छथाय् हे द्वःछि व ७१७ म्हेस्यां हि दान यानाः न्हूगु ‘रेकर्ड’ तल

नयाँ विकल्प संवाददाता
प्रकाशित मिती: २०८२ असार १, २१: ०१

भरतपुर : थन ग्वसाः ग्वःगु हि दान महोत्सवय् द्वःछि व ७१७ म्हेस्यां हि दान याःगु दु । ब्लड डोनर्स सोसाइटी नेपाल चितवन शाखापाखें शनिबाः ग्वसाः ग्वःगु उगु महोत्सवय् जिल्लाया न्हय्गूलिं पालिकाया हि दाता तय्सं ब्वति काःगु खः । मुंकूगु हि मध्ये नेपाल रेडक्रस सोसाइटी प्रादेशिक रक्तसञ्चार केन्द्र भरतपुरं द्वःछि व ५३६ युनिट व भरतपुर अस्पताल ब्लड बैंकं सच्छी व ८१ युनिट हि ‘स्टोर’ याःगु दु ।

जुन १४ य् अन्तरराष्ट्रिय रक्तदाता दिवस लाः । वहे अवसर लाकाः सोसाइटीं उगु महोत्सव ग्वसाः ग्वःगु खः । “वासः यायेगु झ्वलय् हि मालिबलय् अभाव जुइगु याइ । अथे खःसां हि दान यायेज्यूपिं यक्वःस्यां हि दान याःगु खनेमदु । हि दान यायेत न्ह्यचिलेगु सन्देश बिइत थ्व तःधंक ज्याझ्वः ग्वसाः ग्वयागु खः”, सोसाइटीया चितवन नायः लिसें मूल समारोह समितिया ज्याझ्वः कजि एकराज बुर्लाकोटीं धयादिल ।

‘रक्तदान महोत्सवं’ छन्हूं हे छथाय् न्ह्याकूगु हि दान ज्याझ्वःमध्यय् नेपाःया हे दकसिबे अप्वः हि सङ्कलन जूगु राष्ट्रिय रेकर्डनापं तःगु सोसाइटीया छ्याञ्जे लिसें प्रचार समितिया कजि विपिन पाठकं धयादिल । थ्वसिबें न्ह्यः लायन्स क्लब अफ येँलिसेंया संस्थां २०७४ फागुन १५ गते विश्व कीर्तिमान तयेगु तातुनाः येँया तिंख्यलय् द्वःछि व ५०० पिन्ट हि सङ्कलन याःगु वय्कलं धयादिल ।