खस भासं ‘नेपाल संवत् व भिन्तुना आन्दोलन’ सफू पिदन

नयाँ विकल्प संवाददाता
प्रकाशित मिती: २०८१ कार्तिक १६, १४: ५८

कौलागा : नेपाल भाषाया नांदंम्ह च्वमि व अधिकारकर्मी मल्ल के। सुन्दरं च्वयादिउगु ‘नेपाल संवत् व भिन्तुना आन्दोलन’ सफू नेपाली भासं अनुवाद जुया पिदंगु दु ।

न्हूँद ११४४ राष्ट्रिय समारोह समितिया आग्रहलय् भाषिक अभियानकर्मी मल्लं अभिलेखीकरण यानादिइगु सफूया नेपाली भाषानुवाद जुया पिदंगु थुगु सफूया चिकिफ्यने ज्या बाखँच्वमि हितकरवीरसिंह कसाः, न्हूदँ राष्ट्रिय संरक्षण समाजया कजि प्रा डा नरेश मान बज्राचार्य, न्हूँद राष्ट्रिय समारोह समितिया नायः राजेन्द्र श्रेष्ठ, नेवाः देय् दबूया नायः पत्रि बज्राचार्य व च्वमि डा पुष्पराज राजकर्णिकारपिंसं मंकाः कथं थौ थन जूगु छगू ज्याझ्वलया दथुइ यानादिउगु खः । भाजु राकेश महर्जनजुं नेपाली भासं थुगु सफूया भाय् हिलादिउगु खः ।

सफूया विषयलय् न्ववासे न्हूदँ समारोह समितिया नायः भाजु श्रेष्ठं नेपाल संवत्यात सरकारपाखें मान्यता बियेकेगु ज्या तालागु धइगु संघीयताया हुनिं खः, संघीयता धइगु संरचना जक मखु, थी थी समुदाययात राज्यया हरेक निकायलय् हिस्सेदारी बिइगु व स्रोत बाँडफाँडपाखें सशक्तीकरण यानायंकेगु सिन्द्धान्त नं खः, उकिं संघीयता ज्या मवः धइजुइगु पाय्छि मजु धयादिल ।

बाखँ च्वमि कसाःजुं भाषा व संस्कृतियात ल्यंकातयेत प्रतिबन्धित इलंनिसें नेवाः न्ह्यलुवातय्सं आन्दोलन यानावयाच्वंगु लुमंकूसें न्हू दँ शुरु जुइगु म्हः पुजाया दिँ थःत पुजा यायेगु धइगु विश्वया सम्पूर्ण मानव व प्राणी मात्रयात लुमंका सम्मान देछायेगु नेवाः तजिलजि खः धयादिल ।

न्हू दँ संरक्षण समाजया कजि बज्राचार्य नेपाल संवत् व भिन्तुना आन्दोलनया वंखँ नेवाः समुदाय दथुई स्वयां नं प्रशासक, पार्टी कार्यकर्ता, सञ्चारकःमि व गैरनेपाल भाषीतये दथुइ ब्याकेमाःगु खँ कुलादिल ।

च्वमि मल्ल के सुन्दरं नेपाल संवत् व भिन्तुना आन्दोलननाप स्वानाच्वंगु लोककल्याणकारी दर्शन व सामाजिक मूल्ययात समाजय् न्यंका यंकेमाःगुलिइ बः बियादिल । थ्व सफू कन्हय् बसन्तपुलिई जुइगु भिन्तुना ज्याझ्वलय् मूपाँहा लिसेंं ब्वतिकाइपि सकलसित देछाइ धाःगु दु ।