कोरनाबाट शनिबार तीनको निधन, काठमाडौमा ६२ संक्रमित थपिए

नयाँ विकल्प,

काठमाडौं । कोरोना भाइरसको संक्रमणबाट शनिवार तीन जनाको मृत्यु भएको छ भने राजधानी काठमाडौं उपत्यकामा ६२ जना संक्रमित थपिएका छन् ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार काठमाडौं, पर्सा र मोरङमा गरी तीन जनाको शनिबार मृत्यु भएको हो ।

काठमाडौंको टोखा नगरपालिका ६ बस्ने ४१ वर्षिय महिलाको शुक्रबार साउन २३ गते कोरोनाबाट मृत्यु भएको थियो । उनको पाटन अस्पतालमा उपचारका क्रममा मृत्यु भएको हो ।

वीरगंज महानगरपालिका ३ छपकैयाका ७४ वर्षीय पुरुषको पनि कोरोना संक्रमणबाट मृत्यु भएको छ । मधुमेह र दमका रोगी उनको गण्डक अस्थायी कोभिड अस्पतालमा उपचारका क्रममा मृत्यु भएको हो ।

विराटनगर महानगरपालिका ९ का ५८ वर्षका पुरुषको पनि साउन २३ गते शुक्रबार उपचारका क्रममा कोसी अस्पतालमा मृत्यु भएको छ । उनी उच्च रक्तचाप र निमोनियाका बिरामी थिए । योसँगै नेपालमा कोरोनाको संक्रमणबाट मृत्यु हुनेको संख्या ७३ पुगेको छ ।

शनिबार देशभर तीन सय ७८ जनामा कोरोना भाइरस संक्रमणको पुष्टि भएको छ । यो समेत नेपालमा कोरोना संक्रमितको संख्या २२ हजार पाँच सय सय ९२ पुगेको छ । देशभर छ हजार दुई सय ६ जना सक्रिय संक्रमित रहेको मन्त्रालयले जनाएको छ ।

शनिबार देशका विभिन्न अस्पतालबाट चार सय ९९ जना संक्रमित उपचारपछि निको भएर घर फर्किएका छन् । प्रदेश १ बाट ९ सय ४२, प्रदेश नम्बर २ बाट ३ हजार ३ सय २६, बागमती प्रदेशबाट ६ सय र गण्डकी प्रदेशबाट १ हजार ४ सय ४१ जना संक्रमित निको भएर घर फर्किएका छन ।

प्रदेश नम्बर ५ मा चार हजार एक सय ७९, कर्णाली प्रदेशमा एक हजार आठ सय ८७ र सुदूरपश्चिम प्रदेशमा तीन हजार नौं सय ३८ गरी हालसम्म १६ हजार तीन सय १३ जना संक्रमित डिस्चार्ज भएर घर फर्किएका छन् ।