अनुमानया भरय् सरकारबारे टीकाटिप्पणी मयायेत गृहमन्त्रीया इनाप

नयाँ विकल्प संवाददाता
प्रकाशित मिती: २०८२ असार २५, २२: ३९

येँ : प्रतिनिधिसभाया थौंया बैठकय् गृहमन्त्री रमेश लेखकं अनुमान व कल्पनाया भरय् सरकारबारे टीकाटिप्पणी मयायेत सकसित नं इनाप यानादीगु दु । बैठकय् सांसदतय्सं न्ह्यथंगु जिज्ञासाया लिसः बियादिसें वय्कलं फुक्क जानकारी मदयेकं सरकारया बारे टीकाटिप्पणी याये मज्यूगुलिइ बः बियादिल ।

गृहमन्त्रीं धयादिल, “हनेबहःम्ह प्रधानमन्त्रीया विदेश भ्रमण जूबलय् वय्कःलिसे हे प्रतिनिधिमण्डलय् वंपिं व्यक्तितय् बारे मन्त्रिपरिषदं निर्णय यायेधुंकाः जक वनी, प्रधानमन्त्रीलिसें भ्रमणय् वनादीपिंमध्ये सुसु लिहाँमवल वय्कःपिनिगु नां सार्वजनिक यानादिल धाःसा सरकारया अःपुइगु खः, उकिं प्रधानमन्त्रीया स्पेन भ्रमणया बारे मखुगु प्रचार जूगु दु ।”

वय्कलं छुं नं विषयकय् संसद् वा संसद् पिने न्ह्यसः थनेबलय् उकियाबारे फुक्क जानकारी दयेकाः जक न्ह्यसः थनेत इनाप यानादिल । वय्कलं धयादिल, “निलम्बित सांसद रवि लामिछानें छगू इलय् अमेरिका भिजिट भिसाय् वनादीगु धइगु खँ न्यनागु दु, भिजिट भिसाय् वनेगु धइगु भिजिटर हे खः, जित जानकारी बियादिसँ, वय्कः भिजिट भिसाय् वनादीगु खः कि मखु ?”

मन्त्री लेखकं सरकारं पूर्वसांसद, पूर्वमन्त्री व सुरक्षा बिइमाःपिं÷बिइम्वाःपिं सकसितं सुरक्षा बियाः सुरक्षाया दुरुपयोग जूगु धइगु प्रचारय् छुं नं सत्यता मदुगु ध्वाथुइकादिल ।