याकनं हे संसद्या नियमित बैठक जुइ : सञ्चारमन्त्री गुरुङ

नयाँ विकल्प संवाददाता
प्रकाशित मिती: २०८२ जेष्ठ २८, २०: ३१

येँ : सञ्चार नापं सूचना प्रविधिमन्त्री पृथ्वीसुब्बा गुरुङं संसद् न्ह्याकेगु विषयकय् सत्तापक्ष व प्रतिपक्षदथुइ बृहत् सहलह जुयाच्वंगुलिं याकनं हे संसद्या नियमित बैठक जुइ धकाः धयादीगु दु ।

सञ्चार नापं सूचना प्रविधि मन्त्रालयकय् थौं मन्त्रिपरिषद् बैठकया निर्णय सार्वजनिक यायेत ग्वसाःग्वःगु पत्रकार सम्मेलनय् सरकारया प्रवक्ता नं जुयाच्वनादीम्ह मन्त्री गुरुङं सत्तापक्ष व प्रतिपक्षदथुइ संसद् न्ह्याकेगु विषयकय् सहलह जुयाच्वंगुलिं सम्भवत छन्हुनिन्हुं हे सहमति जुयाः बैठक च्वनी धकाः धयादिल ।

प्रतिपक्षी दलतय्सं गृहमन्त्रीया राजीनामा माग यायेगु अर्थहीन जूगु कनादिसें वय्कलं धयादिल, “अख्तियार दुरुपयोग अनुसन्धान आयोगं कर्मचारीतय्त कारबाही न्ह्याकूगु दु । भ्रष्टाचारसम्बन्धी विषयकय् आयोगं कारबाही न्ह्याकेधुंकूगुलिं मन्त्रीया राजीनामा मागे यानाः संसद् अवरुद्ध यायेगु पाय्छि मजू । छम्ह कर्मचारीं याःगु गल्तीइ मन्त्रीं राजीनामा बियावनेगु खः धाःसा सरकार न्ह्याकेत हे समस्या जुइ ।”

मन्त्री गुरुङं संसद् न्ह्याकेगु विषयकय् सत्तापक्ष व प्रतिपक्षदथुइ सहलह जुयाच्वंगुलिं सम्भवत छन्हुनिन्हुं हे नियमित बैठक जुइ धकाः धयादिल । गृहमन्त्रीं राजीनामा बिइगु विषयकय् संसदीय छानबिन समिति छुकेया नितिं व गथे यानाः दयेकेगु धइगु विषय महत्त्वपूर्ण जूगु वय्कलं धयादिल । “जिमिगु माग गृहमन्त्रीं थःत धयातःगु फुक्क न्ह्यसःया थःगु धारणालिसें लिसः बिइदयेमाः धइगु खः । प्रतिपक्षतय्सं संसद् बैठक न्ह्याकाः ग्वाहालि यायेमाः”, वय्कलं धयादिल ।