October 20, 2021, Wednesday

हामी आमचुनाव भन्दा पनि पार्टीको महाधिवेशनको लागी बढी केन्द्रित छौं

विद्यार्थी राजनीतिबाट खारिएका युवा नेता प्रकाश रसाइली स्नेही नेपाली कांग्रेसका सांसद् हुन् । उनी सालिन नेताको रुपमा चिनिन्छन् ।

सरकारका कमीकमजोरीलाई नजिकबाट नियालिरहेका उनी प्रधानमन्त्री केपी शर्मा ओलीमा नैतिकताको खडेरी परेको टिप्पणी गर्दछन् ।

यिनै समसामयिक विषयमा केन्द्रित रहेर सांसद रसाइली स्नेहीसँग नयाँ विकल्पल साप्ताहिकका लागि कालिका महतले गरेको कुराकानीको शारसंक्षेपः


नेपाली कांग्रेसको देश दौडाहा पार्टी महाधिवेशनको तयारी की आमचुनावको ?
नेकपालाई नेपाली जनताले दुई तिहाई हाराहारीमा मत दिएर सरकारमा पु¥याएका हुन् । देशमा संघीय सरकार पनि बन्यो । तर, नेकपाबाट ती जनताको मतमाथि ठूलो कुठाराघात भयो ।

त्यसकारण अहिले आमनेपाली जनताहरुले नेपाली कांग्रेसलाई आशा र भारोसाको केन्द्रमा राखेका छन् । त्यो आशा र भरोसालाई विश्वस्त पार्न हामी जनताको घरदैलो पुगेका हौं । अहिले देशैभरबाट अन्य पार्टी छोडेर नेपाली कांग्रेसमा प्रवेश गर्ने जनलहर बढिरहेको छ ।

त्यो अनुरुप नै अहिले हामी देशभरि रहेका पार्टीका नेता, कार्यकर्ताहरुबीच गइरहेका छौं । अहिले हामी आमचुनाव भन्दा पनि पार्टीको महाधिवेशन तयारीका लागि बढी केन्द्रित छौं ।

त्योसँगै कांग्रेसको पक्षमा जनमत निर्माण गर्ने पनि हाम्रो उद्देश्य हो ।

त्यसोभए तपाईंहरुको दौडाहा महाधिवेशन लक्षित हो ?
त्यसलाई महाधिवेशन लक्षित कार्यक्रम भन्दा पनि हुन्छ । त्योसँगै निर्वाचन लक्षित पनि दुवै हो ।

अब आम निर्वाचन पनि छिट्टै हुने सम्भावना भएको हो ?
आमनिर्वाचनको आवश्यकता भइसकेको छ । किन भने सधैं देश अस्थिरतातिर जानाले दीर्घकालीन विकासको काम हुन सकेन भनेर जनताले नेकपालाई झन्डै दुईतिहाइ मत दिएका थिए । त्यो विश्वास र भरोसालाई नेकपाले कुल्चने काम ग¥यो ।

देशलाई फेरि अस्थिरतातिर धकेल्ने गरी पार्लिमेन्टको परिकल्पना भयो । पार्टीको आन्तरिक कलह झांगिँदै गएर एकथरी सत्ता र अर्कोथरी सडकमा गएर गालीगलौजमा उत्रिए । जसको कारण मुलुकमा अस्थिरता सिर्जना भयो ।

अहिले वैधानिक रुपमा नभएपनि व्यवहारिक रुपमा नेकपा विभाजित भइसकेको छ । झन्डै एक वर्षदेखि सत्तासिन पार्टीले संसद्लाई अनिर्णयको बन्दी बनायो ।

यो अवस्थामा देशलाई गुमराहमा पार्नुभन्दा सबै दलहरुबीच राष्ट्रिय सहमति गरेर जनताबीच जानु नै राम्रो हुन्छ ।

संसद् पुनःस्थापनाले संविधानलाई लिकमा ल्याएकाले यसलाई टेकेर निर्वाचनमा जाँदापनि हुन्छ भन्ने कांग्रेसको भनाइ हो त ?
हाम्रो संविधानले संसद्बाट संविधान नबन्ने अवस्था भएमा निर्वाचनमा जान सकिन्छ भनेको छ । त्यो त संसद र राजनीतिक दललाई अधिकार छँदैछ ।

