‘भिजिट भिसा’ प्रकरणपर पाँच दिनमे बनत छानबिन संयन्त्र : मुख्य सचेतक बर्तौला

नयाँ विकल्प संवाददाता
प्रकाशित मिती: २०८२ असार ८, २१: ०३

काठमाण्डू : नेपाल कम्युनिष्ट पार्टी (एमाले) क मुख्य सचेतक महेश बर्तौला ‘भिजिट भिसा’ प्रकरणक सम्बन्धमे सत्तापक्ष आ प्रमुख प्रतिपक्षक बीच भेल दू बुँदीय सहमतिक प्रति सरकार प्रतिबद्ध रहल बतौलैन अइछ ।

प्रतिनिधिसभाक आजुक बैसारमे विनियोजन विधेयक, २०८२ अन्तर्गत विभिन्न शीर्षकउपर भ रहल बातचितमे मुख्य सचेतक बर्तौला सहमतिक आधारपर सरकार किछु दिनक भीतर खोजबिन संयन्त्र गठन करबाक बतौलैन अइछ ।

ओ कहलैन, “विपक्षी दल सङ भेल समझदारी प्रति सरकार प्रतिबद्ध अइछ । एक महिनाधैर रुकएके बाते नै छै । आइसँ बेसीमे पाँच दिनके भीतरे हमसभ खोजबिन संयन्त्र बनायब । गृहमन्त्री रमेश लेखक स्वयं सदनमे आइब क एकर घोषणा करत। एहि सम्बन्धमे उच्चस्तरपर तैयारी भ रहल अइछ ।”

विगत जेठ १३ गतेसँ निरन्तर सदन अवरुद्ध भ रहल आ रास्वपा आ राप्रपाक सांसदसभक अवरोध प्रति ओ असहमति प्रकट कएलैन ।

आजुक बैसारमे एहिसँ पूर्व प्रमुख प्रतिपक्षी दल नेकपा (माओवादी केन्द्र) क प्रमुख सचेतक हितराज पाण्डे कहलैन जे सहमतिनुसार सरकारद्वारा ‘भिजिट भिसा’ प्रकरणमे खोजबिन समिति गठन करबामे देरी नै होएबाक चाही ।