विद्यार्थीहरूका लागि सबैभन्दा ठुलो प्राविधिक कार्यक्रम हुदै

नयाँ विकल्प विशेष संवाददाता
प्रकाशित मिती: २०८० आश्विन २३, ०९: ३०

काठमाडौं । विद्यार्थीहरूका लागि सबैभन्दा ठुलो प्राविधिक कार्यक्रम आयोजना हुने भएको छ । कक्षा ४ देखि १२ सम्मका विद्यार्थीका लागि निमा एकेडेमीले ठुलो प्राविधिक कार्यक्रम आयोजना गर्न लागेको हो । विधार्थीको बीचमा रचनात्मकता, नवीनता र उद्यमशीलताको सिपलाई अभिवृद्धि गर्ने महत्त्वपूर्ण कदम अन्तर्गत प्रतियोगिता आयोजना गर्न लागेको एकेडेमीले जनाएको छ ।

प्रतियोगितामा रोबोटिक्स, कोडिङ र एआई च्याम्पियनसिप नेपालमा पहिलो पटक सुरुवात गर्न लागेको हो । यो प्रतियोगिता स्टेमपेडिया लगायत मोटवानी जडगेजा फाउन्डेसन, आर्टपपार्क, एआई र रोबोटिक्स टेक्नोलोजी पार्क तथा नीति आयोग द्वारा आयोजित संयुक्त राष्ट्रसङ्घीय दिगो विकास लक्ष्य (एसडीजीएस)सँग आवद्ध वार्षिक कार्यक्रम रहेको निमा एकेडेमीले जनाएको छ ।

दिगो भविष्यतर्फ विद्यार्थीको क्षमता उपयोगमा स्टेमपेडियाको विश्वव्यापी प्रभावलाई मान्यता दिँदै यस च्याम्पियनसिपको आयोजना गर्न लागेको हो । नेपालमै पहिलो पटक हुनलागेको अन्तर्राष्ट्रिय रोबोटिक्स, कोडिङ र एआई प्रतियोगिता एक ऐतिहासिक कोसेढुङ्गा हुने एकेडेमीका प्रमुख कार्यकारी अधिकृत निश्चल प्रधानले बताए ।

देशभरका १०० विद्यालयका करिब दुई हजार विद्यार्थीहरू सहभागी हुने अपेक्षा गरिएको कार्यक्रमका लागि ६ अक्टोबर २०२३ देखि ३० नोभेम्बर २०२३ सम्म सहभागी हुन आवेदन फाराम खुला गरिएकाे छ । राष्ट्रिय रूपमा चयन गरिएका कुल सहभागीहरुमध्ये ५० जना सहभागीहरूले निमा एकेडेमीमार्फत उद्योग विशेषज्ञहरूद्वारा परामर्श तथा मार्गदर्शन प्राप्त गर्ने बताइएको छ ।

जनवरी र फेब्रुअरी २०२३ को बिचमा आयोजना हुने तय गरिएको क्षेत्रीय प्रतिस्पर्धा समारोहमा उनीहरूलाइ सम्मान गरिने छ भने कुल ५० टिमहरूमध्ये शीर्ष १० टिमहरूलाई २०२४ अप्रिलमा दुबईमा हुने ग्रान्ड फिनालेको लागि छनोट गरिने जनाएकाे छ ।