January 16, 2021, Saturday

यो सरकारले संवैधानिक कानुनहरु सबै मिचेर एकलौटी ढंगले अगाडि बढेको छ 

जनताको आवाज बुलन्द गर्ने थलो संसद बन्द भएको वर्षदिन हुनलागिसक्यो, सुचारु गर्न नेपाली कांग्रेसले पहल गर्नुपर्दैन ?
नेपाली कांग्रेसले अबरुद्ध संसद सुचारु हुनुपर्छ भनेर पहल गरिरहेको छ । तर, यसलाई दबाब दिनको लागि कम्तिमा प्रतिपक्षसँग २५ प्रतिशत सांसद संख्या चाहिन्छ ।

नेपाली कांग्रेससँग मात्रै त्यो तागत छैन । त्यसकारण नेपाली कांग्रेसले मात्रै पहल गरेर संसद खुलाउन नसक्ने अवस्था सिर्जना भएको हो । तर, जनताको आवाज बुलन्द गर्ने एउटै मात्र थलो संसद हो ।

यसलाई खुलाउनको लागि नेपाली कांग्रेसले हरतरहले प्रयास गरिरहेको छ । गत भदौ, असोजमै चल्नुपर्ने संसद सरकारमा बस्नेहरुबाटै विरोध भयो । यो सरकार जनतालाई समस्या समाधान गर्नेतिर भन्दा पनि भ्रष्टाचार र अनियमिततातिर लिप्त भयो ।

कुनै छलफलबिना हठात रुपमा संसद् बन्द गरेर कमाउ धन्दातिर लाग्यो । त्यसकारण यो सरकार जनउत्तरदायी नभई एकदलीय तानाशाहीतिर उन्मुख भएको छ ।

सरकारमा बस्नेहरुले त आफ्ना कमीकमजोरीहरु उजागर हुन्छन् भनेर नखोल्लान, नेपाली कांग्रेस पनि तमासे भएर बस्यो नि ?
नेपाली कांग्रेस जस्तो जिम्मेवार पार्टीले अहिलेको अवस्थामा सकडमा नारा जुलुस गर्न उचित भएन । जनताका आवाज मुखरित गर्ने थलो संसद हो, त्यो ताल्चा लगाएर राखिएको छ ।

अब भ्रष्टाचारको सम्बन्धमा हामीले भन्नै परेन । उहाँहरुकै पार्टीका प्रतिनिधिहरुले भन्नु भएको छ । हामीले उठाउनुपर्ने कुराहरु हरेक जनताका घरदैलोमा, सञ्चारमाध्यम मार्फत् भनिराखेका छौं ।

नेकपाका अध्यक्ष पुष्पकमल दाहालले पटक–पटक भ्रष्टाचार भयो, मुलुक डुब्यो भनिरहनुभएको छ । प्रतिपक्षको हिसावले हामीले पहिला हाउस चल्दादेखि नै भन्दै आएको हो ।

अहिले उहाँहरुकै पार्टीका जिम्मेवारी नेताहरुले भनिरहनुभएको छ । नेपाली कांग्रेसले जति पहल गर्दा पनि संसद खुलाउन सकिएको छैन । तर, विभिन्न सञ्चारमाध्यम मार्फत सरकारले गरेका अनियमितताका कुराहरु जनता सामु पु¥याउने काम हामीले गरिराखेका छौं ।

त्यसको साथै नेपाली कांग्रेस छिटोभन्दा छिटो संसद खुलाएर जनताका आवाज मुखरित हुनुपर्छ भनेर सकेसम्म प्रयास गरिरहेको छ । सकेसम्म छिट्टै संसद खुलाउने र त्यहाँ सरकारले गरेका अनियमितताको भन्डाफोर गर्ने ।

यदि त्यो हुन सकेन भने विभिन्न सञ्चारमाध्यम, सामाजिक सञ्चाल, पत्रपत्रिका लगायतको माध्यमबाट पनि सरकारले गरेको भ्रष्टाचारको नेपाली कांग्रेसले भन्डाफोर गर्छ ।

