May 6, 2021, Thursday

उत्तरगया-गोकर्णेश्वरको दर्शन नगरी धार्मिक यात्रा पुरा हुँदैन, हाइकिङ र साइक्लिङको रुट बन्दैछ

तपाईं नगरप्रमुखमा निर्वाचित भएपछि नगरको विकास र नागरिकको सेवामा के चुनौति छन् ? समाधानका लागि के–के गर्दै हुनुहुन्छ ?
म आउँदा खेरी त यो नगरपालिकाको स्थिति लथालिङ्ग थियो । यो अवस्थालाई म वडादेखि नै निर्वाचित भएर आएको अनुभव भएको व्यक्ति भएकाले त्यसैको आधारमा अघि बढेको छु । अहिले आएर पूर्ण व्यवस्थित गरेर नगरपालिकालाई लान सकिएको छ ।

यसमा म बढो सन्तुष्टिपूर्ण तरिकाले बसेको छु। जहाँसम्म चुनौतिको कुरा गर्नु हुन्छ भने यहाँ जताततै चुनौति पनि छन् । एउटा बाटो खोल्न लाग्दा, रुख काट्न लाग्दा, ढल हाल्न लाग्दा र सडक विस्तार गर्न लाग्दा यहाँ गुनासो लिएर कति आउनु हुन्छ भन्ने कुरा देखिहाल्नु भयो ।

ठेकेदारको, प्रोजेक्टकोे, इञ्जिनियरको गुनासो अर्को तिर हुन्छ । यो सबैलाई समाधान गर्दै आउँदा अहिले हाम्रो ७ वटा शाखाहरु व्यस्थित ढंगले खडा गर्न सकियो । विशाल डिजिटल डाटा सर्भे गरेर पुरै नगरपालिकाको नक्सासहितको डाटा तयार गर्न सकियो ।

६–७ करोड राजश्व उठ्ने नगरपालिकालाई ५४ करोड राजश्व उठ्ने बनाउन सकियो । ९ वटामा सबै वडा कार्यालय बनाउन सकियो । नगरपालिकाको कार्यालय बन्नको लागि पनि टेण्डर भइसकेको अवस्था छ । जनताको आवश्यकतालाई पुरा गर्दै अघि बढेको अवस्था छ ।

यो धार्मिक र सांस्कृतिक नगरलाई पर्यटकिय दृष्टिले आकर्षक बनाउने तर्फ के योजना बनाउनु भएको छ ?

पर्यटकिय क्षेत्र बन्ने भयंकर सम्भावना रहेको नगर हो यो । मैले गतवर्ष नै धार्मिक पर्यटकिय क्षेत्र भनेर घोषणा गरें । धार्मिक पर्यटकिय क्षेत्र किन भनेको हो भने –हाम्रो उत्तरतर्फको सीमामा गुजेश्वरी एकातिर र बौद्धनाथ अर्कोतिर रहेको छ ।

उत्तरगया धाम–गोकर्णेश्वर, उत्तरवाहिनी, सुन्दरीजल, सुन्दरीमाईदेखि लिएर बाग्द्वार र समग्रह बाग्मती सभ्यता नै यो नगरपालिकाभित्र पर्ने भएकाले त्यसलाई साक्षी राखेर गुजेश्वरीदेखि बाग्द्वारसम्मको क्षेत्रलाई बिकास हुनुपर्छ र पर्यटकलाई व्यापक रुपमा भित्र्याउनु पर्छ भन्ने हाम्रो योजना छ ।

चार लाख भारतीय पर्यटक मात्रै प्रत्येक वर्ष पशुपति क्षेत्र आएको रेकर्ड छ । पशुपति आएका ४ लाख पर्यटक किन गोकर्णेश्वर र बौद्धनाथ आउँदैनन ? किनकी मुलुकले त्यो कहिल्यै कोसिस नै गरेन । पशुपति आएको पर्यटकलाई त्यहाँसम्म ल्याउनुपर्छ भनेर कुनै योजना नै बनाईएन ।
तर, नगरपालिकाले अहिले डिजिटल बोर्ड राखेको छ ।

एयरपोर्टबाट पशुपति छिर्ने बाटो तिलगंगा एउटा ठूलो डिजिटल बोर्ड राखेका छौं । त्यसमा गोकर्णेश्वर नगरपालिका भित्रको डिटेल विवरण राखिएको छ । धार्मिक पर्यटकहरु उत्तरगया नटेकीकन यहाँको धार्मिक यात्रा पुरा नहुने कुरा त्यहाँ जनाइएको छ ।