दोस्रो कुरा के भने संसद्भित्र रहेका राजनीतिक दलहरुबीच राष्ट्रिय सहमति गरियो भने त सबै दलहरु तयार हुन्छन् । त्यसपछि त निर्वाचनमा जान सकिहालिन्छ नि ।

नेपाली कांग्रेसले त अहिले जुन राजनीतिक शक्तिहरु छिटोभन्दा छिटो सहमतिबाट निर्वाचनमा जान तयार हुन्छन् । उनीहरुसँग सहकार्य गरेर अगाडि जाँदा राम्रो हुन्छ ।

तपाईं त विभिन्न जिल्लामा गइरहनुभएको छ, कांग्रेसप्रति कत्तिको जनआकर्षण पाउनुभएको छ नि ?
म जहाँजहाँ गएको छु त्यहाँ राम्रै प्रतिक्रियाहरु पाइराखेको छु । हालैमात्र सिन्धुली पनि गएँ । त्यहाँ पार्टीका केन्द्रीय नेता गगन थापा, श्याम श्रेष्ठ, डा. डिला संग्रौला पन्त पनि जानुभएको थियो ।कार्यक्रम सिन्धुलीको तीनपाटन गाउँपालिकामा भएको थियो ।

त्यहाँ नेकपालगायत अन्य पार्टीबाट कम्तिमा एक हजार हाराहारी नेता, कार्यकर्ता नेपाली कांग्रेसमा प्रवेश गरे । एउटा गाउँपालिकाको कार्यक्रममा एक हजार मान्छे प्रवेश गर्नु चानचुने कुरा होइन ।

त्यस्तो धेरै जिल्लाहरुमा भएको छ । जस्तो इलाम, पाँचथर, ताप्लेजुङ, हेटांैडालगायत धेरै जिल्लाहरुमा अन्य पार्टीबाट कांग्रेस प्रवेश गर्ने लहर देखेको छु ।

यी सबै दृश्यहरु हेरिरहँदा राजनीतिक स्थायित्व, संघीयता र लोकतन्त्र, समृद्धि र प्रेस स्वतन्त्रताको लागि अब कांग्रेस नै हो भन्ने नेपाली जनतामा छाप परिसकेको छ ।

यी लगायत मुलुकका जेजति परिवर्तनका विषय छन् । त्यसलाई पनि कांग्रेसले नै परिपूर्ति गर्न सक्छ भन्ने जनमानसमा भइसकेको छ ।

यसरी देशभरि जनलहर बढिरहेकाले महाधिवेशनको तयारी पनि गर्ने र निर्वाचनलाई पनि सँगै लिएर जाने भनेर कांग्रेस घनिभूत ढंगले लागि परेको छ ।

कम्युनिष्ट पार्टीहरुले विभिन्न बहानामा संसद्लाई अनिर्णयको बन्दी बनाइरहने र प्रधानमन्त्रीले पनि साँढे जस्तै मनलाग्दी बोल्दै हिड्ने प्रवृत्तिलाई जनताले रुचाएका छैनन् ।

अब संसद्बाटै राष्ट्रिय सहमति बनाएर निर्वाचनको लागी अगाडि बढ्नुपर्छ । त्यसले मात्रै देशलाई सही निकास दिन्छ भन्ने मेरो धारणा हो ।

प्रधानमन्त्रीले विघटन गर्नुभएको संसद् पुनःस्थापनापछि उहाँले नैतिकताको आधारमा राजीनामा दिनुपर्दैन, यहाँलाई के लाग्छ ?
प्रधानमन्त्री केपी शर्मा ओली जस्तो नैतिकताको खडेरी भएको मान्छेमा हामीले नैतिकताको खोजी गर्नु मूर्खता शिवाय केही हुँदैन ।

उहाँ जस्तो अराजक, असंवैधानिक, अलोकतान्त्रिक र अराजनीतिक व्यक्तिको टिकाटिप्पणी गरेर समय खेर फाल्नु उपयुक्त हुँदैन ।

उहाँ त लोकतन्त्र र लोकतान्त्रिक संविधानलाई मासेर सर्वसत्तावाद लाद्न उन्मुख भइसकेको व्यक्ति हो । यो मात्रै होइन प्रधानमन्त्री संवैधानिक, लोकतान्त्रिक मूल्य र मान्यतालाई पटक–पटक कुल्चेर अगाडि बढेको व्यक्ति हो ।

