सल्यान अपडेटः दुर्घटनामा मृत्यु हुनेको संख्या १२ पुग्यो

नयाँ विकल्प
प्रकाशित मिती: २०७८ कार्तिक २१, १५: १२

सल्यान । कपुरकोटमा भएको बस दुर्घटनामा मृत्यु हुनेको संख्या १२ पुगेको छ । मृत्यु हुनेमा १० जना पुरुष र २ जना महिला रहेका छन् । घटनास्थलमा ६ जनाको र अस्पतालमा ६ जनाको गरी १२ जनाको मृत्यु भएको जिल्ला प्रहरी प्रमुख डीएसपी गोविन्द थापाले जानकारी दिए ।

सदरमुकाम खलंगाबाट दाङको तुल्सीपुरतर्फ गइरहेको ना १ ख १५५२ नम्बरको बस आइतबार विहान ११ बजेतिर कपुरकोट गाउँपालिका–५ स्थित खारखोलामा दुर्घटना भएको हो । दुर्घटनामा कम्तीमा २२ जना घाइते भएको प्रहरीले बताएको छ ।

घाइतेमध्ये गम्भीर अवस्थाका ७ जनालाई उपचारका लागि नेपालगञ्ज पठाइएको छ । सामान्य घाइतेको श्रीनगर र खलंगाका विभिन्न अस्पतालमा उपचार भइरहेको थापाले बताए । तीब्र गतिका कारण बस दुर्घटना भएको प्रारम्भिक अनुमान छ ।

बस सडकबाट २०० मिटर तल खसेको थियो । तिहार मनाएर शहरतर्फ फर्किँदै गरेकाहरु दुर्घटनामा परेको प्रहरीको भनाइ छ ।