रीय सदस्य, नेपाली काँग्रेस

नेपाली काँग्रेसका प्रभावशाली तथा लोकप्रिय नेता डा. शेखर कोइरालाको राजनीतिक पृष्ठभूमि, बाल्यकालदेखि कै हो ।

निर्वासनमा परिवारका सदस्यहरुकासाथ बाल्यकाल बिताएका डा. शेखर कोइराला राजनीति र चिकित्सा पेशालाई सँगसँगै अघि बढाउँदै आएपनि २०५८ सालदेखि राजनीतिमा मात्रै केन्द्रीत हुनुभएको छ ।

डा.कोइराला परिवारको राजनीतिक विरासतलाई आफ्नो योग्यता, क्षमता र निरन्तरताका कारण झन् उचाइमा पु¥याउने गरी आमकार्यकर्ताको विश्वास जित्न सफल कोइरालालाई काँग्रेसको निकट भविश्यको आशा लाग्दो र भरपर्दो नेताको रुपमा काँग्रेसी कार्यकर्ता र शुभेच्छुकले लिने गरेका छन् ।

उनै नेता डा. शेखर कोइरालासँग नयाँ बिकल्प साप्ताहिकका लागि हाम्रा विशेष संवाददाताले गरेको कुराकानीको सम्पादीत अंशः

नेपाली काँग्रेसभित्र लामो समयदेखि बढ्दै गएको विवादहरु टुङ्गिएर पार्टीमा एकता भएकै हो त ? तपाई के भन्नुहुन्छ ?
नेपाली काँग्रेस पार्टीभित्र एकता नै थियो नि त्यस्तो के थियो र ? एजेण्डाहरुमा विमति हुनुु स्वभाविक हो । अहिले पनि धेरै कुराहरु यस्ता छन्, जो कि विवादित नै छन् । विधिसम्मत छैैनन्, विधानसम्मत छैनन् । कार्यतालिका आएको छ र हामीले त्यसलाई कार्यान्वयन गर्न जरुरी छ ।

कार्यतालिका त आयो तर मुख्य महाधिवशेनमा फेरबदल नभएको नै हो त ?
मुख्य महाधिवेशनमा फेरबदल भएन तर प्रमुख कार्यतालिका तपाईहरुले मुख्य महाधिवेशन भन्नुहुन्छ तर मैले वडादेखि जिल्ला र प्रदेशसम्मको कार्यतालिकालाई लिन्छु । आफ्नो आफ्नो सोंचाई हो । तपाईको सोंचाई फागुन ७ गते होला । मेरो सोचाई अर्कै छ । वडा देखिकै अधिवेशन हुन सकेन भने त्यो मान्य नै हुँदैन । हाम्रो अहिले आएको कार्यतालिकामा विवाद छैन ।

तपाईले कार्यतालिकामा विवाद छैन भनेर भन्दै गर्दा के अरु विषयमा चाहि अझै विवाद छ भन्न खोज्नु भएको हो त ?
महाधिवेशनको विषयमा केही धाराहरु निलम्बनमा छन् । केही धाराहरु आउँदो बैठकमा छलफल हुन्छ र त्यसलाई अगाडि बढाइन्छ । त्यो पनि ठिक हुन्छ भन्ने मलाई लाग्छ । दोस्रो कुरा अहिले विवादको इस्यु भनेको ने.वि संघ हो, जो अहिले गम्भीर मोडमा छ । तरुण दल अहिले पनि चार जना बाट नै चलाई रहनु भएको छ । विभागहरु गठनको विषयमा यि तिन चार वटा विषयमा विवाद नै छ । नेपाली काँग्रेस पार्टीमा शेरबहादुरजी, रामचन्द्रजी र सिटौलाजी मात्रै हुने भए भइहाल्यो । हामी किन चाहियो ? केन्द्रीय सदस्यहरु किन चाहियो ? हामीहरुको विचार के छ भनेर त अहिले छलफल नै भएको छैन नि !