पशुपतिमा आएका पर्यटकहरुले सुन्दरी जलको जल स्नान नगरी पूर्ण हुँदैन भनेर हामीले प्रयास गरेका छौं । नेपाली, हिन्दी र अंग्रेजी भाषामा त्यो डिजिटल बोर्डमा दृश्यसहित २४ सै घण्टा देख्न सकिन्छ । त्यो बोर्ड उत्तरगया धाम गोकर्णमा र जोरपार्टीमा राख्ने योजना छ ।

यो नगरपालिकाले मुलुकमै नौलो योजना बमोजिम ११ जनाको धार्मिक संरक्षण समिति बनाएको छ । एकदम बिद्वानहरुले ल्याउनु हुन्छ । अस्ति भर्खरै मात्र यहाँ एउटा पुस्तक निस्कियो । जसमा यहाँ भित्रका सम्पूर्ण स्थानको विवरण उतारिएको छ । स्थानीय पाठ्यपुस्तक पहिलो पटक पनि यहीँ नगरपालिकाले पहिलो पटक लागू गरेको छ ।

एक महिनाको समय दिएर एकदम व्यवस्थित लामो हाइकिङ रुट सुन्दरीजलबाट चिसापानी, सुन्दरीजलबाट शिवपुरी, सुन्दरीजलबाट बागद्वार र सुन्दरीजलबाट बुढानिलकण्ठसम्म ओर्लन मिल्ने गरी म्यापमा उतार्नको लागि सम्झौता गरी बिज्ञ टोलीलाई जिम्मा दिएका छौं ।

बिज्ञ टोलीले एक महिनाभित्र सबै विवरण तयार गरी हाइकिङ् र साइक्लिङ् पर्यटकिय साथिहरुलाई यात्राको लागि व्यवस्थित गर्न लागिएका छ । यो रुटमा अन्यतिर बनाए जस्तो होइन । अहिलेको हाइकिङ रुटमा सुन्दरी जलबाट चढ्दै जाँदा एउटा परिवार दुई घण्टा हिँड्दै थाक्नुभयो भने त्यहाँ सबै खानाको व्यवस्था गर्ने फोन नम्वरसहितको व्यवस्था गरिने छ ।

यदी होइन, म चिसापानी नै पुग्छु भन्ने योजना छ भने त्यो रुटमा कहाँ बस्न र खान पाइन्छ भनेर विवरण र सूचना तयार गर्दैछौं । इमर्जेन्सी पर्यो भने त्यहाँबाट सम्पर्क गर्न मोबाइल नम्वरहरु दिएको हुन्छ । त्यस्तो बेला तत्काल रेस्क्यू हुन्छ । यसरी व्यवस्थित ढंगले अघि बढेका छौं ।

यो नगरपालिका मेलम्चि खानेपानी आयोजना वितरणको शुरुआत बिन्दु हो । यो आयोजना निर्माणपछि यो नगरपालिकाका जनताले कस्तो सुविधा पाउँछन ?
मेलम्ची खानेपानी आयोजनाको वितरण शुरु हुने क्षेत्र नै हाम्रो नगरपालिकाको १ नम्वर वडामा पर्ने सुन्दरीजल हो । यो आयोजनाको सम्पूर्ण क्रियाकलाप ठूला ठूला पोखरी यही नगरपालिकाबाट, विसाल सात फिटे पानीको पाईप यही नगरमा महाङ्कालसम्म पर्छ ।

समस्या भनेको पानी आउने हो कि नआउने हो ठेगान छैन । ‘पहिलो चरणमा आएको पानी चाहीँ रिङरोडभित्र मात्रै वितरण गर्ने’ भनेर केन्द्र सरकारले भनेपछि हामीले ‘यो आयोजनाको लागि हाम्रा सारा घर भत्काउने, बाटो भत्काउने ? दुई सय रोपनीभन्दा बढी जग्गा जाने हाम्रो, अनि पानी चाहीँ पिउने बेलामा हामीले नपाउने ? यो केन्द्र सरकारको कस्तो सूचना ?’ भनी विरोध ग¥यौं ।

