कांग्रेसमा विभाग गठन विवादमा

देउवाले गठन गरेको विभाग खारेज गर्न १२ युवा नेताको दबाब

नयाँ विकल्प,

काठमाडौँ । नेपाली काँग्रेसका प्रभावशाली नेता गगन थापा र प्रदीप पौडेल लगायतका १२ युवाले पार्र्टी सभापति शेरबहादुर देउवाले गठन गरेको १८ वटा बिभाग खारेज गर्न माग गरेका छन् ।

पार्टीका सबै तहको अधिवेशनको मिति तोकिसकेपछि विभाग गठनको नाममा विभिन्न पदमा गरिएको नियुक्तिले महाधिवेशनको आचारसंहिताको ठाडो उलंघन गरेकाले सवै नियुक्ति खारेज गर्न उनीहरुले माग गरेका छन् ।

पार्टी केन्द्रीय सदस्यहरु थापा, पौडेल, डा. चन्द्र भण्डारी, धनराज गुरुङ, कमला पन्त, गुरुराज घिमिरे, बद्री पाण्डे, रत्ना शेरचन, जीवन परियार, सरिता प्रसार्इं, रामकृष्ण यादव र किरण यादवले अवैध तरिकाले गठन गरिएको विभागहरुमा नबस्न सवैलाई आह्वान समेत गरेका छन् ।

उनीहरुले मंगलबार संयुक्त वक्तव्य जारी गर्दै विभागहरु गठन गरिनु पार्टीको काम गर्न भन्दा पनि महाधिवेशनलाई प्रभावित पार्ने नियतले भएको अवैधानिक कदम भनेका छन् ।

तत्कालिन सभापति सुशिल कोईरालाको कार्यकालमा पदाधिकारी, समिति र बिभाग गठनमा दुई बर्ष मात्र ढिलो हुँदा देउवाले नै असहमति जनाएकाले तत्काल निर्णय फिर्ता लिएको तर अहिले भने कार्यकाल समाप्त भइसकेपछि गरिएका निर्णयहरु कसरी बैधानिक भए ? भनी उनीहरुले प्रश्न गरेका छन् ।

‘हाम्रो सम्पूर्ण ध्यान र शक्ति मर्यादित, निष्पक्ष, विश्वसनीय र भब्य महाधिवेशन सम्पन्न गर्नमा लगाउनु पर्ने होइन र ? बिभागहरुले आफ्ना काम कहिले गर्ने ? महाधिवेशनको औपचारिक प्रक्रिया शुरु भएपछि पार्टिका साथिहरुमा तिक्तता बढाएर पक्ष र विपक्ष खडा गर्नुको उद्देश्य के हो ? यसबाट महाधिवेशनको निष्पक्षतामा प्रश्न उठेको छ’, वक्तव्यमा भनिएको छ ।

सभापति देउवाले विवादास्पद र अवैधानिक कार्यहरु गरिरहेकाले महाधिवेशन निर्धारित समयमा हुनेमा र निश्पक्ष हुनेमा समेत उनीहरुले आशंका व्यक्त गरेका छन् । पार्टी नेतृत्वप्रति धेरै दृष्टीकोणबाट असक्षमताका प्रश्नहरु उठिरहेकाले आफुहरु नेतृत्वलाई चुनौती दिनेगरी उत्रिन तयार रहेको चेतावनी ती युवा नेताहरुले दिएका छन् ।

काँग्रेसप्रतिको जनताको भरोसा कमजोर हुदै गएको र पार्टीको गौरवपूर्ण छवि, व्यक्तित्व र कान्ति ह्रासोन्मुख हुँदै गएको भन्दै ती युवा नेताहरुले काँग्रेसको नेतृत्वले अहिले लोकतन्त्रको विधिसम्मत बाटो छाडेर आफ्नो र गुटको क्षुद्र स्वार्थमा केन्द्रित हुन थालेको र पार्टीको पहिचान र परम्पराको सट्टा अराजकता तर्फ उन्मुख भएको आरोप लगाएका छन् ।

पार्टी सभापति विधानको संरक्षक र पालक हुनुका साथै व्यक्ति नभई संस्था भएकाले कांग्रेसको इतिहास, बिरासत, परम्परा र पद्दतिलाई उल्लंघन गर्ने सुविधा सभापतिलाई नभएको र अस्वस्थ भागबण्डालाई संस्कृति बनाएर पार्र्टीका संघर्षशील साथीहरुलाई समान अवसर र न्यायबाट बञ्चित गर्ने अधिकार सभापतिसँग नभएको उनीहरुले स्मरण गराएका छन् ।

देउवाको व्यवहार र पार्टीको सिद्धान्तका बीचमा पटक्कै तालमेल नदेखिएको र मनोगत चाहनामा पार्टी चलाउने विशेषाधिकार नभएकोले देउवाको व्यवहारले गैरलोकतान्त्रिक शक्तिहरुसँग लोकतान्त्रिक मुल्य मान्यताको बिषयमा बहस गर्ने आफुहरुको नैतिक धरातल अत्यन्त कमजोर हुन पुगेको भन्दै चिन्ता व्यक्त गरेका छन् ।