काठमाडौंमा तीन सय ८८ संक्रमित थपिए

कोरोनाबाट बुधबार थप १२ को मृत्यु, मृतकको सख्या अढाइ सय नाघ्यो

नयाँ विकल्प,

काठमाडौं ।नेपालमा कोरोना भाइरसको संक्रमणका कारण बुधबार दिउँसो ४ बजेसम्म थप १२ जनाको मृत्यु भएको छ ।

स्वास्थ्य तथा जनसंख्या मन्त्रालयलेले थप १२ सहित कोरोनाबाट मृत्यु हुनेको सख्या नेपालमा दुई सय ५१ पुगेको पुष्टि गरेको छ ।

स्वास्थ्य मन्त्रालयका प्रवक्ता डा. जागेश्वर गौतमले मृत्यु हुनेमा ६ महिला र ६ पुरुष छन् । जसमा चितवनकी १८ र ५५ वर्षे दुई महिला, काठमाडौंकी ८९ वर्षे महिला, ललितपुरकी ७० वर्षे महिला, तनहुँकी २० वर्षे महिला, कपिलवस्तुकी ६० वर्षे महिला छन् ।

त्यस्तै वाराका ५७ वर्षे पुरुष, चितवनका ६५ वर्षे पुरुष, भक्तपुरका ४० वर्षे पुरुष, काठमाडौंका ७० र ७५ वर्षे दुई पुरुष र धादिङका ४७ वर्षे पुरुषको मृत्यु भएको छ । योसँगै नेपालमा कोरोना संक्रमणबाट मृत्यु हुनेको संख्या २५१ पुगेको हो ।

मन्त्रालयले कूल संक्रमितमध्ये ० दशमलव ६ प्रतिशतको मात्र निधन भएको दाबी गरेको छ ।

मंगलबार ११ को कोरोनाले मृत्यु भएको थियो । मंगलबार पर्षाका तीन जनाको, काठमाडौंका दुई जनाको, महोत्तरीका दुई जनाको, सिराहाका एक जनाको, बाराका एक जना, चितवनका एक जना, र मकवानपुरका एक जनाको निधन भएको थियो ।

काठमाडौंमा तीन सय ८८ संक्रमित बुधबार थपिए

मन्त्रालयका अनुसार पछिल्लो २४ घण्टामा काठमाडौं उपत्यकामा थप तीन सय ८८ जनामा कोरोना संक्रमण पुष्टि भएको छ । काठमाडौं जिल्लामा तीन सय ५० जना, ललितपुर जिल्लामा २९ जना र भक्तपुर जिल्लामा नौ जना गरी तीन सय ८८ जना संक्रमित थपिएका हुन् ।

मंगलबार काठमाडौंमा तीन सय ९३, ललितपुरमा ५८ र भक्तपुरमा ३० जना गरी चार सय ८१ जना संक्रमित थपिएका थिए । मुलुकभर सक्रिय संक्रमितको संख्या १८ हजार एक सय आठ रहेको स्वास्थ्य मन्त्रालयले जनाएको छ ।