चाडपर्व विशेष: बजार अनुगमनलाई तीव्रता

नयाँ विकल्प संवाददाता
प्रकाशित मिती: २०७९ आश्विन १२, २०: २०

नयाँ विकल्प,

काठमाडौं – दसैँ र तिहारको समयमा उपभोक्तालाई ठगिन नदिन भन्दै सरकारले बजार अनुगमनलाई तीव्रता दिएको छ । प्रधानमन्त्री शेरबहादुर देउवाको निर्देशनमा बजार अनुगमन तीव्र तुल्याइएको हो । वाणिज्य विभागको नेतृत्वमा ६ वटा सरकारी निकायको संयुक्त १० वटा टोलीले दसैँ र तिहार लक्षित बजार अनुगमन गरिरहेको विभागका महानिर्देशक महेश भट्टराईले जानकारी दिए । उनले चाडपर्व लक्षित बजार अनुगमनमा वाणिज्य विभागले नेतृत्व गरिरहेको र यसमा स्थानीय तहको समेत सहभागिता रहेको जानकारी दिए ।

वाणिज्य विभागसँगै, पशु सेवा विभाग, यातायात व्यवस्था विभाग, औषधि व्यवस्था विभाग, नेपाल गुणस्तर तथा नापतौल विभाग र खाद्य प्रविधि तथा गुण नियन्त्रण विभागको संयुक्त टोली फिल्डमा खटिएको भट्टराईको भनाइ छ । यसबाहेक, वाणिज्य विभागको टोलीले दैनिक बजार अनुगमनसमेत गरिरहेको उनले बताए ।

उनका अनुसार दसैँ र तिहारको समयमा उपभोक्तालाई ठगिन नदिनलाई सरकार लागिपरेको छ । विशेषगरी दसैँ र तिहारको समयमा व्यापारीहरूले कालोबजारी गर्ने, मूल्यवृद्धि गर्ने र उपभोक्तालाई विभिन्न बहानामा ठग्ने गर्छन् ।