सवारी दस्तुरमा व्यापक वृद्धि, पाँच सय किलोमिटर सडकमा एक हजार

नयाँ विकल्प
प्रकाशित मिती: २०७५ चैत्र २५, ०७: २७

काठमाडौं । सुशासन र समृद्धिको नारा घोकाउँदै आएको केपी ओली नेतृत्वको सरकारले स्थानीय सडकमा समेत सवारी साधनसँगै हरेक पटक एक सयदेखि एक सय ६० रुपैयाँसमम रकम असुल गर्ने भएको छ ।

सरकारले स्थानीय तहले सडक प्रयोग गरेबापत उठाउँदै आएको सडक कर खारेज गरेपनि तीन वटा बस पार्क र तीन वटा सडक खण्डमा मात्र रकम असुल गर्दै आएकोमा चैत १४ गतेको मन्त्रिपरिषद् बैठकले डेढ दर्जन बढी सडकखण्डमा सडक दस्तुर निर्धारण गरेको छ ।

विगत १५ बर्षदेखि गैरकानुनी रुपमा इटहरी वसपार्क, हेटौंडा बसपार्क र नारायणघाटको पारस बसपार्कले भाडाका हरेक सवारी साधनबाट दस्तुर लिँदै आएका छन् । त्यस्तै, मुग्लिनदेखि नौविसे, नारायणघाटबाट हेटौंडा र नारायणघाटबाट बुटवल सडक खण्डप्रयोग गर्दा हरेक सवारीबाट सडक दस्तुर भन्दै सरकारले एउटै सवारीबाट ३० देखि १६० रुपैयाँसम्म उठाउँदै आएको छ ।

मन्त्रीपरिषदको गत साताको निर्णयपछि ति सडकखण्डमा सवारी साधनमा लाग्ने शुल्क बढाउनुका साथ थप १७ वटा सडकखण्डमा सवारी प्रयोग गरेबापत रकम असुल्ने निर्णय गरेको हो । यहाँसम्मकी काकरभित्तादेखि दमकसम्मको करिव ४५ किलोमिटर छोटो र सरल राजमार्गमा समेत बिना प्रयोजन सडक दस्तुर लिने निर्णय भएको छ ।

सञ्चार तथा सूचना प्रविधिमन्त्री गोकुलप्रसाद बास्कोटाका अनुसार हाल दस्तुर लिँदै आएको सडकका अतिरिक्त भैरहवादेखि मगैया सडकखण्डमा ठूला सवारीलाई ३०, साना सवारीलाई २० र टेम्पो तथा मोटरसाइकललाई १० रुपैयाँ, काकरभित्तादेखि दमकसम्म ठूला सावारीलाई ७५, साना सवारीलाई ३० र टेम्पो तथा मोटरसाइकललाई १० रुपैयाँ दस्तुर तोकिएको छ । दमकदेखि इटहरीसम्म ४५ किलोमिटरको सरल बाटोमा समेत ठूला सवारीलाई १२५, साना सवारीलाई ५० र टेम्पो तथा मोटरसाइकललार्ई १० रुपैया दस्तुर तोकेको छ ।

कोशी व्यारेजबाट चोहर्वासम्म करिव एक सय किलोमिटरको बाटोमा ठूला सवारीलाई १४०, साना सवारीलाई ४५ र टेम्पो तथा मोटरसाइकललाई १० रुपैयाँ दस्तुर तोकेको छ । चोहर्वादेखि पथलैयासम्मको दुई सय किलोमिटर सडकखण्डमा ठूला सवारीलाई १२५, सानालाई ४५ र टेम्पो तथा मोटरसाइकललाई १० रुपैयाँ निर्धारण गरेको छ । हेटौंडादेखि बिरगंज सडकखण्डको करिव ६० किलोमिटरको सडकमा ठूला सवारीसँग ५०, सानासँग २० र टेम्पो तथा मोटरसाइकलबाट १० रुपैयाँ दस्तुर उठाउने भएको छ ।

बीरगंज पथलैया सडक खण्डको करिव ३० किलोमिटरको सडकमा पनि ठूलालाई ५०, सानालाई २० र टेम्पो तथा मोटरसाइकललाई १० रुपैयाँ दस्तुर तोकिएको छ । त्यस्तै, धुलीखेलदेखि खुर्कोट सडकखण्डको करिव ८० किलोमिटर सडकमा ठूला सवारीलाई १२५, सानालाई ५० र टेम्पो तथा मोटरसाईकललाई १५ रुपैयाँ दस्तुर तोकेको छ । खुर्कोटबाट सिन्धुली हुँदै वर्दिवाससम्मको एक सय ७५ किलोमिटरको सडकमा भने ठूला सवारीसँग ११५, सानालाई ४५ र टेम्पो तथा मोटरसाईकलसँग १० रुपैयाँ दस्तुर लिने भएको छ ।

त्यस्तै, पाँचखालबाट मेलम्चीसम्मको करिव २५ किलोमिटरको सडकखण्डमा ठूला सवारीलाई ५० सानालाई १५ र टेम्पु तथा मोटर साईकललाई पाँच रुपैयाँ दस्तुर तोकेको छ । पथलैयादेखि काकरभित्तासम्मको सडकको अवस्था खासै खराव नभए पनि सरकारले कुनै मापदण्ड निर्धारण नै नगरी प्रदेश एक, दुई र तीनमा मात्र सडक दस्तुर कर निर्धारण गरेपछि सडक प्रयोगकर्ता भाडाका ट्रक, बस र अन्य सवारीले ढुवानी दर बढाउने निश्चित छ । नारायणघाटदेखि बुटबलसम्मको करिव एक सय ५० किलोमिटरको सडक खण्डले गण्डकी प्रदेश र प्रदेश पाँचलाई समेटेको छ ।

सम्बन्धित समाचार

सप्तकोशीमा जेटबोट दुर्घटना हुँदा तीन जनाको मृत्यु

२०७५ चैत्र २५, ०७: २७

काठमाडौं : भोजपुरको हतुवागढी गाउँपालिका–९, हसपुरस्थित कोप्चेबाट सुनसरीको बराहक्षेत्रतर्फ आउँदै गरेको जेटबोट दुर्घटनामा परेको छ । अरुण र दूधकोशीको संगम...