केसीले आमरण अनसन नतोड्ने, डाक्टरहरु पनि सडकमा

नयाँ विकल्प
प्रकाशित मिती: २०७५ माघ १४, १०: १२

काठमाडौ । सरकारले चिकित्सा शिक्षा विधेयक पारित गरे पनि सो विधेयकको बिरोधमा अनसन बसेका डा. गोबिन्द केसीले अनशन जारी राख्ने बताएका छन् । प्रधानमन्त्री केपी ओलीको राजीनामा माग गर्दै नेपाली नागरिकमाथि सुनियोजित धोका भएको बताएका छन् । डा. केसीले आफ्नो माग पुरा गराउन सरकारलाई दबाब दिन आह्वान गरेपछि आवासिय चिकित्सकहरुले आइतबारबाट आकस्मिकबाहेकको सेवा ठप्प समेत पारेका छन् ।

सरकारले सभामुख कृष्णबहादुर महरालाई उक्साएर संसदबाट चिकित्सा विधेयक पारित गराएको थियो । सो विधेयक पारित गराउन सभामुख महराले मर्यादापालकलाई सांसद बस्ने आसनको कुर्सीसम्म पुगेर छेकेका थिए । केसीसँग भएको सहमति कार्यान्वयन गर्नु पर्ने र पूर्वप्रधानमन्त्रीहरु गिरिजाप्रसाद कोइराला र शुशील कोइरालाको नाममा स्थापना भएका अस्पतालहरु खारेज गर्न नहुने माग राख्दै सदन अबरोध गरेको थियो ।

आफैले गरेको सम्झौता कार्यान्वयन गर्ने नैतिकताबाट प्रधानमन्त्री ओली च्युत भएको केशीले आरोप लगाएका छन् । अनसनस्थलबाटै विज्ञप्ती जारी गरेर केसीले पन्ध्रौं सत्याग्रहका क्रममा सरकारले आफूसँग सम्झौता गरेकोले सोही सम्झौताअनुसार विधेयक संशोधन गरी पारित गर्न माग गरेका छन् । पुस २५ देखि केसीले इलाममा गएर आमरण अनसन बसेपछि सरकारले उनलाई हेलिकोप्टरमार्फत शिक्षण अस्पताल महाराजगञ्जमा ल्याएको थियो । डा केशीले सोह्रौं अनसन जारी राखेको १८ दिन भएको छ ।

विधेयक पारित हुने बेला सत्याग्रहको पक्षमा प्रदर्शन गरेका नागरिकलाई धरपकड र पक्राउ गरिएकोमा सकुशल रिहाइको माग गर्दै डा. केसीले आफ्नो अभियानमा सहभागी हुन खुला अपिल समेत गरेका छन् । डा.केसीको अनशनप्रति ऐक्यबद्धता जनाउँदै चिकित्सकहरूले आन्दोलनलाई जारी राख्ने भएका छन् ।

चिकित्सकहरूको छाता संगठन नेपाल चिकित्सक संघका अध्यक्ष डा. मुक्तिराम श्रेष्ठले सम्झौताविपरीत विधेयक पारित गरेर सरकारले झुक्याएको आरोप लगाए । डा. केसी अनशनरत शिक्षण अस्पताल प्रांगणमा आइतबार दिउँसो काठमाडौं उपत्यकाका अस्पतालका चिकित्सकलाई भेला भएका छन् । आवासीय चिकित्सकहरू आकस्मिक सेवाबाहेकका अन्य सेवामा आजबाट सहभागी भएका छैनन् ।

सरकारले डा. गोविन्द केसीसँग गरेको सहमति विपरित संसदबाट चिकित्सा शिक्षा विधेयक पारित गरेको विरोधमा माइतीघर मण्डलामा पनि दिनहुँ प्रदर्शन भइरहेका छन् । चिकित्सा शिक्षा विधेयक सहित ६ बुँदे माग राखेर १८ दिनदेखि डा केसी आमरण अनसनमा छन् । सहमति विपरितको विधेयक पारित गरेर संसदले पौने तीन करोड नेपालीलाई धोका दिएको भन्दै डा केसीले अनसन जारी राखेका छन् । डा. केसीको जीवन रक्षा र उहाको माग पुरा गर्न सोलिडारिटी फर डा. केसी एलायन्सले शनिबार पनि माइतीघरमा प्रदर्शन गरेको थियो ।