विकासया आयोजना निर्माणया कार्यशैलीइ ह्यूपाः हयेत प्रधानमन्त्रीया निर्देशन

नयाँ विकल्प संवाददाता
प्रकाशित मिती: २०८२ असार २७, २०: ३८

येँ : प्रधानमन्त्री केपी शर्मा ओलीं विकासया आयोजनात इलय् हे पूमवनाः अनुमानस्वयां अप्वः तुइगु व जनतायात दुःख जुइगु अवस्थाय् ह्यूपाः हयेत निर्देशन बियादीगु दु ।

प्रधानमन्त्री नापं मन्त्रिपरिषद्या ज्याकुथि सिंहदरबारय् थौं जूगु राष्ट्रिय विकास समस्या समाधान समितिया ५४ क्वःगु बैठकय् समितिया अध्यक्ष प्रधानमन्त्री ओलीं थःपिं विकासयात केन्द्रित यानाः न्ह्याःवंसां नं बिचाः यानातःथें ज्या मजूगुलिं समस्यात म्हसीकाः स्पष्ट कार्ययोजना ज्वनाः न्ह्याःवनेत निर्देशन बियादीगु खः । वय्कलं सुनकोशी मरिन डाइभर्सन आयोजनाया सुरुङ दयेकेधुंकूसां नं ल्यंदनिगु ज्याया ठेक्का इलय् हे बिइमफूगुलिं चिन्ता प्वंकादिल । थुजाःगु प्रवृत्तिपाखें इलय् लिच्वः व उत्पादन जुइफइमखु धइगु वय्कःया धापू खः ।

“जनतायात मलय् अनुदान बिइगु नीति दु तर मलधाःसा इलय् हे दइमखु । थुजाःगु जनतायात अलमल यायेगु ज्या मयाये । बरु अनुदान पाः याये, आपूर्ति अप्वयेके”, प्रधानमन्त्री ओलीया न्ह्यसः खः, “झीसं देय्यात तःगतिइ विकास यायेमाः । लागत अनुमान १२ अर्बं न्ह्याकूगु छुं नं आयोजना ५२ अर्बतक तुइगु स्थिति नं खनेदू । थ्व स्थिति गथे जुयाः वल ? थुजाःगु तसकं लापर्वाह याइपिंत कारबाही यायेगु कि मयायेगु ?”

प्रधानमन्त्री ओलीं सम्झौता जूम्ह ठेकेदार वा ढाँचापाखें ज्या मजूसा मेगु लँपु कायेमाःगुलिइ बः बियादिसें थुजाःगु ज्याखं विकासय् न्ह्याःवने मफइगु जूगुलिं ज्या यायेगु तरिकाय् क्रान्तिकारी ह्यूपाः हयाः चुस्तदुरुस्त जुइक ज्या यायेगु शैली छ्यलेत इनाप यानादिल ।

उपप्रधानमन्त्रीत, मन्त्रीत, प्रदेशया मुख्यमन्त्रीत, मूछ्याञ्जे व छ्याञ्जेत ब्वति काःगु बैठकय् थी थी मन्त्रालयलिसे सम्बन्धित विकास समस्यातय्सं यानाः व ज्यंकेगु उपायबारे प्यघौ अप्वः सहलह जूगु खः ।

बैठकय् राष्ट्रिय योजना आयोगया न्वकू प्रा डा शिवराज अधिकारीं मुक्कं आर्थिक परिसूचकतय् अवस्था व प्रवृत्ति, नेपाल सरकारया सार्वजनिक वित्त परिचालनया अवस्था, सामाजिक नापं पूर्वाधार विकासया अद्यावधिक अवस्था, दिगो विकासया आज्जु व विकासशील देसय् स्तरोन्नतिसम्बन्धी अद्यावधिक स्थिति, समितिया थ्वस्वयां न्ह्यःया बैठकया निर्णयतय्गु कार्यान्वयनया स्थितिबारे प्रस्तुतिकरण यानादिल ।