सप्तकोसीइ डल्फिनया ल्याः अप्वल

नयाँ विकल्प संवाददाता
प्रकाशित मिती: २०८२ जेष्ठ २२, २१: २५

इटहरी : कोशी टप्पुवन्यजन्तु आरक्षं सप्तकोसीइ डल्फिनया ल्याः अप्वःगु धाःगु दु । थौं वातावरण दिवसया लसताय् ग्वसाःग्वःगु छगू ज्याझ्वलय प्यन्हुतक याःगु गणनाया लिच्वः सार्वजनिक याःगु खः । थुगुसीया गणनाय् थगुनेया ल्याखय् स्वम्ह डल्फिन अप्वःगु खनेदूगु दु ।

आरक्षया वरिष्ठ संरक्षण अधिकृत भुपेन्द्रप्रसाद यादवया कथं थुगुसीया गणनाय् १५ म्हः वयस्क, न्याम्ह अर्धवयस्क व निम्ह मचापिं डल्फिन यानाः मुक्कं २२ म्ह डल्फिन रेकर्ड याःगु दु । वय्कलं धयादिल, “थ्व तथ्याङ्क सप्तकोसीया निंतिं सकारात्मक व ह्यूपाःया सङ्केत खः, थुकियात संरक्षण व प्रचार याये माःगु दु ।”

थ्व सिबें न्ह्यः कोशी टप्पु वन्यजन्तु आरक्षं दँय्दसं नियमित कथं डल्फिनया गणना यानाः संरक्षणया निंतिं माःगु पलाः न्ह्याकाः वयाच्वंगु खः । थन गङ्गेटिक प्रजातिया डल्फिन दु । गुम्हेसित दुर्लभ तायेकातःगु दु । संरक्षण अधिकृत यादवं धयादिल, “डल्फिन यचूगु व गाःवंगु लखय् च्वनीम्ह खः, थुकिं थनया जल स्वस्थ व गुणस्तर दूगु सन्देश नं ब्यूगु दु ।”

गणनाय् राष्ट्रिय प्रकृति संरक्षण कोष, कोशी संरक्षण केन्द्र, श्री भिमकाली गुल्म नापं हिमाली प्रकृति संस्था लिसेंया संस्थां नं प्राविधिक ग्वाहालि याःगु खः । सन् २०१२य् ११ व २०१७ य् १७ म्ह डल्फिन खंकूगु खः । व धुंकाः आरक्षं डल्फिनया संरक्षणय् प्राथमिकता ब्यूगु खः । उकिया लिपा दँय्दसं गणनाया कुतः याःगु आरक्षं धाःगु दु ।

कोशी टप्पु वन्यजन्तु आरक्षं २०२२ य् १७ डल्फिन नापं २०२३ व २०२४ य् १९ म्ह डल्फिनया गणना याःगु खः । आरक्षं डल्फिनया संरक्षण व थुकिया प्राकृतिक आवासया रक्षा यायेत मदिक्क कुतः यायेगु धाःगु दु ।