Naya Bikalpa | » च्वापुगुँया संरक्षण झीगु मंकाः कर्तव्य खः

च्वापुगुँया संरक्षण झीगु मंकाः कर्तव्य खः – पर्यटनमन्त्री पाण्डे

नयाँ विकल्प संवाददाता
प्रकाशित मिती: २०८२ जेष्ठ १३, २१: २२

येँ : संस्कृति, पर्यटन नापं नागरिक उड्डयनमन्त्री बद्रीप्रसाद पाण्डें च्वापुगुँया संरक्षण झीपिं सकसिगु नं मंकाः कर्तव्य जूगु धयादीगु दु ।

थन थौं ग्वसाःग्वःगु ‘अन्तरराष्ट्रिय एभरेस्ट समिटर्स समिट–२०२५’ या उलेज्या यानादिसें वय्कलं हिमाली संस्कृतिया संरक्षण व भविष्यया पुस्तातय् नितिं च्वापुगुँ सुरक्षित यानातयेमाःगु आवश्यकता न्ह्यथनादिल ।

मन्त्री पाण्डें धयादिल, “जिपिं केवल संसारया च्वकाय् थ्यंपिंत बधाई बिइत थन वयागु मखु, वय्कःपिनिगु साहस, समर्पण व दृढतायात हनेत नं थन च्वनाच्वनागु खः ।” वय्कलं शेर्पा समुदाय, पथप्रदर्शक, उद्धार टोली व हिमाली लागाय् मद्दिक ज्या यानाः सेवा यानाच्वंपिं सकलसित विशेष हनाबना नं प्वंकादिल ।

“वय्कःपिनिगु समर्पणं पर्वतीय यात्रायात सुरक्षित, प्रकृतियात संवेदनशील व अझ अर्थपूर्ण दयेकूगु दु”, मन्त्री पाण्डें धयादिल । सरकार पर्वतारोहणया प्रवद्र्धनया नितिं पूर्वाधार, तालिम व वातावरणीय सुरक्षायात प्राथमिकताय् तयाः ज्या यानाच्वंगु मन्त्री पाण्डें धयादिल । लिसें पर्वतीय पर्यटनलिसें स्थानीय समुदायतय् समृद्धि व जीवनस्तरय् सुधार यायेत प्रतिबद्ध जुयाच्वंगु वय्कःया धापू खः ।

मन्त्री पाण्डें च्वापुगुँयात केवल भौगोलिक पर्वत मखुसे सभ्यता, संस्कृति व सहजीवनया सेतुकथं चित्रित यासें धयादिल, “थ्व च्वापुगुँत पवित्र खः व इमित सुरक्षित यानातयेगु झीगु मंकाः भाला खः ।”

जलवायु ह्यूपाः व ‘ग्लोबल वार्मिङं’ यानाः हिमाली भविष्य सङ्कटय् लाःगु न्ह्यथनादिसें वय्कलं धयादिल, “आः ई वःगु दु, झीसं सावधानी, बुद्धिमत्ता व सम्मानपूर्वक थ्व च्वापुगुँतय्गु संरक्षण यायेगु आवश्यक जू ।”

वय्कलं मुक्कं मानव समाजयात च्वापुगुँप्रतिया प्रतिबद्धता नवीकरण यायेत प्रेरणा बिइगु भलसा प्वंकादिल । वय्कलं सम्मेलनया झ्वलय् स्वदेशीनिसें विदेशी पर्वतारोहीतय्त हनां नं दिल ।

ज्याझ्वलय् नेपाल पर्यटन बोर्डया प्रमुख कार्यकारी अधिकृत (सिइओ) दीपकराज जोशीं नेपाःया शान व म्हसीकाया कथं दूगु सगरमाथालिसेंया च्वापुगुँ आरोहणपाखें साहसिक गन्तव्यया प्रवद्र्धनय् तिबः जुइगु भलसा प्वंकादिल ।

राष्ट्रिय खेलकुद परिषद् (राखेप) या सदस्यसचिव टङ्कलाल घिसिङं पर्वतीय पर्यटन प्रवद्र्धनया नापनापं नेपाःयात साहसिक गन्तव्यकथं स्थापित यायेत ज्याझ्वः उपयोगी जुइगु भलसा प्वंकादिल ।

