परराष्ट्रमन्त्री डा राणा व चिनियाँ विदेशमन्त्रीदथुइ निगूपक्षीय खँल्हाबल्हा

नयाँ विकल्प संवाददाता
प्रकाशित मिती: २०८२ जेष्ठ १६, २१: ०५

येँ : परराष्ट्रमन्त्री डा आरजु राणा देउवा व जनवादी गणतन्त्र चीनया विदेशमन्त्री वाङ यीदथुइ थौं हङकङय् नापलानाः निगूपक्षीय खँल्हाबल्हा जूगु दु । विदेशमन्त्री वाङया ब्वनाय् मध्यस्थताया नितिं अन्तरराष्ट्रिय सङ्गठन स्थापनासम्बन्धी महासन्धिइ ल्हाःचिं तयेगु समारोहय् पर्यवेक्षक देय्या कथं ब्वति कायेत चीनया विशेष प्रशासनिक लागा हङकङय् वनाच्वनादीम्ह मन्त्री डा राणा व चिनियाँ विदेशमन्त्रीदथुइ उगु खँल्हाबल्हा जूगु खः ।

सौहार्दपूर्ण उगु नाप लायेगु झ्वलय् नेपाल–चीन सम्बन्ध, थवंथः भिं जुइगु, मंकाः च्यूताः व सरोकारया लिसें थुगुसी निगुलिं देसं न्यायेकाच्वंगु नेपाल–चीन कूटनीतिक सम्बन्ध स्थापनाया ७० दँ दूगु विषयकय् खँल्हाबल्हा जूगु खः ।

नाप लायेगु झ्वलय् मन्त्री डा राणां नेपालं चीनलिसेया सम्बन्धयात महत्व बियावयाच्वंगु प्रसङ्ग न्ह्यथनादिसें छम्ह भिंम्ह मित्रराष्ट्रकथं नेपाःया आर्थिक, सामाजिक विकासया ख्यलय् वंगु ताःइलंनिसें चीनं बियावयाच्वंगु ग्वाहालि व समन्वयया नितिं विदेशमन्त्री वाङपाखें चीन सरकार व चिनियाँ जनतातय्त सुभाय् देछानादिल । लिसें वइगु इलय् नं आर्थिक, प्राविधिक, प्रविधि लःल्हायेगु नापं तप्यंक वैदेशिक लगानीलिसें थी थी ख्यलय् नेपालय् चीनया ग्वाहालि मद्दिक दयाच्वनीगु अपेक्षा नेपालं यानाच्वंगु मन्त्री डा राणां धयादिल ।

उगु झ्वलय् मन्त्री डा राणां नेपाल न्ह्याबलें छगू चीन नीतिप्रति प्रतिबद्ध जुयावयाच्वंगु हाकनं कनादिसें नेपाःया भूमि चीनया विरुद्धय् छ्यले मबिइकेगु खँय् नेपाः अडिग जूगु नं ध्वाथुइकादिल ।

मन्त्री डा राणां नेपालं आः नकतिनि धइथें क्वचायेकूगु सगरमाथा संवादय् चीनपाखें जूगु प्रतिनिधित्वया नितिं चीन सरकारयात विशेष सुभाय् देछानादिल । लिसें उगु नाप लायेगु झ्वलय् नेपाल–चीनदथुइ छुं ईन्ह्यःनिसें जुयाच्वंगु उच्चस्तरीय भ्रमणतय्गु बारे नं चर्चा यानादिसें प्रधानमन्त्री केपी शर्मा ओलीं वंगु डिसेम्बरय् यानादीगु चीनया औपचारिक भ्रमण व उगु झ्वलय् जूगु सहमति नापं सम्झौतातय्गु कार्यान्वयनया बारे नं खँल्हाबल्हा जूगु खः ।

थुगुसी नेपाः व चीनं कूटनीतिक सम्बन्ध स्थापनाया ७० क्वःगु वार्षिकोत्सव न्यायेकाच्वंगुलिइ थ्व हे झ्वलय् नेपाःया भ्रमणया नितिं चिनियाँ विदेशमन्त्री वाङयात मन्त्री डा राणां ब्वना नं बियादिल । निगू देय्दथुइया कूटनीतिक सम्बन्ध स्थापनाया ७० दँ दूगु झ्वलय् सन् २०२५ यात नेपाल भ्रमण दँ कथं न्यायेकूगुलिं थुगुसी नेपालय् अप्वःस्वयां अप्वः चिनियाँ पर्यटकतय्त लसकुस यायेत नेपाः इच्छुक जूगु नं मन्त्री डा राणां उगु नाप लायेगु झ्वलय् धयादिल ।

नाप लायेगु झ्वलय् चिनियाँ विदेशमन्त्री वाङं नेपालं नकतिनि धइथें ग्वसाःग्वःगु सगरमाथा संवाद सफलतापूर्वक पूवंकूगुलिं मन्त्री डा राणापाखें नेपाल सरकारयात बधाई ज्ञापन यानादिल । वय्कलं जलवायु ह्यूपाः व उकिया असरयात पाः यायेगु नापं वातावरण संरक्षण यायेगु थासय् वइगु इलय् नेपाललिसे सहकार्य यायेत चीन तयार दूगु धयादिल ।

वय्कलं चीनं नेपाःयात बियावयाच्वंगु ग्वाहालि लिपाया इलय् नं मद्दिक दयाच्वंनी धयादिसें चीनया समन्वयकय् स्थापना जुइगु मध्यस्थतासम्बन्धी अन्तरराष्ट्रिय सङ्गठनपाखें वइगु इलय् नेपाललिसे नं समन्वय दयेकाः न्ह्याःवनेफइगु धारणा तयादिल ।

विदेशमन्त्री वाङं प्रधानमन्त्री ओलीया चीन भ्रमणया झ्वलय् जूगु सहमति व सम्झौतातय्गु कार्यान्वयन न्ह्याकेत मन्त्री डा राणापाखें नेपाल सरकारयात इनाप यानादिल । लिसें मन्त्री डा राणां बियादीगु नेपाल भ्रमणया ब्वना स्वीकार यानादिसें थः नेपाः भ्रमणय् वये धकाः धयादिल ।

मन्त्री वाङं नेपाःया कूटनीतिक ख्यलय् थौंकन्ह्य् मन्त्री डा राणाया नेतृत्वय् जुयाच्वंगु व न्ह्याकूगु ज्याझ्वःत च्वछानादिसें विश्व महिला नेतृत्वसम्बन्धी फोरमय् ब्वतिया नितिं चीन सरकारपाखें मन्त्री डा राणायात विशेष ब्वना नं बियादीगु खः ।