सदनय् न्ह्यब्वःगु अध्यादेश पास जुइ : सञ्चारमन्त्री

नयाँ विकल्प संवाददाता
प्रकाशित मिती: २०८१ फाल्गुन १७, १९: ५५

कास्की : सञ्चार व सूचना प्रविधिमन्त्री नापं सरकारया प्रवक्ता पृथ्वीसुब्बा गुरूङं सरकारं सदनय् न्ह्यब्वःगु अध्यादेश पारित जुइ धकाः धयादीगु दु ।

पोखराय् च्वंगु हिमालय मिखा अस्पतालया ३२ क्वःगु वार्षिकोत्सवया थौं उलेज्या यानादिसें वय्कलं सुशासन प्रवद्र्धन व सार्वजनिक सेवायात प्रभावकारी यायेगु कथं सरकारं अध्यादेश हःगुलिं पारित यायेमाः धकाः धयादिल ।

सञ्चारमन्त्री गुरूङं छु धाःसा जनता लय्ताइ धकाः मखु, जनता छु ज्या याःसा लय्ताइ धकाः बिचाः यायेमाःगु धयादिल । “स्वास्थ्य ख्यः अस्तव्यस्त दु, शिक्षा ख्यः अथे हे दु । अस्तव्यस्ततादुने सुधार गथे यानाः यायेफइ धकाः अध्यादेश हःगु खः”, वय्कलं धयादिल । सुशासनबिना देय्या विकास जुइमखुगुलिं सुशासन प्रवद्र्धनया निंतिं तकं अध्यादेशं ग्वाहालि जुइगु वय्कःया विश्वास खः ।

मन्त्री गुरूङं धयादिल, “नेपालया ऐन, कानुनय् छक्वलं यक्व सुधार यायेमाःगु खनेदुगुलिं संवैधानिक प्रावधानकथं हे अध्यादेश हःगु खः । जिमित छु अनुभव दत धाःसा संसदं छगू विधेयक पास जुइत न्यादँ बिल । सुशासन दयेकातयेत व सार्वजनिक सेवायात प्रभावकारी जुइकेत १२ गू कानुन संशोधन यायेमाःगु आवश्यक जू । संशोधन मयाःसे सुशासन दइमखु, सार्वजनिक सेवा प्रवाह प्रभावकारी थत्थें हे यायेमाः । अध्यादेश पास जुइ, पास याके हे माः ।”

संसद् न्ह्यानाच्वंगु इलय् अध्यादेश हये मदइगु जुगुलिं नं सरकारं संसद् न्ह्याये न्ह्यः हःगु संसद् छले यानाः अध्यादेश हल धकाः चर्चा यायेगु आवश्यक मजूगु वय्कलं धयादिल । सञ्चारमन्त्री गुरूङं निजी ख्यलं न्ह्याकाः देय्या हे नमूना मिखा अस्पतालकथं दूगु हिमालय मिखा अस्पतालयात आवश्यक ग्वाहालि यायेगु प्रतिबद्धतातकं प्वंकादिल ।

“पोलिसीइ ह्यूपाः यायेमाःगु दु धाःसां नं याये, हिमालय मिखा अस्पतालप्रति जिगु मतिना व ममता दु । स्वास्थ्य ख्यलय् ब्यूगु योगदान व बांलाक अस्पताल चले याःगुलिं लसंहनाच्वना । जिगुपाखें भौतिक पूर्वाधारलिसें आवश्यक जुइगु ग्वाहालि बिइ”, वय्कलं धयादिल ।

देय्, जनता, व्यवस्था, शान्ति सुव्यवस्था व राष्ट्रिय एकता छ्वासुकीगु ज्याखँ दिकेत सामाजिक सञ्चालन नियमन विधेयक हःगु मन्त्री गुरूङं धयादिल । वय्कलं सरकारं अभिव्यक्ति स्वतन्त्रता व प्रेस स्वतन्त्रतायात हनन यायेत्यंगु मखु धयादिसें विधेयकय् न्ह्यथनातःगु दण्ड सजायया बारे सहलह नापं परिमार्जन जुइफइगु खँ कनादिल ।

ज्याझ्वलय् अस्पतालया पूर्वनायः डा दिलबहादुर क्षेत्री, गण्डकी प्रदेशसभा दुजः भीम कार्की, अस्पताल व्यवस्थापन समितिया नायः नापं नेपाल नेत्रज्योति सङ्घया नायः सुरेन्द्र थापामगर, अस्पतालया मेडिकल डाइरेक्टर डा बबिता गुरूङ, पत्रकार महासङ्घया नायः माधव बराललिसेंतय्सं अस्पतालया स्थायित्वया निंतिं गण्डकी प्रदेश सरकारं स्वामित्व कायेमाःगुलिइ बः बियादिल । उगु ज्याझ्वलय् सापु रोगसम्बन्धी सचेतना भिडियो धेंधेंबल्लाय् त्याःपिं विद्यार्थी व च्वन्ह्याःपिं कर्मचारीतय्त नं हंगु खः ।

सम्बन्धित समाचार

बुद्ध जयन्तीकै दिन भत्काइयो गुम्बा

२०८१ फाल्गुन १७, १९: ५५

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...