प्रहरीमा एआईजीको दरबन्दी रिक्त

नयाँ विकल्प संवाददाता
प्रकाशित मिती: २०७९ कार्तिक ६, १८: ५५

नयाँ विकल्प,
काठमाडौं – प्रहरीमा हाल दुईजना प्रहरी अतिरिक्त महानिरीक्षक (एआईजी)को दरबन्दी रिक्त छ । २०७९ साउन २० मा विश्वराज पोखरेल र भदौ २३ मा मुकुन्दराज आचार्यले अवकाश पाएका थिए । अहिलेका आईजीपी धीरजप्रताप सिंहसँगै २०४९ चैत ११ मा इन्स्पेक्टरमा भर्ना भएका पोखरेल र आचार्यले उमेर हदका कारण अवकाश पाएका हुन् । प्रहरी अतिरिक्त महानिरीक्षकको उमेर हद ५६ वर्ष छ ।

मंसिर ४ मा हुने प्रतिनिधिसभा र प्रदेशसभा निर्वाचनअघि थप दुईजना एआईजीले अवकाश पाउँदै छन् । उपत्यका प्रहरी कार्यालयका एआईजी रवीन्द्रबहादुर धानुकले कात्तिक २४ बाट अवकाश पाउँदै छन् । प्रशासन विभाग प्रमुख एआईजी अरुणकुमार बिसी कात्तिक १४ बाट अवकाशमा जाँदै छन् ।

प्रहरी प्रधान कार्यालयका एकजना उच्च अधिकृतका अनुसार अवकाश हुने समय निकट भएकाले उनले बिदा लिएका छन् ।

उपत्यका प्रहरी कार्यालयका एआईजी रवीन्द्रबहादुर धानुक एआईजीको उमेर हद बढाउने कसरमा लागेका छन् । प्रहरी नियमावली संशोधन गरेर एआईजीको उमेर हद ५८ वर्ष बनाउन कात्तिक ३ मा बसेको मन्त्रिपरिषद्को बैठकमा प्रस्ताव लगिएको थियो ।

२०७८ चैत १७ मा धीरजप्रताप सिंहसँगै रवीन्द्रबहादुर धानुकलाई वर्तमान मन्त्रिपरिषद्ले एआईजीको दरबन्दी थपेर बढुवा गरेको थियो ।
पोखरेल र आचार्यको अवकाशसँगै प्रहरीको कार्य विभाग र प्रदेश समन्वय विभागमा एआईजीको दरबन्दी रिक्त छ । मंसिर ४ मा हुने प्रतिनिधिसभा र प्रदेशसभा निर्वाचनअघि उपत्यका प्रहरी कार्यालय र प्रशासन विभागको दरबन्दी रिक्त हुँदैछ ।