आरोही कल्याणकारी कोष स्थापना याइगु

नयाँ विकल्प संवाददाता
प्रकाशित मिती: २०८२ जेष्ठ २०, २१: ११

म्याग्दी : संस्कृति, पर्यटन नापं नागरिक उड्डयनमन्त्री बद्रीप्रसाद पाण्डें आरोही कल्याणकारी कोष स्थापना यायेगु सोचय् सरकार दूगु धयादीगु दु ।

अन्नपूूर्ण च्वापुगुँ आरोहणया हीरक महोत्सवया झ्वलय् अन्नपूर्ण गाउँपालिकां थौं नारच्याङय् ग्वसाःग्वःगु ज्याझ्वलय् सरकारया पर्यटन नीतिइ समसामयिक सुधारया नापनापं कल्याणकारी कोष स्थापना यायेगु सोचाइ दूगु धयादिल ।

“पर्यटनपाखें देय्या अर्थतन्त्रयात न्ह्याकातयेत पर्यटन नीतिइ सुधार यायेत्यंगु दु,” वय्कलं धयादिल, “पर्यटन नीतिइ आरोही कल्याणकारी कोष स्थापनाया प्रस्ताव तयागु दु ।” आरोही कल्याणकारी कोषपाखें दुर्घटनाय् लाःपिं पर्वतारोहीतय्गु उद्धार, उपचार व पर्वतारोहणलिपाया जीवनयात सहज यायेत ग्वाहालि जुइगु सरकारया योजना जूगु मन्त्री पाण्डें कनादिल ।

गण्डकी प्रदेशया पर्यटन नापं उद्योगमन्त्री मित्रलाल बस्यालं पोखरायात गण्डकी प्रदेश सरकारं घोषणा याःगु पर्यटकीय राजधानीयात सङ्घीय मन्त्रिपरिषद्पाखें अनुमोदन जुइमाःगुलिइ बः बियादिल ।