उहाँ राजनीतिक रुपले बहस गर्न योग्य हुनुहुन्न । त्यसैले उहाँका बारेमा बहस गरेर समय खेर फाल्न चाहन्न ।

अहिले नेकपा फुटिसक्यो भनिरहँदा कांग्रेसमा पनि भित्रभित्रै भुसको आगो जस्तो विभाजित मानसिकता देखिन्छ नि ?
त्यो त कम्युनिष्टहरुले चलाएको हल्ला मात्र हो । त्यसमा नेकपाले आफूहरु फुटिसकेपछि नेपाली कांग्रेसलाई लगाउने आरोप हो । कांग्रेस जस्तो लोकतान्त्रिक पार्टीमा आन्तरिक विचार, विमर्श, छलफल, बहस हुन्छन् ।

गुट, समूह भनेको विचारका आधारमा, तत्कालीन मुद्दाका आधारमा हुने हो । कसैले कसैका विचार मन पराउलान् । कसैले अर्कोको कुरा मन नपर्ला । फेरि महाधिवेशन सघारमा आइसकेको छ । महाधिवेशनमा बैठकद्वारा चुनाव हुन्छ ।

त्यसको लागि दुई समूह भइहाल्छ । फेरि नेपाली कांग्रेसमा गुट र समूह भएपनि कम्युनिष्टहरुको जस्तो सडकमा गएर अराजनीतिक ढंगले गाली, गलौज, आरोप प्रत्यारोप गर्ने काम हुँदैन ।

कांग्रेसमा सडकमै गएर एक नेताले अर्का नेताहरुको मानमर्दन गर्ने, अपमान गर्ने काम कसैले गरेको छैन र आउँदा दिनमा पनि त्यस्तो हुँदैन ।

महाधिवेशनमा पनि स्वस्थ प्रतिस्पर्धा हुन्छ । अहिले हामो पार्टीको महाधिवेशन हुँदैछ । त्यसमा एकअर्का नेताको सम्मान गर्दै स्वस्थ प्रतिस्पर्धामा चुनाव गराउने हो । नेपालमा मात्रै होइन संसारभरिका लोकतान्त्रिक पार्टीभित्र समूह, गुटहरु हुन्छन् ।

ती विधानसम्मत र मर्यादित ढंगले अगाडि बढ्छन् । आपसमा छलफल विचार, विमर्श गरेर अगाडि बढ्ने हो । हिजो वीपीको विचारसँग सहमत हुनेहरु उहाँसँग थिए ।

सुवर्ण शमशेरसँग सहमत हुनेहरु उहाँसँग थिए, किसुनजी र गणेशमानसँग स्वभाव मिल्ने मान्छेहरु उहाँहरुसँग थिए । गिरिजाबाबुसँग स्वभाव मिल्ने मान्छेहरु उहाँसँग थिए ।

जो नेतासँग बढी जेलमा सँगै बसेर सामिप्यता बढ्छ त्यसको आधारमा गुट बन्छन् । कोही विचार र दृष्टिकोणका आधारमा उनका पक्षमा उभिन्छन् ।

यसरी लोकतान्त्रिक पार्टीभित्र धेरै कारणले गुट र समूहहरु निर्माण भएका हुन्छन् । त्यसको आधारमा लौ फुटिनै सक्यो भनेर चिच्याउनु सान्दर्भिक हुँदैन ।

त्यसोभए राष्ट्रिय मुद्दामा कांग्रेस एकढिक्का छ त ?
राष्ट्रिय मुद्दामा कांग्रेस एक ढिक्का छ । पार्टीलाई देशव्यापी रुपमा एक बनाएर अगाडि बढ्नेमा कांग्रेस एकढिक्का छ । महाधिवेशन समयमा गराउन कांग्रेस एकढिक्का छ ।

संविधान जोगाउने, मुलुकलाई समृद्ध बनाउन, मुलुकलाई सुशासन दिलाउन र कानुनी राज्य स्थापना गराउन कांग्रेस एकढिक्का भएर अगाढि बढेको छ ।

लोकतान्त्रिक गणतन्त्रलाई स्थायित्व दिन, संघीयतालाई दर्बिलो बनाउन पूर्ण नागरिक अधिकार प्रेस स्वतन्त्रताका लागि कांग्रेस एक भएर अगाढि बढ्ने छ ।

