सन्दर्भः भारतको ७२ औं गणतन्त्र दिवस

भारतबाट साडे तीन करोड नगदसहित ५० पुस्तक र कम्वल वितरण

नयाँ बिकल्प,

काठमाडौं । काठमाडौंस्थित भारतीय राजदूतावासले भारतको ७२ औं गणतन्त्र दिवस जनवरी २६ को अवसरमा मंगलबार विविध कार्यक्रम गरी मनाएको छ ।

भारतीय दूतावासमा आयोजित विशेष समारोहमा नेपालका लागि भारतका राजदूत विनय मोहन क्वात्राले झण्डोत्तोलन गरी भारतको राष्ट्रिय झण्डा फहराउनुका साथै भारतीय राष्ट्रपतिको सन्देश पढेर सुनाएका थिए ।

सो दिवसको अवसरमा राजदूतद्वारा वीर नारी, मृतक सैनिकका श्रीमती र मृतक सैनिकका निकटतम नातेदारलाई तीन करोड ६८ लाख रुपैयाँ नगद तथा कम्मल वितरण गरी सम्मान गरिएको थियो ।

राजदूतावासले नेपालका ५० पुस्तकालय तथा शैक्षिक संस्थाहरुलाई पुस्तक उपहारस्वरुप प्रदान गरेको थियो । सो अवसरमा राजदूत क्वात्राले इंडिया हाउसमा स्वागत समारोहको आयोजना गरेका थिए ।

नेपालका परराष्ट्रमन्त्री प्रदीपकुमार ज्ञवाली सो समारोहको मुख्य अतिथिका रुपमा सरिक थिए । सो समारोहमा नेपालका भूतपूर्व राष्ट्रपति रामवरण यादवले सम्पर्क भारत –नेपाल एलुम्नी नेटवर्कका साथै सम्पर्क भारत नेपाल डट कम वेबसाइटको शुभारम्भ गरेका थिए ।

समारोहमा भारतमा अध्ययन गरेका नेपालका शीर्ष नेता, अधिकारी, पत्रकार तथा चर्चित व्यक्तित्वहरुको उपस्थिति थियो । भारत र नेपालबीचको जनस्तरको सम्बन्धलाई थप सुदृढ बनाउन उनीहरुले पुर्याएको योगदानलाई कदर गर्दै सम्मान गरियो ।

भारतीय राजदूतावासद्वारा आयोजित ‘मैत्री थ्रुु माई लेन्स’ फोटो प्रतियोगिताका तीन उत्कृष्ट प्रतियोगीलाई चेक तथा प्रमाणपत्र प्रदान गरियो ।