कोरोना नियन्त्रणको लागि स्वास्थ्य सामाग्री खरिद लगायत सरकारका विभिन्न क्रियाकलापमा भ्रष्टाचारका कुरा छताछुल्ला भए, त्यसमा नेपाली कांग्रेसको स्पष्ट धारणा आएन नि ?
त्यसमा नेपाली कांग्रेस स्पष्ट धारणा छ । चाहे त्यो सेक्युरिटी प्रिन्टिङ प्रेस दरिद प्रकरणमा नेपाली कांग्रेसले नै आवाज उठाएको हो । त्यो काण्डमा ७० करोड भ्रष्टाचार गरेको कारणले तत्कालीन सञ्चारमन्त्री गोकुल बाँस्कोटाले राजीनामा दिएको अवस्था छ ।

त्यसमा अडियो मात्रै होइन, भिडियो नै छ भन्नेहरु पनि छन् । त्यसकारण यो सरकार बनेकै भ्रष्टाचार गरेर देशलाई भड्खालोमा हाल्न लागेको हो भन्ने कुरा ३ करोड नेपाली जनताको घरदैलोमा पुगिसकेको छ । त्यसका विरुद्ध नेपाली कांग्रेस जनताको साथ लिएर अगाडि बढ्छ ।

दशैं, तिहार र छठ पर्वका कारण रोकिएको क्रियाकलाप लिएर सदनदेखि सकडसम्म जनताका आवाज बुलन्द बनाउँदै नेपाली कांग्रेस अगाडि बढ्छ ।

विश्वमा कोरोनाको परीक्षण सरकारले गरिरहेको बेलामा नेपालमा एकाएक पैसा तिनुपर्ने बनाइयो, त्यसमा प्रतिपक्षी दल नेपाली कांग्रेसको पनि स्पष्ट धारणा आएन भन्ने गुनासो छ नि ?
हामीले संविधानमै स्वास्थ्य जनताको नैसर्गिक अधिकार हो भनेर संविधानमा लेखिएको छ । फेरि विश्वले महामारीको रुपमा लिएको कोरोनाको परीक्षणमा कहिले पीसीआरको पैसा तिर, कहिले न तिर भनेर यो सरकार नागरिकप्रति अत्यन्तै गैरजिम्मेवार र असम्वेदनशील भएको छ ।

कोभिड–१९ कोरोना भाइरसको परीक्षण र उपचार सरकारले निःशुल्क गर्नुपर्छ । अहिले जसरी सरकारले यो रोगलाई कमाइ खाने भाँडो बनाएको छ । त्यसलाई नेपाली कांग्रेस जनताको नैसर्गिक अधिकार विरुद्धको कदम भनेर विरोध गरेको छ ।

सरकारले जसरी प्राइभेट अस्पतालिहरुमा कोरोना परीक्षण गराएर पैसा असुल्ने, सरकारीमा परीक्षण पीसीआर परीक्षणको पैसा लिने गरेको छ । त्यसको नेपाली कांग्रेस विरोध गरेको छ । यसलाई कार्यक्रम बनाएर हामी अगाडि बढ्ने छौं ।

तिनै नागरिकहरुलाई पहिला निःशुल्क परीक्षण गर्ने अनि पछि आएर पैसा तिराउने गर्दा त भेदाभव देखियो नि ?
त्यसै हुनाले यो सरकार नागरिकहरुप्रति सम्वेदनशील र जवाफदेही छैन । नेकपालाई यो सरकार ‘बाँदरको हातमा नरिवल’ जस्तो भएको छ ।

हिजो जसरी कम्युनिस्टहरु एक भएर झन्डै दुई तिहाई हाराहारी मत ल्याए । त्यसको अहिले पूर्ण रुपले दुरुपयोग भइरहेको छ । यो नागरिकको सरकार नै होइन । नेपाली जनताले सरकार छ भनेर महसुस पनि गरेका छैनन् । सीमित कार्यकर्ताको पालनपोषण गर्ने काम मात्रै यो सरकारले गरेको छ ।

त्यसोभए नेकपाको सरकारले ‘बाँदरको हातमा नरिवल’ जस्तो उखान चरीतार्थ गरेको हो ?
जुन रुपले जनादेश प्राप्त भयो । त्यो उनीहरुको लागि ‘बाँदरको हातमा नरिवल’ भयो । जनादेशको आडमा भ्रष्टाचार गर्ने र मुलुक रित्याउनेबाहेक जनताको सुख, सुविधाको काम भएन ।