कांग्रेस नेतृत्व त सत्तामा जान अत्तालियो भन्ने आरोप छ नि ?
कांग्रेसलाई सत्तामा कसैले पु¥याएर जाने होइन । वीपीले भन्नुभएको छ, ‘मेरो लागि प्रधानमन्त्री पद खुट्टाको जुत्ता सहर हो’ भनेर । हामी अरुलाई प्रधानमन्त्री, राष्ट्रपति बनाउने पार्टी हो ।

कम्युनिष्टले बनाएर प्रधानमन्त्री, राष्ट्रपति बन्ने पार्टी होइन । नेपाली कांग्रेस आफ्नै राजनीति मुद्दाको आडमा जनताको बहुमत लिएर सत्तामा पुग्ने हो । हामी चुनावबाट जनताको विश्वास जितेर दुई तिहाई बहुमत ल्याएर प्रधानमन्त्री, राष्ट्रपति बन्छौं ।

कथमकदाचित परिबन्दमा परेर नेतृत्व लिनुप¥यो भने त्यो फरक विषय हो । अहिले नै सत्तामा जानका निम्ति कत्तिपनि उत्साहित छैनौं ।

अहिले पनि कम्युनिष्ट पार्टी मिलेको हेर्न चाहन्छौं । उहाँहरु जनतासामू लोकप्रिय भएको हेर्न चाहन्छौं ।

अझ उहाँहरु दुईवटा पार्टी मात्रै होइन विप्लब, वैद्य, चित्रबहादुर केसी, सीपी मैनाली सबै मिल्नुहोस् । त्यसरी मिलेको पार्टीसँग नेपाली कांग्रेस मुकाविला गरेर बहुमत ल्याउन तयार छ ।

अब कांग्रेस एक्लैले कम्युनिष्टसँग मुकाबिला गर्न सक्छ ?
कम्युनिष्टहरु फुटेका छन्, अब हामी जित्छौं भनेर अत्तालिएर हाफपाइन्टमै दौडेर चुनावमा जाँदैनौं ।

सबै कम्युनिष्ट मिलेर आएपनि उनीहरुसँग मुकाविला गर्ने कांग्रेस हामी बनाउँछौं । त्यो बनाउने कुरामा हामीहरु सक्षम छौं । त्यसैले कम्युनिष्ट पार्टी फुटेको छ भनेर कांग्रेस चुनावमा जान लागेको छैन । सबै मिलेर आए हुन्छ ।

कांग्रेसलाई चुनाव जित्न कुनै दलसँग कार्यगत एकता गर्नुपर्दैन हो ?
चुनाव जनताको बलमा जितिने हो । अहिले जनताले कांग्रेसप्रति ठूलो आशा भरोसा राखेका छन् । त्यो दिलाउन कांग्रेस तयार छ ।

लोकतान्त्रिक पार्टी जहिले पनि जनतामा विश्वास गर्दछ । अहिले जनतामा कांग्रेसप्रति अकर्षण बढेको छ । त्यसको सम्बोधन कांग्रेस गर्न सक्छ ।

कांग्रेस प्रवेश गरेर आउनेले कस्तो अपेक्षा राखेको पाउनुभयो ?
हिजो माओवादी जनयुद्धमा लडाकु भएर हिँडेका नेकपाका स्थानीय नेता, कार्यकर्ताहरु पनि नेपाली कांग्रेसमा प्रवेश गर्नुभएको छ । नेकपाबाट जनप्रतिनिधि भइसकेका साथीहरु पनि हाम्रो पार्टीमा प्रवेश गर्नुभएको छ ।

उहाँहरुले ‘हिजो हामी कम्युनिष्टहरुको भ्रममा प¥यौं, जसरी हिजोका दिनमा हामीलाई कम्युनिष्टका सिद्धान्त, विचार, दृष्टिकोण प्रवाह गरेका थिए, त्यो सत्तामा गएपछि बिर्सिए,’ भन्नुभएको छ ।

कम्युनिष्टहरु न जनताको परिवर्तनको पक्षमा उभिन सके, न गरीव निमुखाको आवाज मुखरित गर्न सके, न हिजो हामीसँग बोलेका बाँचाहरु पुरा गर्न सके, न नेताहरुको चरित्र राम्रो देखियो ।

नेपाली कांग्रेस पार्टीले ‘जे बोल्दो रहेछ, त्यो गर्दोरहेछ र जे गर्दोरहेछ, त्यो बोल्दोरहेछ, जनतालाई भ्रममा नराख्ने पार्टी नेपाली कांग्रेस रहेछ त्यसैले नेपालको पुरानो ऐतिहासिक पार्टी कांग्रेसमा आएका छौं,’ भनेका छन् ।