‘त्यसोभए मेलम्चीको पानी आउन दिँदैनौं’ भनेपछि उहाँहरुले दिनेसम्म भन्नु भएको छ । अहिले आएर २ अर्ब १७ करोडको प्रोजेक्ट मेलम्चीले छुट्याएको छ । ट्वाङ्की निर्माण भइरहेको छ । पानी आउने आशा छ तर ग्यारेन्टी चाहीँ छैन् ।

यो नगरपालिकाले फोहोर व्यवस्थापन गर्न र वातावरण स्वच्छ बनाउन केही समस्या बेहोर्नु परेको छ कि छैन ?
यो नगरपालिकाभित्र पर्ने सबै वडाका बाटा घाटा सबै ब्लक छाप्ने, ढलान गर्ने वा पिच गर्ने गरेका छौं । हिजोको जस्तो हिलो धुलो आउने समस्या सबै हटीसक्यो ।

एउटै बाटो जोरपाटीदेखि सुन्दरीजल जोड्ने सकडको स्तरोन्नतीको काम व्यापक रुपमा भइरहेको छ । यो सडकको दायाँ वायाँ पर्ने घरहरु भत्काउँदै छौं । दुई महिनाभित्र यो सडक पिच भइसकेपछि यो नगरपालिकामा बाटो बनाउने काम बाँकी छैन ।

चुच्चेपाटीदेखि साँखु जोड्ने सडक थियो । त्यसको बौद्ध, जोरपाटी क्षेत्रमा हिलो, धुलोले धेरै टेन्सन दियो । धेरै खप्की खाइयो । त्यो अब समस्या समाधान भइसकेको छ ।

यो नगरपालिका क्षेत्रमा कहीँ पनि फोहोर मैला देख्न सक्नु हुन्न । नगरपालिकाभित्र कहीँ पनि फोहोर मैला थुपारेको देख्न सक्नुहुन्न । त्यसकारणले यो समस्या समाधान भएको छ । यो जोरपाटीदेखि सुन्दरीजलसम्मको सडक बनेपछि हामीसँग हिलो धुलो हुने सडक छैन् ।

एउटा राजनीतिक दलको जिम्मेवारीमा बसेर काम गरिरहेको व्यक्तिलाई स्थानीय तहमा जनता र मतदाता केन्द्रीत भएर फिल्डमा खटिँदा कति समस्या छ ?
स्थानीय तहमा रहेर काम गर्न मलाई समस्या छैन । त्यो मैले महसुस गरेको पनि छैन । किन भने सबै वडामा सबै साथिहरुले सहयोग गरिरहनु भएको छ । वडाध्यक्ष र वडा सदस्यहरु सबै तगडा–तगडा पाएको छु । प्रशासनमा बस्ने साथिहरु पनि राम्रै पाएको छु ।

यही त हो नि इञ्जिनियरिङ, प्रशासन र वडा वडाको काम गर्दा साथ पाएको बहुमतको स्थानीय सरकार पाएको हुनाले त्यस्तो कुनै समस्या महसुस भएको छैन ।

म अलिक पुरानो मान्छे परें । शुरुदेखि नै नेतृत्व लिने मान्छे भएकोले मलाई अप्ठ्यारोमा पार्ने मान्छे पनि खासै छैनन् ।

तपाईं संलग्न राजनीतिक दल नेपाली कांग्रेस केन्द्रीय संसदमा प्रमुख प्रतिपक्षमा छ । तपाईं स्थानीय तहको सरकार प्रमुखको हैसियतमा हुनुहुुन्छ । काम गर्न कत्तिको समस्या हुन्छ ?
अहिले यहाँ पक्ष र प्रतिपक्ष भन्ने महसुस नै भएको छैन् । प्रतिपक्षले पूर्णरुपमा सहयोग गरेको अवस्था छ । कुनै पनि कुरामा कुनै पनि हामीले लिएको पोलिसीमा कुनै बाधा अड्चन दिनु भएको छैन । आज चौथो वर्षमा प्रवेश गर्दा समेत कुनै समस्या छैन ।

अन्य स्थानीय तहमा निर्वाचित जनप्रतिनिधि फरक फरक दलबाट आएको हुनाले, नगर प्रमुख र उपप्रमुख, नगरप्रमुख र वडाध्यक्षबीच बिवाद हुने, नगरपालिका केन्द्र र नाम राख्ने विषयमा बिवाद हुन्छ । यहाँ त्यस्तो केही छ ?
धेरै ठाउँको मैले हेरेको छु । कयौं ठाउँमा मेयर र उपमेयरबीचको झगडा हुने गरेको छ । परिषद् पास हुन नसक्ने, ताल्चा लगाउने घटना पनि देखेको छु । तर, मकहाँ होला काम गर्ने शैलीकै कारण शुरुदेखि हालसम्म पक्ष र प्रतिपक्ष सबै मिलेर गरेका छौं । कुनै काममा बाधा अड्चन छैन । फ्रन्टलाईनमा त्यो बिवाद छैन ।

