बाँकी जीवन तपाईंले देखेको सपनालाई पूरा गर्छु

नयाँ विकल्प संवाददाता
प्रकाशित मिती: २०८२ मंसिर १८, १२: १९

काठमाडौं । चर्चित काठमाडौं महानगरपालिकाका मेयर बालेन शाहले आफ्ना पिता डा. रामनारायण शाहको निधन हुँदा निकै भावविह्वल हुँदै सामाजिक सञ्जालमा लेखेको स्टाटसले युवा पुस्तालाई झस्काएको छ । जसले प्रत्येक युवाले आफ्नो बुवाआमाप्रतिको श्रद्धालाई उजागार गरेको छ ।

उनले आफुलाई जन्म दिनेदेखि कर्मदिने बुवाप्रति जीवनकै सबैभन्दा ठूला रिक्तता महसुस गरेका छन् । कुशल सन्तान बनाउन आफ्ना पिताले जिन्दगीभर गरेको संघर्ष उनले पाँचै हरफमा दर्शाएका छन् ।

आजको दिन मेरो जीवनकै सबैभन्दा ठूलो रिक्तता लिएर आएको छ ।
बुबा… तपाईं अब शारीरिक रूपमा मेरो साथमा हुनुहुन्न, तर तपाईंले रोपिदिनुभएको अनुशासन, मूल्य, कामप्रतिको इमानदारी र समाजप्रतिको प्रेम यी सबै मेरो श्वासझैँ मेरो भित्री संसारमा बाँचिरहेका छन् ।
मैले आजसम्म उठाएको प्रत्येक कदम तपाईंको कुरा सम्झेर चालें, मैले बोलेका प्रत्येक वाक्य तपाईंको शिक्षा सम्झेर बोलें, र अब बाँकी जीवन तपाईंले देखेको सपनालाई पूरा गर्न समर्पित हुनेछ ।

पिता रामनारायण शाहको मंसिर १५ गते नयाँ बानेश्वरस्थित सिभिल अस्पतालमा ७७ वर्षको उमेरमा निधन भएको थियो ।

उनी लामो समयदेखि मधुमेहका बिरामी भएका थिए । पछिल्लो समय पिसाब संक्रमण सम्बन्धी समस्याले ग्रस्त भएका कारण अस्पताल भर्ना गरिएको थियो । चिकित्सकको लामो प्रयास विफल भएपछि उनको १५ गते मध्याह्न १२ बजेर २० मिनेटमा चिकित्सकले मृत घोषणा गरेको थियो । यसअगाडि प्रधानमन्त्री सुशीला कार्कीलगायत सरकारका मन्त्री, नेता, समर्थकहरू ठूलो मात्रामा अस्पतालदेखि आर्यघाटसम्म पुगेका थिए ।

त्यसगरी, सुरक्षा निकायका दानबहादुर कार्कीलगायत अन्य सुरक्षा निकायका विशिष्ट व्यक्तिहरु पनि पशुपति आर्यघाटमा पुगेर श्रद्धाञ्जली अर्पण गरेका थिए । साथै यस दुःखद निधनप्रति यस मिडिया प्रा.लि. पनि हार्दिक समवेदना प्रकट गर्दछ ।