स्थानीय तह निर्वाचन तयारीकाे निर्णय लिन काँग्रेस बैठक सुरू

काठमाडाैं । बैशाख ३१ गते हुने स्थानीय तहको निर्वाचनको तयारीका विषयमा निर्णय लिन नेपाली कांग्रेस केन्द्रीय समितिको बैठक सुरु भएको छ । बैठकमा उम्मेदवारलाई टिकट वितरण गर्ने संसदीय समिति गठन, निर्वाचन प्रचार प्रसारको समीक्षा, चुनावी तालमेललगायतमा विषयमा छलफल हुने भएको हो ।

काँग्रेसको विधानमा व्यवस्था भएबमोजिम उम्मेदवारको मनोनयन हुनु एक महिनाअघि उम्मेदवार छनोट गरिसक्नु पर्ने हुन्छ । विधानमा केन्द्रीय, प्रदेश, जिल्ला र प्रतिनिधि सभा क्षेत्रीय संसदीय समिति गठन गर्ने व्यवस्था रहेको छ ।

विधान बमोजिम उपमहानगरपालिका र नगरपालिकाका प्रमुख र उपप्रमुखको उम्मेदवार चयन गर्ने अधिकार प्रदेश संसदीय समितिलाई हुन्छ भने गाउँपालिका अध्यक्ष र उपाध्यक्षको उम्मेदवार चयन गर्ने अधिकार जिल्ला संसदीय समितिले गर्दछ ।

त्यसैगरी देशभरका ६ हजार ७४३ वडाका अध्यक्ष र सदस्यको उम्मेवारको निर्णय गर्ने अधिकार प्रतिनिधि सभा क्षेत्र संसदीय समितिले गर्ने व्यवस्था विधानमा रहेको छ ।

नेपाली काँग्रेसको विधानले उम्मेदवार चयन गर्न चार तहमा संसदीय समितिको व्यवस्था गरेको छ ।