राजनीतिभन्दा पर तपाईं साहित्यतर्फ पनि लाग्नुभयो । तपाईंले रचना गर्नु भएका गीत रेडियो नेपालमा पनि प्रशारण भइरहन्छ । राजनीति र साहित्य क्षेत्रलाई सँगसँगै कसरी लान सक्नु हुन्छ ?
यो धेरै अगाडिको कुरा हो । त्यो उमेरमा गितार बजाएर लेख्ने र गाउने पनि गर्दथें । दुइ, तीन जनाको टोली थियो । कोही हारमोनियम, कोही तवला बजाउँथे । म गितार बजाउँथें । क्लव क्लवको प्रतिष्पर्धा हुन्थ्यो । लोकगीत र आधुनिक गीत प्रतिष्पर्धा हुन्थ्यो । त्यस्तो प्रतिष्पर्धामा म पहिलो, दोश्रो भइरहन्थें ।

मैले गीत लेखेर दिए पनि रेडियो नेपालमा ६–७ वटा गीत रेकर्ड पनि भयो । खुसी पनि थिएँ । नारायण गोपाललाई गाउन भनेर एउटा गीत मैले लेखेको थिएँ । नारायण गोपालको कस्तो चलन भने –उहाँलाई कसैले भनेर गीत लेख्ने होइन ।

मैले गीत लेखेर दिए पनि हेर्ने हो, मन लागेमा मलाई नै बोलाएर धन्यवाद है, म गाउने हो यो गीत भन्ने हो । इच्छा लागेन भने त्यहीँ च्यातेर फ्याकी हाल्ने हो । मलाई मन परेन, यस्तै हो है बाबु … भन्ने हो ।

मैले एउटा गीत लेखेर दिएको थिएँ । उहाँको अवस्था निकै जटिल थियो । त्यो बेला उहाँ निकै ठूलो महान कलाकार भइसक्नु भएको थियो । देशमा मात्र नभएर विश्वमै नाम कहलिने भइसक्नु भएको थियो । तर, उहाँलाई भनिन्थ्यो चाहीँ के भने ‘जाँड खान्छ । गीत गाउने बेलामा पनि खान्छ । भनेर मान्यता चाहीँ गलत थियो । अँ अँ त्यो नारायण गोपाल भट्टीतिर बस्छ, जाँड खान्छ भन्ने गरिन्थ्यो ।

मैले नारायण गोपाललाई लेखेर दिएको गीत यस्तो थियो ‘कहाँ सुत्छु, कहाँ म सुत्छु कहिले उठ्छु, कुन भावनामा बहन्छु म, जहिले पनि रित्तिइसकेको बोतलहरुमा रमाउँछु म ।’ मेरो कस्तो बेहाल भयो भने मैले यो गीत लेखेर उहाँलाई दिएँ । दिएपछि उहाँले म गाउँछु भन्दै असाध्यै खुसी हुनुभयो । गीत लिएर जानु भयो । त्यसपछि बिरामी हुनुभयो । बिरामी भएपछि बित्नुभयो । त्यो ब्याड लक भयो । मेरो एउटा ठूलो इच्छा थियो –‘नारायण गोपालले मेरो एउटा गीत गाइ दिएको भए ?’ मैले त्यसपछि त्यो क्षेत्र नै ठ्याक्कै स्टप गरें ।

त्यसपछि मलाई वडाध्यक्षमा उठ्नुपर्यो भनेर हाम्रो ११ जनाको टोली बन्यो । यहाँ १७ वर्षदेखि एउटै व्यक्ति चाहीँ निर्वाचित हुनुहुन्थ्यो । उहाँकै बिरुद्ध हाम्रो टोली बन्यो । त्यसमा मलाई पनि एउटा वडाध्यक्ष बन्न प्रस्ताव आयो ।