त्यसोभए यसमा तपाईहरु र नेपाली काँग्रेस पार्टीको विचार के छ त ?
चार वर्षसम्म पनि विभाग बनेन अब कसैलाई खुसी पार्नलाई, भोट तान्नलाई विभाग बनाउने हो भने त्यसको कुनै औचित्य छैन । त्यो पनि २८ वटा विभागबाट ४७ वटा विभाग विधि सम्मत हिँड्नुप¥यो नि । पार्टी विधि सम्मत हिँडेको छैन भनेर न हो हामीले विवाद गरेको हामीले भागवण्डाको लागि विवाद गरेको होइन ।

नेपाली काँग्रेस पार्टी फेरी भागवण्डामा नै गएको हो त ? तपाई के भन्नुहुन्छ ?
होइन, नेताहरु जानुभयो, शिर्ष नेताहरु भागवण्डामा जानु भयो भने मलाई भन्नु केही छैन । तर म त केन्द्रीय समितिमा आफ्नो कुराहरु राख्छु । जब केन्द्रीय समितिमा यो कुरा उठ्छ तब यो कुरा राखौला । त्यसमा के छ भने ने.वि.संघको इस्यु छन्, अर्को विभागको इस्यु छ र अर्को भातृ संस्थाले सदस्यता वितरण गर्ने इस्यु छ । यो तिन वटा इस्युको विषयमा हामीले आफ्नो कुराहरु राख्नुपर्छ । नेपाली काँग्रेसको विधानलाई मिचेर तपाई जान थाल्नुभयो भने कसरी हामीले आफुलाई लोकतन्त्रवादी पार्टी भन्ने ? अरु पार्टीहरुलाई लोकतन्त्रको पाठ सिकाउने अनि हामी आफै चाही लोकतन्त्रवादी नबन्ने हो भने कसरी अगाडि बढ्छ पार्टी ?

नेपाली काँग्रेसका कार्यकर्ताहरुले पहिला नेताहरु सुध्रिनु प¥यो र भिजन दिनुप¥यो भन्छन् पार्टीलाई कसरी अगाडि बढाउने तपाईको सोंच छ ?
तपाईले एकदम सही कुरा भन्नुभयो । म यसको समग्रमा व्याख्या गरेर भन्छु । एक किसिमका कार्यकर्ताहरुले नेपाली काँग्रेस पार्टी विधि र विधान समत छैन भनेर भनेको छ । अहिले नेपाली काँग्रेसका शिर्ष नेताहरु त्यसमा सबै समूहको कुरा गर्दै छु । नेपाल विद्यार्थी संघको इस्युमा विधि सम्मत हिँड्न चाहनु भएको छैन ।

केही साथीहरुले यतिसम्म भन्दै हुनुहुन्छ कि नेपाल विद्यार्थी संघको उमेरको हद चाही ने.वि. संघको १२औं महाधिवेशनपछि लागू हुन्छ । २० वटा जिल्लामा त महाअधिवेशन भइसक्यो ३२ वर्षभन्दा मुनिका केटाहरुको जिल्ला अधिवेशन भयो । आउने १४ फागुनमा स्वतन्त्र विद्यार्थी युनियनको चुनाव छ । ५० वर्षको मानिसहरुले उम्मेदवार घोषणा गर्ने र भोट कसले हाल्ने ? भन्दाखेरी २८÷३० वर्ष उमेरका युवाहरुले भोट हाल्छन् ।

नेपाली काँग्रेसको विधानलाई टेकेर त हिँड्नुप¥यो । नेपाली काँग्रेसको विद्यानमा नौ ओटा महामन्त्री बनाउने भन्ने छ, जे मन लाग्छ त्यही गर्दै जाने ? उहाँहरु मिल्नु हुन्छ भन्ने त्यो त स्वीकार्य हुँदैन नि । त्यही कारणले अस्ति ने.वि. संघमा झगडा भएको हो ।

शिर्ष नेताहरु रामचन्द्र पौडेल, शेरबहादुर देउवा र कृष्णप्रसाद सिटौलाले त सहमति पत्रमा हस्ताक्षर गरे नि, तपाई के भन्नुहुन्छ ?
उहाँहरु मिल्नुभयो राम्रो कुरा हो । मैले मिल्नु भएन भनेर भनेकै छैन । शेरबहादुरजी, सिटौलाजी र पौडेलजी मिल्नुभयो । जो व्यक्तिहरु विधि सम्मत हुनुपर्छ भनेर सभापतिहरुलाई निर्देशन दिँदै हुनुहुन्थो त्यही व्यक्तिहरु आज विधिसम्मत हिँड्न चाहनु भएको छैन । यो कुरा त हामी बोल्छौं नि, बोल्ने बेलामा बोल्छौं ।

