मस्तय्त जुइगु यौन हिंसा अन्त्य यायेत वँचुगु कुसा अभियान

नयाँ विकल्प संवाददाता
प्रकाशित मिती: २०८२ बैशाख ३१, २०: ५०

येँ : मस्तय्त जुइगु यौन हिंसा व शोषण किचलय् लाकातःगु दु । मचा सः (भ्वाइस अफ चिल्डेन) पाखें थौं ‘मस्तय्त जुइगु यौन हिंसाविरुद्ध वँचुगु कुसा अभियान’ विषयया ज्याझ्वलय् मस्तय्त यौन हिंसा, दुर्व्यवहार, शोषण जुयाच्वंगु तर उकियात गम्भीर जुइक कयाच्वंगु मदु धकाः न्ह्यथंगु खः ।

मचा परिषद्या सदस्य सचिव इन्द्रादेवी ढकालं मस्तय्गु पीडा थूपिं व न्यनीपिं तसकं म्ह्वः जूगु अवस्था जुयाच्वंगु व यौन हिंसाया सिकार मिसामचा जक जुइ धइगु बिचाः दथुइ सन् २०२१ निसें वँचुगु कुसा दिवस न्यायेकाःतिनि मस्तय्त हिंसा जुइगु खँ पिहाँवःगु धकाः धयादिल ।

“मस्तय्त जुइगु यौन हिंसाया घटनायात वँचुगु कुसा अभियानं हलिमय् च्वयेकूगु दु, कानुनी मान्यताया ल्वापुइ नं जुयाच्वंगु दु”, वय्कलं धयादिल, “नेपाः नं थ्व अभियानय् वनाच्वंगु दु ।”

मस्तय्गु संरक्षणया निंतिं सुरु जूगु ल्हाःचिं अभियान थप महत्वपूर्ण जूगु व कानुनी मान्यतालिसें पुचःया कुतलं जक मचाअधिकार सुरक्षित जुइ व अभियानय् दक्व ख्यःया सक्रियता आवश्यक जूगु वय्कःया धापू खः । “मस्तय्गु संरक्षणया निंतिं कानुन संशोधनय् वंगु दु”, सदस्य सचिव ढकालं धयादिल, “परिषद् कानुन संशोधन यायेत प्रतिबद्धता दु ।”

सन् २०२५ य् सार्वजनिक जूगु ल्यासेन्ट पब्लिकेसनय् पिकाःगु अध्ययनया रिपोर्टकथं हलिमय् १४.८ प्रतिशत मिजमस्त १८ दँ दये न्ह्यः हे यौन हिंसा फयेमाःगु तथ्याङ्क सार्वजनिक जूगु दु ।

सूचना प्रविधिया छ्यलाबुलालिसें हे मस्त यौन हिंसाया जोखिमय् लानाच्वंगु दु । नेपाल प्रहरी साइबर ब्युरोया तथ्याङ्ककथं आर्थिक दँ २०७९/८० य् मुक्कं १७६ म्ह मस्त (मिजंमचा ५१ म्ह व मिसामचा १२५ म्ह) साइबर अपराध पीडित जूगुलिइ आर्थिक दँ २०८०/२०८१ य् २५३ म्ह मिजंमचा व ल्यंदुपिं ३८२ म्ह मिसामचा जूगु लुइकूगु दु ।

मचा सःया निर्देशक राजु घिमिरें मिसा, मचाल्यासे, मिसामचातय्त जक यौन हिंसा जुइ धइगु थुइकाच्वंगुलिइ मिजंमचा वा काय्मचा नं यौन हिंसाय् लायेफइगु जूगुलिं बिस्कं कानुन आवश्यक जूगु धयादिल । वय्कलं मस्तय्त जुइगु यौन हिंसाबिरुद्ध वँचुगु कुसा अभियान सञ्चालन जूगु धकाः धयादिल ।

नेपालं संयुक्त राष्ट्रसङ्घीय मचाअधिकारसम्बन्धी महासन्धि १९८९ य् प्रतिबद्धता प्वंकाः ल्हाःचिं तःगु ३६ दँ पूवंगु दु । नेपाःया संविधान २०७२ पाखें मचाअधिकारयात मौलिक हककथं तयातःगु दु । मस्तसम्बन्धी ऐन २०७५, मस्तसम्बन्धी नियमावली २०७८ लिसें थी थी मचासंरक्षणसम्बन्धी दर्जनौँ कानुनत, निर्देशिका, कार्यविधि दयेकूगु जूसां नं प्रभावकारी जुइक कार्यान्वयन जुइमफुबलय् मस्त यौन दुव्र्यवहार, हिंसा व शोषणय् लानाच्वंगु खः ।

सञ्चारकर्मी कीर्ति भट्टराईं ‘मिजंमचातय्त जुइगु यौन हिंसाविरुद्ध वँचुगु कुसा अभियान’ विषयया ज्यापौ प्रस्तुत यानादिसें हिंसा व दुव्र्यवहार सहयायेमफयाः गुलिखे मिजंमस्त आत्महत्या यायेगुतक अवस्थाय् थ्यंगु धयादिल ।

थ्व अभियानयात सफल दयेकेत नेपालं सन् २०२४ य् सुरु याःगु ल्हाःचिं सङ्कलन अभियान २०२५ सेप्टेम्बरतक अनलाइन व अफलाइन माध्यमपाखें ४० द्वः थ्यंकेगु आज्जु तयातःगु दु ।

वय्कलं काय्मस्त यौन हिंसाय् लाइमखु धइगु बिचाः आम मनूतय्के दयाच्वंगु जूसां नं पीडित मिजंमस्तय्त न्याय बिइफूगु अवस्था दूगु व शिक्षा व कानुनय् नं नकतिनि धइथें संशोधन जूगु व मिसामचा धयातःगु थासय् संशोधित कानुनय् मस्त धइगु खँग्वः छ्यःगु जानकारी नं बियादिल ।

सन् २०२१ अप्रिल २६ तारिखयात भ्वाइस अफ चिल्डेनं सचेतना दिवसकथं न्यायेकावयाच्वंगु दु । मिजंमचायात नं यौन हिंसा जुइ धइगु सन्देश ज्वनाः चित्रकला प्रदर्शन व थी थी माध्यमं सचेतना थनेगु ज्या जूगु धाःगु दु ।

खोजतलास केन्द्रया प्रहरी नायब उपरीक्षक (डिएसपी) महेश थापां प्रहरीइ दर्ता याः वःगु मुद्दायात झीसं गम्भीर जुइक अध्ययन यानाः पीडकयात कानुनी कारबाहीया दायराय् हयाच्वंगु जानकारी बियादिल ।

ब्वति काःपिंसं नेपाःया मस्तय्गु यौन दुव्र्यवहारया विषयकय् थप अनुसन्धान यायेमाःगु व थप पीडित जुइकेमबीकेगुपाखे सकसिनं ध्यान बिइमाःगुलिइ बः ब्यूगु खः ।

सम्बन्धित समाचार

बुद्ध जयन्तीकै दिन भत्काइयो गुम्बा

२०८२ बैशाख ३१, २०: ५०

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...