नागरिकको नैसर्गिक अधिकारभित्र परेको स्वास्थ्य परीक्षणमा पनि कसैलाई पैसा तिराउने, कसैलाई सित्तैमा परीक्षण गर्ने कामले सरकार जनताप्रति पुरै अनुत्तरदायी बनेको छ । यो रवैयाले सरकार जनता अगाडि पूर्ण रुपले नांगो भएको छ । मुलुकमा सरकार भएको अनुभूति जनताले गरेका छैनन् ।

कोरोना परीक्षण र उपचार राज्यले गर्नुपर्छ भन्ने नेपाली कांग्रेसको ठहर हो ?
हो, विश्वले महामारीको रुपमा लिएको कोरोनाको परीक्षण र उपचार निःशुल्क रुपमा राज्यले गर्नुपर्छ । यो राज्यको दायित्वभित्र पर्ने काम हो । राज्यले गर्न नसक्नु यो सरकारको नालायकीपन हो । जनता सामु सरकार पूर्ण रुपले नांगिएको अवस्था हो ।

कोरोना नियन्त्रण र उपचार गर्ने काम राज्यको हो । कसैलाई पैसा लिने कसैलाई निःशुल्क गर्ने होइन । सबैलाई समान रुपमा परीक्षण र उपचार हुनुपर्छ । त्यो जनताको अधिकारभित्र पर्ने कुरा हो । निःशुल्क उपचार हुनुपर्छ भनेर हामीले प्रधानमन्त्रीलाई ज्ञापनपत्र पनि बुझाएका छौं । यो अनुभवहिन सरकार कुनै हालतमा पनि जनउत्तरदायी छैन ।

त्यसोभए अहिले सरकार बस्नेहरुमा राज्य सञ्चालन गर्ने क्षमता छैन भन्न खोज्नु भएको हो ?
हो, उनीहरुमा सरकार सञ्चालन गर्ने र विपत्तीको सामना गर्ने क्षमता छैन । अहिले ८ महिनादेखि भएको लकडाउनको बेलामा उनीहरु व्यवहार र कामले छर्लङ्ग भएको छ । यो अवधिमा उनीहरु खाली कसलाई मन्त्री बनाउने, कहाँ आफ्नो मान्छ राख्ने, कसलाई प्रधानमन्त्री बनाउने, कसलाई नियुक्ति गर्ने ध्याउन्नामा लिप्त छन् । जनताका समस्याप्रति रत्तिभर ध्यान दिएको पाइँदैन ।

सरकारको अनियमिततामा प्रतिपक्षी दल कांग्रेसको पनि मिलेमतो छ भन्ने आरोप छनि ?
झण्डै दुई तिहाई हाराहारी मत प्राप्त गरेर सरकार बनिसकेपछि हामीसँग सरकार गिराउने र बनाउने तागत भएन । फेरि नेपाली कांग्रेस एउटा जिम्मेवार प्रतिपक्षी भएकाले त्यस्तो खेलमा लाग्दैन । सरकारले गरेका गलत कामहरु जस्तै सुन काण्डका कुरा हुन्, वाइडवडीका कुरा हुन्, चाहे यति प्रकरणका कुरा हुन्, चाहे सेक्युरिटी प्रिन्टिङ प्रस खरिदका कुरा हुन् ।

कतिपय काण्डमा अख्तियारले कारबाही गर भन्दा कानमा तेल हालेर बसेको देख्दा संवैधानिक निकायलाई नै प्रभावमा पारेको देखिन्छ । उतातिर स्वास्थ्य सामाग्री खरिद गर्दा ओम्नी कम्पनीलाई २ रुपैयाँको चिजलाई १० रुपैयाँसम्म भुक्तानी गरिएको छ । १० रुपैयाँको चिजलाई ४० रुपैयाँसम्म भुक्तानी गरिएको छ । यी सबै क्रियाकलापलाई हेर्दा सरकारले आफूले हिजो पाएको जनमतलाई लत्याएको छ ।

जनताको सेवक होइन, आफू मालिक भएर उनीहरुलाई नोकर बनाएको छ । हिजो नेकपालाई भोट हाल्ने नागरिकहरु अहिले थकथक मानेर बसेको अवस्था छ । यो हामीले मात्रै भनेको होइन । नेकपाका कार्यकारी अध्यक्षले नै लिखित रुपमा पटक–पटक भनेका छन्, ‘यो सरकार भ्रष्टाचारमा लिप्त छ, मुलुक टाटपल्टिन लाग्यो, मुलुक जनताप्रति जवाफदेही भएन’ भनेर ।

