नेप्सेमा ९४ अंकको सुधार

नयाँ विकल्प संवाददाता
प्रकाशित मिती: २०७९ असार १२, १६: ४४

नयाँ विकल्प,

काठमाडौं – आज आइतबार नेपाल स्टक एक्सचेञ्ज (नेप्से) मा ९४ अंकको सुधार आएको छ । कारोबार समयदेखि बढ्न थालेको नेप्से परिसूचक १ हजार ९ सय ५६ अंकमा पुगेर बन्द भएको छ ।

आज नेप्सेमा २ अर्ब १९ करोड रुपैयाँभन्दा धेरैको कारोबार भएको छ । यसक्रममा ६३ लाख ६३ हजार कित्ता सेयर किनबेच भएको छ ।
आजको कारोबार रकमभन्दा त्यसअघि साताका ५ कारोबार दिनमा भने नेप्से परिसूचक घटेको थियो ।

नेप्सेमा झण्डै १०० अंकको उछाल आएको दिन सबै समूहमा सुधार आएको छ । यसमध्ये जीवन बीमा समूहमा ३६६ अंक, निर्जीवन बीमा समूहमा ३६२ अंकको सुधार आएको छ । यसैगरी, उत्पादनमूलक समूहमा २८४ अंकको र विकास बैंक समूहमा २५७ अंकको सुधार आएको छ ।
यसका साथै लघुवित्त समूहमा २३१ अंकको वृद्धि आउँदा जलविद्युत समूहमा १५६ अंक र व्यापार समूहमा १२१ अंकको सुधार आएको देखिन्छ । आज परिसूचकमा उच्च अंकको वृद्धि आउँदा सबैजसो समूहमा उल्लेख्य सुधार आएको छ ।
यसक्रममा आज २१ वटा कम्पनीको सेयर मूल्य १० प्रतिशतले बढेको छ । परिसूचकमा उच्च अंकको वृद्धि देखिँदा झण्डै २ दर्जन कम्पनीको सेयर मूल्यमा सकरात्मक सर्किट लागेको हो । यसैगरी, २९ वटा कम्पनीको सेयरमा ९ प्रतिशतभन्दा धेरैको सुधार आएको नेप्सेले जनाएको छ ।