शेरबहादुर देउवाले पार्टीलाई पेलेर लगिसक्नुभयो तपाईहरुको काम बोल्ने बाहेक के नै छ र होइन त ?
कसले पेल्यो, पेलेन भन्दा पनि महाअधिवेशनले देखाउँछ त्यो कुरा । दोस्रो कुरा २८ वटा विभाग दुई महिनाभित्र गरिसक्नुपर्छ भनेर नेपाली काँग्रेसको विधानले भन्छ । चार वर्ष वितिसक्यो, अधिवेशनको मितिको टुङ्गो भइसक्यो । महाअधिवेशनको कार्यतालिका डिक्ल्लेयर भइसक्यो । अहिले आएर नेपाली काँग्रेस पार्टीभित्र ४७ वटा विभाग बनाउँछु भनेर सभापतिजीको समूह लाग्नु भएको छ । रामचन्द्रजीको समूह २८ विभाग बनाउँछु भनेर लागिरहनु भएको छ ।

विभाग बनाउनै हुँदैन । किनभने अब विभाग बनाएर त्यसले काम गर्दैन । अब त महाधिवेशनको प्रक्रियामा हामी अगाडि बढ्नुप¥यो । नेपाली काँग्रेसको विधाननै भातृ संस्थालाई नेपाली काँग्रेसको सदस्यता वितरण गर्ने भन्ने छैन । नियमावलीमा उहाँहरुले जबरजस्ती हामीहरुले बोल्दा बोल्दै पनि भातृ संस्थालाई सदस्यता वितरण गर्ने अधिकार दिनुभयो, त्यसले नेपाली काँग्रेस पार्टीलाई कमजोर बनाउँछ कि बनाउँदैन ? लोकतन्त्र कमजोर बनाउँछ कि बनाउँदैन विधिसम्मत हिँडेन भने ? यो कुराहरु त हामी राख्छौं । रामचन्द्रजी र हामी एकै ठाउँ उभिएका छौं । तर कतिपय कुराहरुमा उहाँसँग चित्त बुझ्दैन, त्यो चित्त नबुझेका कुराहरु केन्द्रीय समितिमा राख्छौं । हुनसक्छ नोट अफ डिसेन्ट पनि लेख्छौं ।

नेपाल विद्यार्थीसंघको उमेर हदको विषयमा तपाईको व्यक्तिगत टिप्पणी के छ त ?
स्वतन्त्र विद्यार्थी युनियनको चुनावमा २८ वर्ष मुनिकाले भोट हाल्ने, ने.वि संघको उमेर हद भनेर विधानमा लेख्ने, २० वटा जिल्लामा ३२ वर्ष उमेरभन्दा मुनिका अधिवेशन भइसकेका छन् । अनि केही सिनियर साथीहरु चाही विधिसम्मत छ भनेर भन्नु चाही हाँस्यास्पदको कुरा हो । १२औं महाधिवेशनका लागि २० वटा जिल्लाको त भइसक्यो ।

नेपाली काँग्रेसभित्र शेरबहादुर देउवा सर्वैसर्वे हो त ? उहाँले जे भन्यो पार्टीभित्र त्यही हुन्छ ? तपाईलाई के लाग्छ ?
किन कसरी सर्वैसर्वा हुनु ? उहाँले जे भन्यो त्यही कहाँ भएको छ ? अहिले धेरै इस्युहरु छन् । नेपाली काँग्रेस पार्टीले राष्ट्रिय सभामा एउटा पनि सिट जितेन । हामी आफुलाई लोकतन्त्रवादी भन्छौं । राजपा र संघीय समाजवादीसँग मिलेर हामीले चुनाव लड्न पर्दैनथ्यो ? हाम्रो कति ठूलो क्षति भएको छ ।

तर सभापति शेरबहादुर देउवा त राजपा र समाजवादी पार्टीसँग मिलेर जान सक्नुभएन नि त तपाई के भन्नुहुन्छ ?
राजपासँग पहल नै सहमति गरेको छैन त मिल्छ कसरी ? राजपा आफुलाई लोकतन्त्रवादी लोतान्त्रिक पार्टी भन्छ । नेपाली काँग्रेस पार्टीसँग नजिक छु भन्छ । अनि नेपाली काँग्रेसले पहल नै गरे पहल गर्नुप¥यो नि सिटको लागि, मैले त हाम्रो कमजोरी हो भन्छु । दोस्रो कुरा सभामुखमा तटस्थ व्यक्ति हुनुपर्छ भन्ने कुरा एकदम सही हो ।