तिनीहरु निशर्त कांग्रेस प्रवेश गरेका हुन् ?
उहाँहरु निशर्त ढंगले प्रवेश गर्नुभएको हो । अहिले कांग्रेसले के नै दिन सक्छ र । अहिले हामी प्रतिपक्षमै छौ ।

धेरै, गाउँपालिका, नगरपालिका प्रदेश र संघमा पनि हाम्रो प्रतिनिधित्व छैन । अनि अहिले कांग्रेसले के दिन सक्छ ? त्यसैले बिना लोभलालच राजनीतिक स्थायित्वको लागि कांग्रेसप्रति जनआकर्षण बढेको हो ।

दलित, जनजाति, अल्पसंख्यक, उत्पीडितहरु कम्युनिष्टमा थिए ती समुदाय कांग्रेस किन आए जस्तो लाग्छ ?
जनयुद्धमा होस् या शान्तिपूर्ण आन्दोलनमा होस् । नेकपा एमाले र तत्कालीन माओवादी दुईवटा पार्टीले जे–जुन मुद्दा दलित, जनजाति, मधेसी, अल्पसंख्यक, उत्पीडित, लैंगिक हिंसा, राजनीतिक र व्यवहारिक विभेद, वर्गीय विभेदलगायत विभिन्न नाममा कम्युनिष्टहरुले मुद्दा उठाएका थिए ।

ती मुद्दाहरु उनीहरु सत्तामा गइसकेपछि छोडेर आफ्नो स्वार्थमा लागे । कम्युनिष्ट एउटा इलिट समुदाय भएर सम्भ्रान्त बन्न थाले । आफै सामन्त बन्न थाले । त्यसैले कम्युनिष्टहरुले माथि झुठको खेती गरेका रहेछन् भनेर ती समुदाय नेपाली कांग्रेसमा प्रवेश गरेका हुन् ।

आज माक्स र लेनिन जन्मेको देशमा लोकतन्त्र स्थापित भइसकेको छ । कम्युनिष्ट नेता जन्मेको देशमा त उनीहरुको शासनसत्ता छैन भने उनीहरुको फोटो राखेर नेपालमा राजनीतिक गर्ने नेताले के काम गर्न सक्छन् ? त्यसैले हामी कांग्रेसमा प्रवेश गरेको भन्ने उनीहरुको भनाइ छ ।

सम्बन्धित समाचार

जेसुकै भनून्, एमसीसी नेपालको हितमा छःप्रधानमन्त्री देउवा
जेसुकै भनून्, एमसीसी नेपालको हितमा छःप्रधानमन्त्री देउवा
  • २०७७ फाल्गुन २४, १५: १६: २६

काठमाडौं । सरकारलाई सर्वोच्च अदालतको परमादेश र जनादेश दुवै प्राप्त भएको प्रधानमन्त्री शेरबहादुर देउवाले बताएका छन् ।सञ्चारकर्मीसँग कुराकानी गर्दै नेपाली...

नकुन्नी हत्या प्रकरण छानबिन गर्ने सरकारकाे निर्णयपछि रुबीले तोडिन आमरण अनसन
नकुन्नी हत्या प्रकरण छानबिन गर्ने सरकारकाे निर्णयपछि रुबीले तोडिन आमरण अनसन
  • २०७७ फाल्गुन २४, १५: १६: २६

काठमाडौं । नेपालगञ्जकी नकुन्नी धोवीको हत्या प्रकरणका दोषीलाई कारबाहीको माग गर्दा बाँकेको प्रहरी प्रशासनले किटानी जाहेरी नै नलिएपछि राजधानीको माइतीघरमा...

माओबादी केन्द्रले बनायो तीन आयोग, दुई समिति र एक मञ्च
माओबादी केन्द्रले बनायो तीन आयोग, दुई समिति र एक मञ्च
  • २०७७ फाल्गुन २४, १५: १६: २६

काठमाडौं । सत्तारुढ नेकपा माओवादी केन्द्रले पार्टीको केन्द्रीय तहमा तीनवटा आयोग, दुई वटा समिति र एक ज्येष्ठ कम्युनिस्ट मञ्च गठन...

Happy Dashain