प्रधानमन्त्री देउवाद्वारा लैनचौरस्थित सहिद स्तम्भमा माल्यार्पण

काठमाडौं । माघ १६ अर्थात सहिद दिवसको अवसरमा काठमाडौं महानगरपालिकाले आयोजना गरेको कार्यक्रममा सहभागी भएर प्रधानमन्त्री शेरबहादुर देउवाले काठमाडौंको लैनचौरस्थित सहिद स्तम्भमा माल्यार्पण गरेका छन् ।

ज्ञातअज्ञात सहिदहरुप्रति सम्मान व्यक्त गर्दै आइतबार बिहान शान्तिवाटिका रत्नपार्कबाट सहिद स्मारक लैनचौरसम्म प्रभातफेरी गरिएको थियो ।

विहानको प्रभातफेरी कार्यक्रममा विभिन्न राजनीतिक दलका नेता, सरकारी कर्मचारी, सुरक्षाकर्मीलगायत सम्पूर्णको सहभागीता रहेको काठमाडौं महानगरले जनाएको छ ।

कोभिड–१९ को नयाँ भेरियन्ट अमिक्रोनको संक्रमम बढीरहेको अवस्थामा सरकारले गरेको स्वास्थ्य सुरक्षा मापदण्डहरु पूर्ण रुपमा पालना गर्दै सहिद दिवसको कार्यक्रम औपचारिकतामा सीमित गरिएको काठमाडौं महानगरपालिकाले जनाएको छ ।

नेपालको हरेक राजनीतिक परिवर्तनमा विभिन्न कालखण्डहरुमा वीरगति प्राप्त गर्ने वीर सहिदहरूको स्मरणमा विक्रम संवत् २०१२ देखि काठमाडौं महानगरपालिकाको संयोजनमा माघ १०–१६ गते सम्म ‘सहिद सप्ताह’ मनाउने गरिएको छ ।