फेरि कम्युनिष्टलाई सत्तामा पु¥याउनु भनेको देशलाई कंगाल बनाउनु हो ?
त्यसमा त शंकै छैन, आमजनताले अहिले त्यही भनिरहेका छन् । जनताले २०६४ सालमा मुलुकमा नयाँ परिवर्तन ल्याउँछ भनेर तत्कालीन नेकपा माओवादीलाई जनमत दिए, उसले एउटा संविधान बनाउन सकेन ।

चार–चार जना प्रधानमन्त्री फेरिँदा पनि दुईभित्र संविधान बनाउछु भनेर चार वर्ष बित्दा पनि संविधान बनाउन सकेनन् । नेपाली कांग्रेसले २०७० सालको चुनावमा भन्यो, ‘एक पटक हामीलाई जनमत दिएर ठूलो पार्टी बनाउन दिनुहोस्, हामी संविधान पनि बनाउछौं, मुलुकमा स्थायी शान्ति पनि बहाली गछौं’ भन्यो ।

त्यसो भनेर चार वर्षको अवधिको लागि चुनाव भएको थियो । तर हामीले दुई वर्षमै संविधान पनि जारी ग¥र्यौ, मुलुक स्थायी शान्ति पनि बहाली गरेर छाड्यौं । त्यसकारण जब यो मुलुकमा संकट पर्दछ त्यतिबेला नेपाली जनताले नेपाली कांग्रेसलाई सम्झिन्छन् । अहिले पनि जनताले त्यो कुरा महसुस गरिसकेका छन् । त्यो भयो भन्दैमा अहिले यो सरकार ढाल्ने नेपाली कांग्रससँग तागत पनि छैन ।

सरकार ढाल्ने फेरबदल गर्ने तागत पनि छैन, कांग्रेसको त्यो नियत पनि होइन हो ?
नेपाली कांग्रेस एउटा प्रजातान्त्रिक पार्टी हो । त्यसैले जनमतको कदर गर्छ । यसले जनताको आधारभूत आवश्यकता पुरा गर्न सक्नुपर्छ । यो सरकार पाँच वर्षसम्म यो चल्नुपर्छ । अनि आम चुनावमा जानुपर्छ । हामीले राम्रो काम गरेर जनतालाई देखाउनुपर्छ । यो नै प्रजातन्त्रको एउटा सुन्दर पक्ष हो । एउटा जिम्मेवार प्रतिपक्षले गर्ने काम पनि त्यहीं नै हो । सरकारले गलत काम सदनदेखि सकडसम्म हामीले राखेका छौं ।

सरकार एकातिर कलेजको जाँच गर्ने अर्कोतिर नगरप्रमुखहरुलाई उचालेर लकडाउनको कुरा गर्ने द्वैत चरित्र भएन ?
यो सरकार कुनै भिजन छैन । पूर्ण रुपले असफल भइसकेको छ । ऊसँग राज्य सञ्चालन गर्ने कुनै क्षमता छैन । राज्यसत्ता कसरी चल्नुपर्छ, कानुनी राज्य कसरी चल्नुपर्छ ? संविधानमा उल्लेख भएका कुराहरु लागु भए कि भएनन् भन्नेतिर ध्यान दिएको छैन । यो सरकारले संवैधानिक कानुनहरु सबै मिचेर एकलौटी ढंगले अगाडि बढेको छ । नियमसंगत ढंगले काम गरेको छैन र गर्ने क्षमता पनि राख्दैन ।

नेपाली कांग्रेसको महाधिवेशन पनि आयो, तोकिएकै समयमा सम्पन्न हुन्छ ?
नेपाली कांग्रेसले महाधिवेशन गर्नैपर्छ । महाधिवेशन बिनाको प्रजातान्त्रिक पार्टी हुनै सक्दैन । अहिले विश्वव्यापी रुपमा फैलिएको कोभिडको कारणले चार वर्षे अवधि समाप्त भएर पाँच वर्षमा रनिङ गर्दै छौं । त्यो अवधि पनि आगामी फागुनमा सकिँदैछ ।

त्यसपछि जटिल परिस्थिति भएमा अर्को छ महिना थप्न पाइने भन्ने छ । त्यो अवधिभित्र हामीले कुनै पनि हालतमा महाधिवेशन सम्पन्न गर्नुपर्छ । त्योभित्र महाधिवेशन सम्पन्न गर्न सकेनौं भने हामी प्रजातान्त्रिक पार्टी भनेर रहन सक्दैनौं । त्यसकारण अन्तिम भदौसम्म नेपाली कांग्रेसले आफ्नो महाधिवेशन सम्पन्न गर्छ ।

