गणेश नेपाली मृत्यु घटनापछि भीष्मराज आङ्देम्बेले उठाए शासन प्रणालीप्रति प्रश्न

नयाँ विकल्प संवाददाता
प्रकाशित मिती: २०८३ असार २६, १४: ०३

काठमाडौँ : राहदानी विभाग अगाडि आत्मदाह प्रयास गरेका गणेश नेपालीको उपचारका क्रममा मृत्यु भएपछि सरकार र विद्यमान शासन प्रणालीप्रति आलोचना सुरु भएको छ ।

नेपाली कांग्रेसका संसदीय दलका नेता भीष्मराज आङ्देम्बेले घटनालाई राज्य प्रणाली र सार्वजनिक सेवाको कार्यशैलीसँग जोड्दै टिप्पणी गरेका छन् । उनले सामाजिक सञ्जालमार्फत कविता शैलीमा आफ्नो धारणा सार्वजनिक गर्दै वर्तमान शासन पद्धतिले नागरिकको पीडा र निराशालाई सम्बोधन गर्न नसकेको बताएका हुन् ।

आङ्देम्बेका अनुसार २०८३ असार २५ गते त्रिपुरेश्वरमा मुगुका २५ वर्षीय गणेश नेपालीले गरेको आत्मदाह प्रयासले कठोर र संवेदनहीन शासन प्रणालीको अवस्था देखाएको छ । उनले यस्तो अवस्था लामो समयदेखि सुधार हुन नसकेको राज्य संरचना र प्रशासनिक अभ्यासको परिणाम भएको उल्लेख गरेका छन् ।

उनले नागरिकमाथि करको भार बढाउने, कडा दण्ड र जरिवानामार्फत मात्र व्यवस्था कायम गर्न खोज्ने सोच प्रभावकारी नभएको धारणा राखेका छन् । जनताको आत्मविश्वास र मनोबल वृद्धि गर्ने किसिमका सरल नीति, व्यवहारिक कानुन र सहज शासकीय अभ्यास आवश्यक रहेको उनको भनाइ छ ।

गणेश नेपालीले बिहीबार काठमाडौँको त्रिपुरेश्वरस्थित राहदानी विभाग परिसर अगाडि आफ्नै शरीरमा आगो लगाएका थिए । गम्भीर घाइते अवस्थामा वीर अस्पतालमा उपचाररत उनको पछि मृत्यु भएको थियो । घटनापछि सार्वजनिक सेवा प्रणाली, नागरिकका समस्या समाधान गर्ने राज्य संयन्त्र र प्रशासनिक संवेदनशीलतामाथि बहस सुरु भएको छ ।