विदेशी लगानीकर्तालाई सुरक्षाको प्रत्याभूति दिन सरकार तयार छः प्रधानमन्त्री देउवा

प्रभास दैलेखी
प्रकाशित मिती: २०७८ कार्तिक १४, १४: ३८

काठमाडौं । विदेशी लगानीकर्तालाई सुरक्षाको प्रत्याभूति दिन सरकार सदैव तयार रहेको प्रधानमन्त्री शेरबहादुर देउवाले स्पष्ट पारेका छन् । शनिबार बेलायतमा नेपाली जनसम्पर्क समितिद्वारा आयोजित कार्यक्रमलाई सम्बोधन गर्दै विदेशी लगानीकर्तालाई उत्प्रेरित गर्न सरकार तयार रहेको प्रधानमन्त्री देउवाले बताएका हुन् ।

नेपाली नागरिकता नेपालको संविधानसंग जोडिएको विषय भएकाले गैरआवासीय नेपालीका लागि नेपाली नागरिकता सम्भव नरहेको प्रधानमन्त्री देउवाले बताए । यता बेलायतको नागरिकता लिएका नेपालीहरु यहाँको सांसद् हुनसक्ने सम्भावना भएको बताउदै गैरआवासीय नेपालीहरुले नेपाललाई निरन्तर सहयोग गरिहेकामा प्रधानमन्त्रीले प्रसंशासमेत गरे ।

समितिका अध्यक्ष युवराज गुरुङले जनसम्पर्क समितिका कामकारबाहीबारे प्रधानमन्त्रीलाई जानकारी गराएका थिए । उनले प्रवासमा रहेका नेपालीका समस्या र चनौतीका विषयमा देउवाको ध्यानाकर्षण गराएका थिए ।

प्रधानमन्त्री देउवा जलवायु परिवर्तनसम्बन्धी संयुक्त राष्ट्रसंघीय संरचना महासन्धिको पक्ष राष्ट्रको २६औँ सम्मेलन (कोप–२६०) समिटका लागि नेपाली प्रतिनिधिमण्डलको नेतृत्व गर्दै शुक्रबार राति लण्डन पुगेका हुन् ।