अविरल वर्षा र पहिरोले देशभरका प्रमुख राजमार्ग अवरुद्ध, यात्रा अघि सडकको अवस्था बुझ्न आग्रह – Naya Bikalpa
November 22, 2026, Sunday      Epaper

अविरल वर्षा र पहिरोले देशभरका प्रमुख राजमार्ग अवरुद्ध, यात्रा अघि सडकको अवस्था बुझ्न आग्रह

काठमाडौं । देशभर जारी अविरल वर्षा र पहिरोका कारण विभिन्न प्रमुख राजमार्ग तथा सडक खण्ड अवरुद्ध भएका छन्। बाढी र पहिरोले यातायात सेवा प्रभावित बनेपछि सुरक्षा निकायले यात्रा गर्नुअघि सम्बन्धित सडकको अवस्था बुझेर मात्रै यात्रा गर्न सर्वसाधारणलाई आग्रह गरेका छन्।

प्रहरीका अनुसार काभ्रेपलाञ्चोक र सिन्धुली जोड्ने बीपी राजमार्गको खुर्कोट–नेपालथोक–कटुन्जेबेँसी खण्डमा सम्भावित बाढीको जोखिमलाई मध्यनजर गर्दै राति ६ बजेदेखि बिहान ४ बजेसम्म सवारी साधन सञ्चालनमा रोक लगाइएको छ। उक्त सडक दिउँसो भने सञ्चालनमा रहनेछ। यस्तै, मकवानपुरस्थित कान्ति लोकपथमा पनि वर्षाका कारण रातिको समयमा सबै प्रकारका सवारी साधन सञ्चालनमा रोक लगाइएको छ।

इलाम नगरपालिका–९ राजदुवाली क्षेत्रमा सडक हिलाम्मे भएपछि मेची राजमार्ग पूर्ण रूपमा अवरुद्ध भएको छ। त्यहाँ वैकल्पिक मार्गबाट सवारी सञ्चालनको व्यवस्था गरिएको छ।

सिन्धुपाल्चोकको भोटेकोशी गाउँपालिका–४ जिरोकिलो र वडा नं. २ कोदारीस्थित इकु पहिरो क्षेत्रमा माथिबाट लेदो, माटो र पहिरो खसेपछि अरनिको राजमार्ग पूर्ण रूपमा बन्द भएको छ।

त्यसैगरी, बागलुङको जैमिनी नगरपालिका–८ बेलबगरमा पहिरो खस्दा कालीगण्डकी करिडोर अवरुद्ध भएको छ। दोलखाको तामाकोशी गाउँपालिका–५ किर्नेटारमा तामाकोशी खोलाको कटानका कारण लामासाघु–रामेछाप सडक अवरुद्ध भए पनि खिम्ती ग्रामीण विद्युत् सहकारी संस्थाको परिसरबाट वैकल्पिक मार्ग सञ्चालनमा ल्याइएको छ।

रोल्पाको परिवर्तन गाउँपालिका–१ खोलावाङमा सुख्खा पहिरो खस्दा घोराही–थवाङ शहीद राजमार्ग बन्द भएको छ। यस्तै, मुगुको छायानाथ रारा नगरपालिका–७ पिना खोलामा पहिरो र ढुङ्गा खस्दा नाग्म–गमगडी सडक खण्ड अवरुद्ध भएको छ।

रसुवाको गोसाइँकुण्ड गाउँपालिका–३ कुलुङमा पहिरो खस्दा पासाङ ल्हामु राजमार्ग बन्द भएको छ भने लमजुङको मस्र्याङ्दी गाउँपालिका–४ म्याग्दे भिरमा पहिरो झरेपछि बेसीशहर–च्यामे (मनाङ) सडक खण्ड पनि पूर्ण रूपमा अवरुद्ध भएको छ।

सडक विभाग र सुरक्षा निकायले अवरुद्ध सडक खुलाउने काम जारी रहेको जनाएका छन्। वर्षायाममा पहिरो र बाढीको जोखिम उच्च रहेकाले यात्रा गर्नुअघि सम्बन्धित सडकको पछिल्लो अवस्था बुझेर मात्र यात्रा गर्न सर्वसाधारणलाई अनुरोध गरिएको छ।

सम्बन्धित समाचार

कस्तो रहला आजको मौसम ?
कस्तो रहला आजको मौसम ?
  • २०८३ श्रावण ८, ११: ३४

काठमाडौं : हाल नेपालको पश्चिमी भू–भागमा पश्चिमी वायुको तथा पूर्वी भू–भागमा भारतको ओडिसा आसपास अवस्थित न्यून चापीय प्रणालीको आंशिक प्रभाव...

आज विश्व टेलिभिजन दिवस मनाइँदै
आज विश्व टेलिभिजन दिवस मनाइँदै
  • २०८३ श्रावण ८, ११: ३४

काठमाडौं । आज नोभेम्बर २१ अर्थात् विश्व टेलिभिजन दिवस विभिन्न कार्यक्रम गरी मनाइँदैछ । टेलिभिजनको महत्त्व, प्रभावकारिता र विश्व समुदायमा...

नागढुंगा–मुग्लिन सडकखण्ड दैनिक पाँच घण्टा बन्द हुने
नागढुंगा–मुग्लिन सडकखण्ड दैनिक पाँच घण्टा बन्द हुने
  • २०८३ श्रावण ८, ११: ३४

चितवन । नागढुंगा–मुग्लिन सडकखण्ड आजदेखि दैनिक पाँच घण्टा बन्द हुने भएको छ । जिल्ला प्रशासन कार्यालय चितवनले सूचना जारी गर्दै...