कर्णाली स्वास्थ्य प्रतिष्ठानलाई प्रभावकारी रुपमा सञ्चालन गछौं– प्रधानमन्त्री

नयाँ विकल्प संवाददाता
प्रकाशित मिती: २०८१ कार्तिक २८, १६: ३१

जुम्ला। प्रधानमन्त्री केपी शर्मा ओलीले कर्णाली स्वास्थ्य विज्ञान प्रतिष्ठानलाई थप प्रभावकारीरुपमा सञ्चालन गरी गुणस्तरीय शिक्षा र स्वास्थ्य सेवा दिइने बताएका छन्।

प्रतिष्ठानको प्रथम दीक्षान्त समारोहलाई सम्बोधन गर्दै प्रतिष्ठानका कूलपति समेत रहेका प्रधानमन्त्री ओलीले कर्णालीका जनताले आफ्नै ठाउँमा गुणस्तरीय स्वास्थ्य सुविधा पाउन थालेकामा खुसी व्यक्त गर्दै कर्णालीमा सय शैयाको अस्पताल बनाउने प्रक्रिया सुरु भइसकेको जनाए।

उनले प्रतिष्ठानमा आवश्यक सेवा, सुविधा उपलब्ध नेपाल सरकार प्रतिबद्ध रहेको बताए।

प्रतिष्ठानको परिकल्पनादेखि आफूू जानकार रहेको र चुनौतिका बीच विगतमा आफू प्रधानमन्त्री हुँदा चिकित्सा शिक्षा आयोगको बैठकबाट स्वीकृति गराएर प्रतिष्ठानमा चिकित्सा कक्षा सञ्चालन भई पहिलो दीक्षान्तसम्म आइपुुगेको भन्दै खुसी व्यक्त गरे।

उनले भने, अभिभावकको लगानी, आशा र विश्वासका साथै तपाईँहरुको मेहनत र लगावका कारण आज यो सफलता हासिल भएको छ। यस सफलतालाई दूरदराजका जनताको गुणस्तरीय स्वास्थ्य सेवा दिन लाग्नुुहोस्।’

दीक्षित विद्यार्थीलाई प्रधानमन्त्री ओलीले आग्रह गर्दै भने, म खुसी व्यक्त गर्न चाहान्छुु, कर्णाली अगाडि बढ्दैछ। कर्णाली र सुदूरपश्चिमका समेत गरी १३ जिल्लाका जनताले यहाँबाट स्वास्थ्य सेवा पाउनुु असम्भव जस्तै ठानिएको सपना पूरा भएको अवसर हो। यो सञ्चालनको दायित्व हाम्रो हो।’

संयुक्त राज्य अमेरिकाको हार्वड मेडिकल कलेज सेन्टर फर प्राइमरी केयर र सिस्टम स्ट्रेन्थेनिङका निर्देशक प्राडा क्रिस्टिन मसेङ्गर प्रमुुख अतिथि रहेको समारोहमा जनस्वास्थ्य, नर्सिङ र चिकित्साशास्त्र विषयमा स्नातक र स्नातकोत्तर तहमा अध्ययन पूरा गरेका ५८ विद्यार्थीलाई दीक्षित भएका छन्।

स्वास्थ्य तथा जनसङ्ख्यामन्त्री प्रदीप पौडेल, चिकित्सा शिक्षा आयोगका उपाध्यक्ष प्रा डा अञ्जनीकुमार झालगायत सहभागी थिए।