भारतको सहयोगमा निर्माण भएको ताप्लेजुङ्गको सिनाम उच्च माध्यमिक विद्यालय भवनको उद्घाटन

नयाँ विकल्प संवाददाता
प्रकाशित मिती: २०७८ चैत्र ७, १७: ४६

काठमाडौं । भारत सरकारको अनुदान सहयोगमा ताप्लेजुङ्ग जिल्लाको सिनाममा निर्मित श्री सिनाम उच्च माध्यमिक विद्यालय भवनको उद्घाटन भएको छ । आइतबार प्रतिनिधि सभाका सांसद योगेश भट्टराई, संविधानसभा सदस्य भुपेन्द्र थेवे र भारतीय राजदूतावासका प्रथम सचिव रोहित मिश्राले भारत सरकारको अनुदान सहयोगमा ताप्लेजुङ्ग जिल्लाको सिनाममा अवस्थित श्री सिनाम उच्च माध्यमिक विद्यालयको नवनिर्मित भवनको संयुक्त रुपमा उद्घाटन गरेका हुन् ।

उक्त भवन निर्माण परियोजना भारत सरकारले भारत स्वतन्त्र भएको ७५ वर्षको उपलक्ष्यमा “क्ष्लमष्ब२ठछ आजादीका अमृत महोत्सव” अन्तर्गत नेपालमा उद्घाटन गरिने ७५ वटा परियोजनाहरु मध्येको एक हो । ‘भारत–नेपाल विकास सहकार्य’ कार्यक्रम अन्तर्गत भारत सरकारको अनुदान सहयोगमा कुल नेरु ३ करोड १० लाखको लागतमा उक्त दुई तले भवनको निर्माण भएको हो । सन् १९५० मा स्थापना भएको यस विद्यालयमा हाल १६०० जना विद्यार्थी अध्ययनरत छन् ।

भारत सरकारले सन् २००३ यता नेपालमा ५२३ भन्दा बढी उच्च प्रभाव सामुदायिक विकास परियोजनाहरु अघि बढाइसकेकोमा छ । जसमध्ये अहिलेसम्म कूल ४६७ वटा सम्पन्न भइसकेको भारतीय दुतावासले जनाएको छ । भारतले नेपालमा अघि बढाएका परियोजना मध्ये ताप्लेजुङ्गका २ गरी प्रदेश १ मा ७८ वटा रहेको र यसका अतिरिक्त भारत सरकारले ताप्लेजुङ्ग जिल्लाका विभिन्न स्वास्थ्य चौकीलाई हालसम्म ७ वटा एम्बुलेन्स उपहार स्वरुप प्रदान गरिसकेको जनाएको छ ।

भवन उद्घाटन समारोहमा स्थानीय सरकारका प्रतिनिधि, स्थानीय समुदायका अगुवा, शिक्षक–शिक्षिका, अभिभावक, छात्र–छात्रा लगायतको उल्लेखनीय उपस्थिति रहेको थियो ।