नेपाली काँग्रेसले जुन निर्णय गरेको छ, त्यसलाई म अन्यथा भन्दिन तर द्वन्द्वकालमा आरोपित व्यक्ति त्यसमा हामीहरुले उम्मेदवारी दिएनौं । हामीले सभामुख तटस्थ हुनुपर्छ भनेर मात्र भन्यौं । पुरा जगत हसायौं । हामीले देशभरीका नागरिक समाज, लोकतन्त्रवादी, जनता सबैलाई हसायो नेपाली काँग्रेसले, प्रोटेस्टको नाममा पनि हामीहरुले उम्मेदवार दिनुपथ्र्यो तर दिएनौं ।

तपाईहरुको जित्ने आधार पनि त थिएन नि तपाईहरुकै सहयोगमा अग्नि प्रसाद सापकोटालाई निर्विरोध बनाइयो नि किन ?
हाम्रो गल्ति भयो । उपसभामुख नेपाली काँग्रेसलाई दिइहाल्छ भनेर रामचन्द्रजी र शेरबहादुरजी गएर भेट्नु भएकै हो त ओली र प्रचण्डजीलाई, खोइ अब दिने भयो त ? लेनदेन हुन्छ, राजनीतिमा कति ठुलो भुल भयो, हाम्रो । राजनीतिक पार्टी भनेको जनताको नजरमा तपाई सँधै खरो उत्रिनुस् । एउटा द्वन्द्व कालको हत्याको आरोपित व्यक्ति जसको मुद्दा सर्वोच्च अदालतमा छ । सर्वोच्चले पनि कस्तो गरिदियो भने त्यो त मिलेर गरेको जस्तो देखियो । अदालतमा मुद्दा हेर्नै नमिल्ने न्यायाधिश हुनु त्यो त अदालत, सरकार सबै मिलेर यस्तो गरिराखेको छ यति त बुझ्छौं हामी पनि यसमा पनि केही शंका छ ?

अन्त्यमा तपाईको लोकप्रिय पत्रिका नयाँ विकल्प साप्ताहिक मार्फत् मेरा विचारहरु प्रवाह गर्ने अवसर दिनुभएकोमा पत्रिका परिवारलाई विशेष धन्यवाद !

सम्बन्धित समाचार

राष्ट्रिय विकास परिषद बैठक बालुवाटारमा शुरु
राष्ट्रिय विकास परिषद बैठक बालुवाटारमा शुरु
  • २०७६ माघ २०, ०६: ५१: ५९

नयाँ विकल्प, काठमाडौं – प्रधानमन्त्री अध्यक्ष रहेको राष्ट्रिय विकास परिषदको ४८ औं बैठक शुक्रबार प्रधानमन्त्रीको सरकारी निवास बालुवाटारमा शुरु भएको...

भारतमा उपचार गरी प्रचण्ड पत्नी सीता स्वदेश फर्काइन्
भारतमा उपचार गरी प्रचण्ड पत्नी सीता स्वदेश फर्काइन्
  • २०७६ माघ २०, ०६: ५१: ५९

नयाँ विकल्प, काठमाडौं – पार्किन्सन जस्तै रोगले संक्रमित भएपछि थप उपचारका लागि गत पुस २० गत भारतको मुम्बई लगिएकी नेकपा...

संसद पुनःस्थापना नगरी निर्वाचनमा गए रक्तपात हुन्छ –सुजाता
संसद पुनःस्थापना नगरी निर्वाचनमा गए रक्तपात हुन्छ –सुजाता
  • २०७६ माघ २०, ०६: ५१: ५९

नयाँ विकल्प,काठमाडौं – नेपाली काँग्रेसकी नेतृ तथा पूर्वउपप्रधानमन्त्री सुजाता कोइरालाले संसद पुनःस्थापना विना निर्वाचन गराउन खोजेमा मुलुकमा रक्तपात हुने बताएकी...

भर्खरै

TOP