सगरमाथा आरोही सङ्घया नायः डम्बर पराजुलीं हलिंन्यंकया सगरमाथा आरोहीतय्गु हौसला, प्रतिष्ठा व गौरव थकायेत समिट सान्दर्भिक जुइ धयादिल । अन्तरराष्ट्रिय सगरमाथा आरोहीतय्गु विशेष जमघट ‘अन्तरराष्ट्रिय एभरेस्ट समिटर्स समिट–२०२५’ न्हापांखुसी येँय् ग्वसाःग्वःगु खः ।

एभरेस्ट एलायन्स नेपालं ग्वसाःग्वःगु समिटय् २५ गू देय्या ३०० स्वयां अप्वः अनुभवी पर्वतारोहीतय्गु ब्वति दु । सम्मेलनय् नेपाःया नापनापं विश्वया थी थी देसं राष्ट्रिय व अन्तरराष्ट्रिय सगरमाथा आरोहीतय् विशेष जमघट दु । सम्मेलनय् भारत, चीन, अमेरिका, पाकिस्तान, बेलायत, इटाली, नर्वे, इरान, सिङ्गापुर, अस्ट्रेलिया, लेबनान, मोरक्को, युएईलिसेंया देय्या ब्वति दु ।

एभरेस्ट एलायन्स नेपालया नायः सुदर्शन नेपालं साहसिक पर्यटन प्रवद्र्धन यायेगु ताःतयाः सम्मेलन ग्वसाःग्वयागु धकाः धयादिल । वय्कःया कथं सम्मेलनं पर्वतारोहण विज्ञ, नीति निर्माता, संरक्षणविद्, पर्यटन सरोकारवाला, हिमाली लागाया स्थानीयलिसें पर्यटन व्यवसायी, शेर्पा, ट्रेकर नापं पर्वतीय संस्कृतियात प्रतिनिधित्व याइगु समुदाययात छगू हे दबुली हयाः दिगो पर्यटन प्रवद्र्धन, हिमाली वातावरणीय संरक्षण व स्थानीय समुदायतय् उत्थानबारे अन्तरराष्ट्रिय सहकार्यया नितिं सहलह यायेगु ह्वःताः चूलाकीगु वय्कलं धयादिल ।

एभरेस्ट समिटियर्स समिटया मुख्य विशेषता हलिंन्यंकया सगरमाथा आरोहण पूवंकूपिं आरोहीतय्त छगू हे दबुली भेला यानाः प्रेरणादायी यात्राया बाखं, सफलताया अनुभूति, सङ्घर्षया क्षणत व सिकाइया पाटा प्रस्तुत यायेगु खः ।

सन् १९५३ य् सर एडमन्ड हिलारीलिसें न्हापांखुसी सगरमाथा आरोहण याःम्ह दुजः कान्छा शेर्पायात ‘लाइफटाइम एचिभमेन्ट अवार्ड’ लःल्हाःगु खः । कीर्तिमानी आरोही मिङ्मा शेर्पा, हरिबहादुर बुढालिसेंयात हंगु खः ।

‘सगरमाथा झीगु गौरव, म्हसीका व आः झीगु भाला खः’ धइगु सन्देश ज्वनाः थ्व सम्मेलनं च्वापुगुँइ अप्वयावनाच्वंगु पर्यावरणीय सङ्कट, जिम्मेवार पर्वतारोहण अभ्यास व अन्तरराष्ट्रिय सहकार्यया आवश्यकताप्रति ध्यानाकर्षण याकीगु भलसा कयातःगु दु ।

सम्मेलन नेपालयात सुरक्षित व दिगो पर्वतारोहण गन्तव्यया कथं स्थापित यायेत, वातावरण संरक्षण प्रवद्र्धन यायेत व अन्तरराष्ट्रिय सञ्जालयात क्वातुकेत महत्वपूर्ण जुइगु ग्वसाःखलःतय् भलसा दु ।