झडप हुने स्थिति देखिएपछि निषेधाज्ञा जारी

नयाँ विकल्प
प्रकाशित मिती: २०७८ कार्तिक २४, ११: ३०

काठमाडौं । एमाले महासचिव ईश्वर पोखरेललाई प्रमुख अतिथि बनाएको विषयमा विवाद हुँदा प्रशासनले निषेधाज्ञा जारी गरेको छ ।

सिन्धुली सदरमुकाममा आयोजित एक कार्यक्रममा एमाले कार्यकर्ता र सत्ता गठबन्धनका कार्यकर्ताबीच झडप हुने स्थिति देखिएपछि निषेधाज्ञा जारी गरिएको जिल्ला प्रहरी प्रमुख गोविन्द थपलियाले बताए ।

सिन्धुलीगढीस्थित बाल उद्यान पार्कको उदघाटन गर्ने र त्यहाँ बीपी कोइराला र पुष्पलाल श्रेष्ठको अर्धकदको सालिक अनावरण गर्ने कार्यक्रम रहेको थियो । कमलामाई नगरपालिकाले प्रमुख अतिथिको रुपमा पोखरेललाई बोलाएपछि पोखरेल मंगलबार नै सिन्धुलीगढी पुगेका थिए ।

पोखरेललाई प्रमुख अतिथि बनाएको भन्दै गठबन्धनमा आवद्धदलका कार्यकर्ताले विरोध जनाए । गठबन्धनका कार्यकर्ता र एमालेका कार्यकर्ताहरु झडपमा उत्रिने र अप्रिय घटना हुन सक्ने स्थिति पैदा भएपछि सुरक्षाकर्मीको तैनाथ गरिएको थियो ।

सर्वदलीय बैठकमा पनि सहमति जुट्न नसकेपछि जिल्ला प्रशासन कार्यालयले स्टल बजार, जुनारचोक, बसपार्क, ग्वाङ् खोला पुल, हस्पिटल रोड क्षेत्रभित्र बिहान ११ बजेदेखि राति १२ बजेसम्म निषेधाज्ञा जारी गर्न पुगेको हो ।