गोकर्णेश्वरका ३ वडामा बर्ड फ्लु पुष्टि, नगरपालिकाद्वारा उच्च सतर्कता अपनाउन आग्रह

नयाँ विकल्प
प्रकाशित मिती: २०८३ जेष्ठ १२, १२: १५

काठमाडौं । गोकर्णेश्वर नगरपालिकाका वडा नं. २, ३ र ४ मा ‘हाइली प्याथोजेनिक एभियन इन्फ्लुएन्जा’ अर्थात् बर्ड फ्लु पुष्टि भएपछि नगरपालिकाले उच्च सतर्कता अपनाउन सर्वसाधारण र कृषकलाई आग्रह गरेको छ ।

नगरपालिकाले सोमबार सूचना जारी गर्दै संक्रमित क्षेत्रमा रहेका हाँस, कुखुरा, बट्टाई, लौकाट लगायतका पन्छी, अण्डा तथा दाना सुरक्षित रूपमा नष्ट गरी संक्रमण नियन्त्रणको काम तीव्र बनाइएको जनाएको हो । संक्रमित क्षेत्रलाई निसंक्रमण गर्ने कार्यसमेत जारी रहेको जनाइएको छ ।

रोग फैलिन नदिन पन्छी फार्ममा अनावश्यक व्यक्ति तथा सवारी साधनको प्रवेशमा रोक लगाइएको छ । प्रवेश गर्नै परे अनिवार्य रूपमा निसंक्रमण गर्नुपर्ने व्यवस्था गरिएको छ । साथै, एक फार्ममा काम गर्ने व्यक्ति अर्को फार्ममा जान नहुने, प्रयोग भइसकेका अण्डा राख्ने क्रेट पुनः प्रयोग नगर्नुपर्ने र फार्मको प्रवेशद्वारमा चुना वा निसंक्रामक औषधि राखिएको फुटबाथ अनिवार्य प्रयोग गर्न निर्देशन दिइएको छ ।

नगरपालिकाले खोरभित्र प्रवेश गर्दा छुट्टै बुट र एप्रोन प्रयोग गर्न तथा दैनिक रूपमा खोर निसंक्रमण गर्न कृषकहरूलाई आग्रह गरेको छ । साथै, फार्म परिसरमा कुकुर, बिरालो र मुसाजस्ता जनावरहरूको प्रवेश रोक्न र मरेका पन्छीहरूलाई सुरक्षित रूपमा खाल्डोमा गाड्न समेत भनिएको छ ।

पन्छीजन्य उत्पादन ओसारपसार गर्दा अनिवार्य रूपमा भेटेरिनरी प्रमाणपत्र लिनुपर्ने तथा मासु र अण्डाजन्य पदार्थ राम्रोसँग पकाएर मात्र सेवन गर्न सर्वसाधारणलाई सूचित गरिएको छ । ठूलो संख्यामा पन्छी बिरामी परेमा वा मरेमा तुरुन्तै नजिकको पशु सेवा शाखा वा स्थानीय तहमा जानकारी गराउन नगरपालिकाले अनुरोध गरेको छ ।