अविरल वर्षाले देशभरका प्रमुख राजमार्ग प्रभावित, धेरै सडक पूर्ण रूपमा अवरुद्ध – Naya Bikalpa
November 22, 2026, Sunday      Epaper

अविरल वर्षाले देशभरका प्रमुख राजमार्ग प्रभावित, धेरै सडक पूर्ण रूपमा अवरुद्ध

काठमाडौँ ।  लगातारको वर्षा, बाढी र पहिरोका कारण देशका विभिन्न राष्ट्रिय राजमार्गमा यातायात सेवा प्रभावित भएको छ। केही सडकखण्ड पूर्ण रूपमा अवरुद्ध भएका छन् भने बाढी र पहिरोको जोखिमलाई मध्यनजर गर्दै केही राजमार्गमा रातिको समयमा सवारीसाधन सञ्चालनमा रोक लगाइएको छ।

काभ्रेपलाञ्चोक र सिन्धुली जोड्ने बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमका कारण बेलुका ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ। अर्को सूचना जारी नभएसम्म बिहान ४ बजेदेखि बेलुका ६ बजेसम्म मात्र सवारीसाधन सञ्चालन हुने व्यवस्था गरिएको छ।

यस्तै, मकवानपुरस्थित कान्ति लोकपथमा पनि वर्षाका कारण बेलुका ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा रोक लगाइएको प्रहरीले जनाएको छ। यो निर्णय अर्को सूचना जारी नभएसम्म कायम रहनेछ।

उता, इलाम नगरपालिका–९ राजदुवाली क्षेत्रमा सडक हिलो भएपछि मेची राजमार्ग पूर्ण रूपमा अवरुद्ध भएको छ। प्रहरीले उक्त क्षेत्रमा वैकल्पिक सडक प्रयोग गर्न आग्रह गरेको छ।

सिन्धुपाल्चोकको अरनिको राजमार्ग पनि दुई स्थानमा पहिरोका कारण बन्द भएको छ। भोटेकोशी गाउँपालिका–४ जिरोकिलो क्षेत्रमा माथिबाट पहिरो खसेपछि सडक अवरुद्ध भएको हो। त्यसैगरी भोटेकोशी गाउँपालिका–२ कोदारी क्षेत्रमा ढुंगा, माटो र लेदो खसेपछि सडक पुनः बन्द भएको छ।

दोलखाको तामाकोशी गाउँपालिका–५ किर्नेटारस्थित लामाबगर–रामेछाप सडकखण्ड सामाकोशी खोलाले सडक कटान गरेपछि पूर्ण रूपमा अवरुद्ध भएको छ। यद्यपि खिम्ती ग्रामीण विद्युत् सहकारी संस्थाको कार्यालय परिसरबाट वैकल्पिक मार्ग सञ्चालनमा ल्याइएको छ।

रसुवाको गोसाइँकुण्ड गाउँपालिका–३ कुलुङ क्षेत्रमा लेदोसहितको पहिरो खसेपछि पासाङ ल्हामु राजमार्ग पूर्ण रूपमा बन्द भएको छ। साथै उत्तरगया गाउँपालिका–५ खाल्टेमा त्रिशूली नदीले सडक कटान गरेपछि त्रिशूली–मैलुङ–स्याफ्रुबेँसी कच्ची सडक पनि अवरुद्ध भएको छ।

यस्तै, मुस्ताङको बारागुङ मुक्तिक्षेत्र गाउँपालिका–३ चैलेस्थित घ्याकर खोलामा लेदोसहितको पानीको बहाव बढेपछि जोमसोम–कोरला सडकखण्ड पनि पूर्ण रूपमा अवरुद्ध भएको प्रहरीले जनाएको छ।

प्रहरीले यात्रा अघि सम्बन्धित निकायबाट सडकको पछिल्लो अवस्था बुझ्न, मौसमको जानकारी लिन तथा सम्भव भएसम्म वैकल्पिक मार्ग प्रयोग गर्न सर्वसाधारणलाई आग्रह गरेको छ।

सम्बन्धित समाचार

कस्तो रहला आजको मौसम ?
कस्तो रहला आजको मौसम ?
  • २०८३ श्रावण १०, ०९: ३०

काठमाडौं : हाल नेपालको पश्चिमी भू–भागमा पश्चिमी वायुको तथा पूर्वी भू–भागमा भारतको ओडिसा आसपास अवस्थित न्यून चापीय प्रणालीको आंशिक प्रभाव...

आजका लागि विदेशी मुद्राको विनिमयदर
आजका लागि विदेशी मुद्राको विनिमयदर
  • २०८३ श्रावण १०, ०९: ३०

काठमाडौं : नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ। राष्ट्र बैंकका अनुसार अमेरिकी डलर एकको खरिददर...

प्रधानमन्त्री शाह आज भारतको दुईदिने राजकीय भ्रमणमा जाँदै
प्रधानमन्त्री शाह आज भारतको दुईदिने राजकीय भ्रमणमा जाँदै
  • २०८३ श्रावण १०, ०९: ३०

काठमाडौं । प्रधानमन्त्री बालेन्द्र शाह आज भारतको दुईदिने राजकीय भ्रमणमा जाँदैछन् । भारतीय प्रधानमन्त्री नरेन्द्र मोदीको मैत्रीपूर्ण निमन्त्रणामा प्रधानमन्त्री शाह...