‘सिआइबी वस्तुनिष्ठ अनुसन्धानय् अझ क्रियाशील जुइमाः’

नयाँ विकल्प संवाददाता
प्रकाशित मिती: २०८२ जेष्ठ २९, २१: ४०

येँ : प्रहरी महानिरीक्षक दीपक थापां गम्भीर प्रकृतिया अपराधया अनुसन्धान यायेगु प्रमुख भाला कयाच्वंगु केन्द्रीय अनुसन्धान ब्यूरो (सिआइबीं) वस्तुनिष्ठ अनुसन्धानय् अझ क्रियाशील जुइमाः धकाः धयादीगु दु ।

केन्द्रीय अनुसन्धान ब्यूरो (सिआइबी)या थौं निरीक्षण यायेधुंकाः ग्वसाःग्वःगु ज्याझ्वलय् ब्यूरोय् ज्या यानाच्वंपिं प्रहरी कर्मचारीतय्त थापां ब्यूरोपाखें सम्पादित ज्यां सङ्गठनया साख थकाइगु जूगुलिं पूर्ण व्यावसायिकता प्रदर्शन यानाः वस्तुनिष्ठ अनुसन्धानय् अझ क्रियाशील जुइमाः धकाः धयादिल ।

महानिरीक्षक थापां जटिल व गहन प्रकृतिया अपराधया नापनापं प्रविधिजन्य अपराध हाथ्याकथं खनेदूगु धयादिसें भलसा दूगु सुचं सङ्कलन, विश्लेषण, उपलब्ध जनशक्ति नापं स्रोतसाधनयात फयांफक्व छ्यलाः ज्या सम्पादन यायेमाः धकाः धयादिल ।

ब्यूरों न्हापान्हापा जूगु सफल अनुसन्धान च्वछायेबहजूगु चर्चा यासें हिलावंगु परिपेक्षय् अपराध अनुसन्धानया ख्यलय् खनेदूगु जटिलताया सामना यायेत प्रहरी कर्मचारीतय्सं थःपिंत परिष्कृत व परिमार्जित यानाः उच्च समर्पण भाव व सामूहिक भावना ज्वनाः इमान्दारीपूर्वक ज्या सम्पादन यायेमाःगुलिइ वय्कलं बः बियादिल ।

लिसें ब्यूरोय् ज्या यानाच्वंपिं प्रहरी कर्मचारीतय् वृत्ति विकास व ब्यूरोयात अझ आधुनिकीकरण नापं स्रोतसाधनं जायेकेत सङ्गठन न्ह्याबलें क्रियाशील जुयाच्वनीगु वय्कलं धयादिल । उगु हे झ्वलय् महानिरीक्षक थापां आर्थिक नापं वित्तीय अपराध अनुसन्धान महाशाखा, प्रशासन शाखा, इन्टेलिजेन्स शाखा, लेखा शाखा, सूचना सङ्कलन शाखालिसें मेमेगु शाखाया निरीक्षण व अवलोकन नं यानादिल ।

केन्द्रीय अनुसन्धान ब्यूरोया प्रमुख प्रहरी अतिरिक्त महानिरीक्षक चन्द्रकुवेर खापुङं सुभाय् मन्तुनादीगु खः । अथे हे उगु ज्याझ्वलय् व ज्याकुथिया प्रहरी वरिष्ठ उपरीक्षक होविन्द्र बोगटीं ब्यूरोया पृष्ठभूमि, स्थापनाया तातुना, कार्यनीति, व्यवस्थापन÷प्रशासन, नीति निर्देशन कार्यान्वयन, महत्वपूर्ण मुद्दातय्गु अनुसन्धान धलः, अनुसन्धानया झ्वलय् खनेदूगु कानुनी समस्या, जटिल नापं प्रविधिजन्य अपराध, समस्या व हाथ्या, भावी योजना, तालुक ज्याकुथिलिसेया अपेक्षा लिसेंया विषयकय् प्रस्तुतीकरण यानादिल ।

ज्याझ्वलय् प्रहरी नायव महानिरीक्षक, वरिष्ठ प्रहरी अधिकृतया लिसें केन्द्रीय अनुसन्धान ब्यूराय् ज्या यानाच्वंपिं प्रहरी अधिकृत व जवानतय्गु ब्वति दूगु खः ।