आज विश्व सम्पदा दिवस मनाइँदै

नयाँ विकल्प
प्रकाशित मिती: २०८२ बैशाख ५, ०७: ४०

काठमाडौं । सम्पदाको संरक्षणका लागि जनचेतना फैलाउने उद्देश्यले अप्रिल १८ तारिखका दिन आज विश्व सम्पदा दिवस मनाइँदै छ ।

संयुक्त राष्ट्रसंघीय शैक्षिक, वैज्ञानिक तथा सांस्कृतिक संस्था (युनेस्को) अन्तर्गत रहेका विश्व सम्पदा क्षेत्रको संरक्षण गर्ने उद्देश्यले सन् १९८३ देखि यो दिवस मनाउन थालिएको हो । कुनै पनि मुलुकको ऐतिहासिक, धार्मिक र प्राकृतिक सौन्दर्य अर्थात महत्व झल्काउने स्थल या संरचनाहरू त्यहाँका सम्पदा हुन् । नेपालका काठमाडौँ (वसन्तपुर, पाटन र भक्तपुर दरबार क्षेत्र, चाँगुनारायण, पशुपतिनाथ, बौद्ध, स्वयम्भू), लुम्बिनी तथा चितवन र सगरमाथा राष्ट्रिय निकुञ्ज सूचीकृत रहेका छन् ।

यस अवसरमा आज बिहान राजधानीमा सम्पदा पदयात्रा गर्न लागिएको पुरातत्व विभागले जनाएको छ । विश्व सम्पदा दिवसका लागि विभिन्न रचनात्मक कार्य समितिले गर्ने जनाएको छ ।विश्व सम्पदा दिवस नेपालको लागि केवल एक अन्तर्राष्ट्रिय दिवस मात्र होइन, यो आफ्नै पहिचान, आत्मा र संस्कृतिको पुनर्जागरणको अवसर हो । चोरी भएका मूर्तिहरूको पुनःस्थापना केवल भौतिक सम्पदाको फर्काइ मात्र होइन, यो नेपाली जनताको आत्मसम्मान र सांस्कृतिक पुनर्जागरणको प्रतीक हो ।यस दिवसमा हामीले हाम्रो सम्पदाको संरक्षणमा प्रतिबद्धता जनाउँदै भविष्यका पुस्ताहरूलाई समृद्ध सांस्कृतिक विरासत सुम्पनु आवश्यक छ ।

संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेको उपस्थितिमा हुने पदयात्रामा संस्कृतिकर्मी एवं सांस्कृतिक संस्थाको पनि सहभागिता रहने जनाइएको छ । स्वयम्भूको भुइँखेलबाट सुरु हुने पदयात्रा हनुमानढोका दरबार क्षेत्रमा आएर समापन हुने उनले सुनाए । स्वयम्भूको भुइँखेलबाट सुरु हुने पदयात्रा हनुमानढोका दरबार क्षेत्रमा आएर समापन हुनेछ ।