केन्द्रदेखि प्रदेश, जिल्ला स्थानीय र गाउँतहसम्म महाधिवेशन तयारीका क्रियाकलापहरु भइराखेका छन् ?
नेपाली कांग्रेसले सबै तहमा आफ्नो क्रियाकलापलाई चुस्तदुरुस्त बनाएको छ । नेपाली कांग्रेसले जहाँ–जहाँ नेतृत्व गरेको छ, त्यहाँ विकास निर्माणदेखि पार्टीको कामलाई सुचारु ढंगले अगाडि बढाएको छ । काठमाडौं उपत्यकामा मात्रै चार ठाउँमा हाम्रो स्थानीय सरकार छ ।

त्यो चाहे दक्षिणकाली होस्, चन्द्रागिरी, नागार्जुन र गोकर्णेश्वर होस् ती ठाउँहरुमा नेपाली कांग्रेस जनताको पक्षमा उपलब्ध साधनस्रोत र आफ्नो बलबुताले भ्याएसम्म काम गरेको छ । त्यहाँका जनप्रतिनिधिहरुले अहोरात्र खटेर राम्रो काम गर्नुभएको छ ।

अब आउने आमचुनावमा बहुमत ल्याउने गरी नेपाली कांग्रेस काम गरेको छ त ?
नेपाली कांग्रेस आफ्नो बलबुताले भ्याएसम्म जनताको पक्षमा राम्रो काम गरेको छ । र, जनता अहिले अत्तालिएका छन्, ‘कस्तो समयमा कम्युनिस्टलाई भोट दिएछौं’ भनेर ।

कम्युनिस्टका मीठो नारामा भुलेर भोट दिएकोमा आमनागरिकहरु अहिले पछुताइरहेको अवस्था छ । त्यसैले पनि आगामी आमनिर्वाचनमा नेपाली कांग्रेसको बहुमत पक्का छ । यो नेपाली जनताको चाहना र आवश्यकताभित्रको कुरा हो ।


अन्त्यमा केन्द्रविन्दुमा रहेको लोकप्रिय पत्रिका नयाँ विकल्प साप्ताहिक मार्फत् मेरा विचारहरु प्रवाह गर्ने अवसर दिनुभएकोमा पत्रिका परिवारलाई विशेष धन्यवाद दिन चाहन्छु ।

सम्बन्धित समाचार

रुकुम पूर्वका जिल्ला समन्वय प्रमुख वलीसहित ५ जना जुवा खालबाट पक्राउ
रुकुम पूर्वका जिल्ला समन्वय प्रमुख वलीसहित ५ जना जुवा खालबाट पक्राउ
  • २०७७ मंसिर ८, १२: २६: ०२

नयाँ बिकल्प, काठमाडौं – लुम्बिनी प्रदेशको रुकुम पूर्वका जिल्ला समन्वय प्रमुख गजेन्द्रबहादुर वलीसहित पाँचजनालाई प्रहरीले जुवा खेलिरहेको अवस्थामा पक्राउ गरेको...

शनिबार ७५३ स्थानीय तहमा हुने विरोध प्रदर्शनमा सहभागी हुन कांग्रेसको अपिल
शनिबार ७५३ स्थानीय तहमा हुने विरोध प्रदर्शनमा सहभागी हुन कांग्रेसको अपिल
  • २०७७ मंसिर ८, १२: २६: ०२

नयाँ विकल्प,काठमाडौं – नेपाली कांग्रेसले प्रतिनिधि सभा विघटन गर्ने सरकारको कदम असंवैधानिक भएको भन्दै शनिबार देशका ७ सय ५३ वटै...

तङ्ग्रिदै छ पोखराको पर्यटन ब्यावसाय
तङ्ग्रिदै छ पोखराको पर्यटन ब्यावसाय
  • २०७७ मंसिर ८, १२: २६: ०२

सिबी अधिकारी, रासस पाेखरा-राजधानी काठमाडौँपछिको प्रमुख पर्यटकीय क्षेत्रको रुपमा पोखरा कहलिएको छ । अनुपम प्राकृतिक सुन्दरता, भौगोलिक विविधता तथा सुन्दर...

भर्खरै

TOP