मैले त अहँ … मेरो त यो लाईनै होइन । मलाई इच्छा छैन । ‘म सांगीतिक क्षेत्रतिरै छु’ भनेँ तर मान्नु भएन । मान्दै नमानेपछि मैले वडाध्यक्षमा नाम लेखाएर अघि बढें । हारेको भए साह्रै राम्रो हुन्थ्यो । त्यसो भएको भए राजनीति छुट्थ्यो र आफ्नै लाईन हुन्थ्यो । जितेपछि राजनीतितर्फ लागियो । बिहानदेखि बेलुकीसम्म यतातिर धाउन थाल्यो । मान्छेको कामको लागि दौड्न थालियो ।

२०३९ सालमा २१ वर्षको उमेरमा वडाध्यक्ष भएँ । पञ्चायत कालमा अहिलेको सरकारभन्दा पनि ठूलो वडाध्यक्ष । सरकारको केही कुरा होस, अञ्चालाधिस भन्ने थियो, त्यो बेला । त्यो सिडिओ वा अञ्चलाधिस भन्दा पनि वडाध्यक्ष चाहिने । कसैले भनेको पनि नसुन्ने । त्यति धेरै पावर थियो । वडाध्यक्ष भएपछि धेरै मान्छेहरुसँग सम्पर्कमा आइयो ।

त्यसपछि १५–१७ वर्ष ग्याप भयो । त्यसपछि कांग्रेस सरकार बन्यो । त्यसपछि राजनीतिमा पुरै लाग्यो ।

नेपाली कांग्रेसको क्षेत्रिय सभापति पनि हुनुहुन्छ । यो क्षेत्रमा कांग्रेसको १४औं महाधिवेशनको लागि क्रियाशिल सदस्यता वितरण र नविकरणका विषयमा के समस्या छ ?
यो क्षेत्रमा कांग्रेसको क्रियाशिल सदस्यता नविकरण गर्ने काम सकिएको छ । नयाँ सदस्यता वितरणको काम भइरहेको छ । आगामी २४ गतेसम्म हामीले जिल्लामा बुझाई सक्नुपर्ने छ । यो क्षेत्रका सबै वडाले बुझाइ सक्नु भएको छ ।

कांग्रेसमा कस्तो नेतृत्व आउनुपर्छ जस्तो लाग्छ ?
कांग्रेस नेतृत्वमा यस्तो टिम आउनुपर्छ कि जसले यो मुलुकको विकास गरोस, नेपाली जनतालाई जान्ने बुझ्ने र यो गर्दा राम्रो हुन्छ भन्ने थाहा भएको नेतृत्वको टिम आउनुपर्छ । यहाँ एक जना सभापति वा महामन्त्रीले मात्र पार्टी बलियो हुने होइन ।

सम्बन्धित समाचार

पछिल्लाे २४ घण्टामा ९ हजार ७० काेराेना संक्रमित थपिए ५४ जनाकाे मृत्यु
पछिल्लाे २४ घण्टामा ९ हजार ७० काेराेना संक्रमित थपिए ५४ जनाकाे मृत्यु
  • २०७७ मंसिर १९, १६: २५: ३९

नयाँ विकल्प, काठमाडाैं- देशभर पछिल्लो २४ घण्टामा गरिएकाे परिक्षणमा ९०७० जनामा कोरोना भाइरस संक्रमण पुष्टि भएको छ । स्वास्थ्य तथा...

गण्डकीका मुख्यमन्त्री गुरूङविरूद्धको अविश्वास प्रस्तावमा वैशाख २७ गते मतदान हुने
गण्डकीका मुख्यमन्त्री गुरूङविरूद्धको अविश्वास प्रस्तावमा वैशाख २७ गते मतदान हुने
  • २०७७ मंसिर १९, १६: २५: ३९

नयाँ विकल्प, काठमाडाैं-गण्डकी प्रदेश सरकारविरुद्ध विपक्षी दलहरुले ल्याएको अविश्वास प्रस्तावमा वैशाख २७ गते मतदान हुने भएको छ। प्रदेश सभा संचालनका...

वरिष्ठ गायक तथा संगीतकार प्रेमध्वज प्रधानको निधन
वरिष्ठ गायक तथा संगीतकार प्रेमध्वज प्रधानको निधन
  • २०७७ मंसिर १९, १६: २५: ३९

नयाँ विकल्प, काठमाडाैं-गायक तथा संगीतकार प्रेमध्वज प्रधानको निधन भएको छ। काठमाडौंको सुन्धारास्थित न्युरो अस्पतालमा उपचारको क्रमा बिहीबार दिउँसो उनको निधन...

भर्खरै

TOP