अनुसन्धान मानिसको मुख होइन, तथ्य र प्रमाणका आधारमा हुन्छः गृहमन्त्री लेखक

नयाँ विकल्प संवाददाता
प्रकाशित मिती: २०८१ कार्तिक १२, १६: ४०

काठमाडौं। गृहमन्त्री रमेश लेखकले आपराधिक घटनाका कुनै पनि अनुसन्धान गर्दा कुनै मानिसको मुख हेरेर नभई तथ्य र प्रमाणका आधारमा हुने बताएका छन्।

संसद्को राज्य व्यवस्था तथा सुशासन समितिको सोमबारको बैठकमा गृहमन्त्री लेखकले तथ्य र प्रमाणका आधारमा अपराधजन्य कार्यहरूको अनुसन्धान हुने बताएका हुन्।

‘अपराधजन्य कार्यहरू भ्रष्टाचार होस् या ठगी गर्ने सबै मानिसमाथि अनुसन्धान हुन्छ र हुनुपर्छ। कसैलाई काखापाखा हुँदैन। सत्तापक्ष र प्रतिपक्ष भनेर हेरिँदैन’, गृहमन्त्रीले भने, ‘कुनैपनि आपराधिक कार्यको अनुसन्धान, मानिसको मुख होइन तथ्य र प्रमाण हेरेर कारबाही गरिन्छ।’

राष्ट्रिय स्वतन्त्र पार्टी (रास्वपा) सभापति रबी लामिछानेलाई सरकारले राजनीतिक प्रतिशोधका आधारमा सहकारी ठगी प्रकरणमा पक्राउ गरेर थुनेको भनेर प्रचारबाजी भइरहेको प्रति संकेत गर्दै गृहमन्त्री लेखकले यस्तो प्रस्टीकरण दिएका हुन्।

उनले भने ‘प्रमाण जताजता जान्छ र त्यतैत्यतै अनुसन्धान हुने र भइरहेको पनि छ।’

सरकारले गर्ने अनुसन्धान निष्पक्ष र स्वतन्त्र हुने भन्दै न्यायालयको अनुमति लिनुपर्ने बेलामा न्यायालयको समेत अनुमति लिएर सरकारले गर्ने गरेको उनले बताए। उनले सरकार कानुनभन्दा बाहिर नजाने पनि स्पष्ट पारे।