आयो सन्तोषको राष्ट्रिय भावनाको सुरक्षा

नयाँ विकल्प
प्रकाशित मिती: २०७४ पुष २४, ०९: ३३

काठमाडौं । सुगम सँगीतमा छुट्टै चर्चा कमाएका सँगीतकार सन्तोष श्रेष्ठले आफ्नो एकल सँगीतबद्ध राष्ट्रिय भावनाले ओतप्रोत गीतहरुको सँग्रह ‘सुरक्षा’ स्रोतामाझ ल्याएका छन् । राष्ट्रकवि माधव प्रसाद घिमिरेले सुरक्षाको शनिबार काठमाडौंमा एक समारोहबीच बिमोचन गरे । अरु गीत भन्दा राष्ट्रिय गीतको महत्व फरक हुने भएकाले यस्ता गीतहरु आफुलाई मन पर्ने राष्ट्रकविले समारोहमा बताए । आफ्नो गीत पश्चिम रुन्छ महाकाली…लाई सँगीतकार सन्तोष र गायक शिब परियारले निकै कर्णप्रिय बनाएको भन्दै राष्ट्रकवि घिमिरेले खुसी व्यक्त गरे । यो नयाँ सँग्रहमा राष्ट्रकवि घिमिरेको पनि एउटा गीत छ ।
बिमोचन समारोहमा सँगीतकार दीपक जँगमले राष्ट्रिय गीत र भावनात्मक गीत कालजायी रुपमा चलिरहने बताए । गीतकार कालीप्रसाद रिजालले आफु कहाँ आजकाल गायक गायिका बिकाउ र चटपटे गीत माग्न आउने गरेको अनुभव सुनाउँदै बिकाउ गीतका कारण राष्ट्रिय भावका गीत र गम्भिर गीत छायाँमा परेको गुनासो पोखे । यो सँग्रहमा उनको पनि एउटा गीत छ । यस्तै कार्यक्रममा बोल्दै राष्ट्रिय गीतमा हामी नेपाली सबै भन्दा धनी रहेको डा. नबराज लम्सालले बताए । सँग्रहमा उनका दुई ओटा गीत छन् । सँग्रहमा सुन है सुन…, पूर्व जागौं…, आफ्नो माटो…, टेक्ने जमिन यही हो…, सम्मान गरौं देशलाई…, सकिएला सँसार छाड्न…, हाम्रो देश स्वतन्त्र छ…सहित ८ गीत छन् । सँग्रहमा राष्ट्रकवि सहित दिनेश अधिकारी, श्रीपुरुष ढकाल, डा. रमेश क्षितिज र भावेश भूमरीका पनि गीत छन् । यी गीतमा मनोजराज शिबाकोटी, कर्म ग्याल्छेन बम्जन, थुप्तेन भुटिया, भविन ढुँगाना र सँगीतकार सन्तोष स्वयँको स्वर छ ।