सर्वदलीय बैठकको औचित्य

नेपालको संविधान २०७२ अनुसार आम निर्वाचन पश्चात् बनेको सरकारले सत्र महिनापछि गएको हप्ता सर्वदलीय बैठक बोलायो । निर्वाचनताका दुई ठुला दलको एकीकरणपछि बनेको सरकारको नेतृत्व पार्टी अध्यक्ष केपी शर्मा ओलीले गरिरहेका छन् ।

सत्र महिनापछि बोलाइएको सर्वदलीय बैठकमा सरकारको नेतृत्व गरिरहेका केपी शर्मा ओलीले राजावादी समूह र सरकारद्वारा प्रतिबन्धित गरिएका विप्लव समूहको गतिविधिबारे सर्वदलीय बैठकमा जानकारी गराएपछि साझा धारणा बनाउन आग्रह गरे ।

यसले गर्दा के मुलुक साँच्चैनै राजनीतिक अराजकतातिर धकेलिएको महसुस भएको हो ? दुईतिहाईबाट निर्माण भएको यो सरकार यति चाडै कमजोर मानसिकतामा पुग्नु भनेको नेपालको राजनीतिक परिस्थिति सहज छैन भन्नेतिर लक्षित भएको देखिन्छ ।

किनकी सरकार निर्माण भएदेखि करीब पन्ध्र महिनासम्म प्रतिपक्षीलाई गाली–गलौज गर्ने र संविधानअनुसार बनाउनु पर्ने नयाँ ऐनहरु निर्माण गरी संसद्बाट पास गराउनुपर्ने अधिकांश विधेयकहरु विवादीत बन्दै गएका कारण पनि अहिले राष्ट्रमाथि राजनीतिक अफ्ठ्याराहरु सिर्जना हुँदै गएका हुन् ।

सरकार निर्माण पश्चात् ठुला–साना दल तथा प्रतिपक्षीलाई अति गाली–गलौज र उखान टुक्का हालेर पन्ध्र महिनासम्म समय वर्वाद गर्ने सरकारले पछिल्लो समय राजनीतिक गतिविधीको मूल्यांकन गरेर सर्वदलीय बैठक बोलाउनु सकारात्मक पक्ष भएपनि यो परिस्थिति निर्माण हुनुमा स्वयम् सरकारनै बढी जिम्मेवार देखिन्छ ।

नेपालको राजनीतिक परिस्थितिलाई हेर्ने हो भने हिजोका दिनमा पनि बहुमतका सरकारहरु पुरा समयावधि टिक्न नसकेको राजनीतिक घटनाक्रमले देखाउँछ । तथापि सरकार निर्माण र पार्टी सञ्चालन फरक कुरा हुन् । जुनसुकै पार्टीबाट सरकारको नेतृत्व गरेपनि सरकार सबै नेपालीहरुको हुन सक्नुपर्छ । तर नेपालका अधिकांश प्रधानमन्त्रीहरु नेपाली जनताभन्दा आफ्ना पार्टीका नेता, कार्यकर्ता तथा परिवार भन्दामाथि उठ्न नसकेको तितो यथार्थता नेपाली राजनीतिले भोग्दै आएको छ ।

पार्टी सञ्चालनमा पक्षपात गर्ने रोग नेपालको सबै दलहरुमा देखिदै आएको छ । यसले गर्दा पनि पार्टीभित्र गुटहरुको जन्म हुने र नेता–नेताहरुबीच नै सत्ताका लागि राजनीतिक सिद्धान्त भन्दा बाहिर गएर जुनसुकै हतकण्डा प्रयोग गर्ने परिपार्टीका कारण चाहे बहुमतको होस्, चाहे दुईतिहाईको सरकार नै किन नहोस्, सँधै धर्मराउने परिस्थिति निर्माण भईरहेको छ ।

अहिले पनि त्यही नियति नेपाली जनताले भोगिरहेका छन् । निर्वाचनदेखि वर्तमान अवस्थासम्म दुई पार्टी एकीकरणको व्यवस्थापन गर्न नसक्दा सिंगो राष्ट्र अलमलिएको छ । राष्ट्रको जिम्मेवार व्यक्ति सँधै पार्टी व्यवस्थापनमा रुमलिएको, सरकारका मन्त्रीहरु पद जोगाउन गुट र उपगुटको नेतृत्वकर्तालाई रिजाउनै व्यस्त भएको कारण जिम्मेवार मन्त्रालयहरुबाट निस्कने रणनीति समेत रुमलिन पुग्दा राजनीतिक परिस्थिति बिग्रन पुगेको हो ।

यतिमात्र नभएर जिम्मेवार मन्त्रालय सम्हालेर बसेका मन्त्रीहरुले बाह्य शक्ति र आन्तरिक शक्ति सन्तुलनमा काखापाखा गरेका कारण पनि दोस्रो जनआन्दोलनबाट राजसंस्था दरबारबाट विधिवत् रुपमा हटिसकेको राजावादीहरु सक्रिय हुन् थालेको देखिन्छ । तथापि हिजोका परिवर्तनकारी राजनीतिक सहयात्रीहरुलाई समेत पन्छाउने रणनीतिका कारण नेपालको राजनीतिक परिस्थिति जटिल बन्दै गएको हो ।

त्यसैले दुई तिहाईको सरकारले दुई तिहाईके दम्भ त्याग्न र सरकार सबै नेपालीको हो भन्ने भावना जगाउँदै नेपालका राजनीतिक दलहरुसँगको सहयात्रालाई निरन्तरता दिन सके मात्र सर्वदलीय बैठकको औचित्य प्रमाणित हुन्छ ।