विश्व समुदाययात परराष्ट्रमन्त्रीया आह्वान : जलवायुजन्य जोखिम पाः यायेत धिसिलाःगु सहकार्य आवश्यक जू

नयाँ विकल्प संवाददाता
प्रकाशित मिती: २०८२ असार १६, २१: ४५

येँ : परराष्ट्रमन्त्री डा आरजु राणा देउवां जलवायुजन्य जोखिमयात पाः यायेत थुकिं प्रभावित जुयाच्वंगु देय्तय् दथुइ क्वातूगु सहकार्य आवश्यक जूगु धयादीगु दु । इटालीया रोमय् जुयाच्वंगु राष्ट्रसङ्घीय खाद्य नापं कृषि सङ्गठनया ४४ क्वःगु महासभाअन्तर्गत थौं ग्वसाःग्वःगु तसकं म्ह्वः विकसित देय् नापं भूपरिवेष्ठित व चिचीधंगु टापू देय्तलिसे सम्बन्धित उच्चस्तरीय सत्रयात संबोधन यासें वय्कलं जलवायुजन्य जोखिमयात पाः यायेगु योजनाय् क्वातूगु सहकार्यया नितिं आः लिबाके मज्यू धकाः धयादिल ।

वय्कलं धयादिल, “तसकं म्ह्वः विकसित, भूपरिवेष्ठित व चिचीधंगु टापू देय्त जलवायु ह्यूपाःया तःधंगु जोखिमय् लानाच्वंगु दु । थुकिं उगु देसय् कृषि उत्पादन व जिवीकोपार्जनय् नं बांमलाःक असर यानाच्वंगु दु । थःगु एजेण्डापाखें विश्वय् सहकार्य यायेत नेपालं छवाःनिवाः धइथें न्ह्यः सगरमाथा संवाद क्वचायेकूगु खः । वइगु इलय् दक्व देय्तदथुइ मंकाः एजेण्डालिसें सहकार्य यायेगु जरुरी जू ।”

परराष्ट्रमन्त्री डा देउवां च्वापुगुँया देय्तय् नितिं जलवायु अनुकूलन वित्तीय ग्वाहालि, न्हापांगु चेतावनी प्रणाली व ग्रामीण पूर्वाधारतय्गु विकास आवश्यक जूगुलिइ नं बः बियादिल । जलवायुजन्य जोखिमलिसे हाथ्या यायेत सर्वसुलभ व समावेशी उपायलिसें अन्तर्राष्ट्रिय लगानी व क्षमता विकासया ज्या मजिमगाःगु वय्कलं धयादिल ।

मन्त्री डा राणां धयादिल, “प्रविधि, सहकार्य व ऐक्यबद्धतां जक सम्भावना व उपलब्धि दथुइया गाः ल्हाकेफइ । नेपालं दक्षिण–दक्षिण व उत्तर–दक्षिण ग्वाहालि प्रवद्र्धन, प्रविधि स्थानान्तरण, बजाः चकंकेगु नापं वित्तीय स्रोतय् पहुँचया नितिं न्ह्याबलें इनाप यानावयाच्वंगु दु ।”

थौंकन्हय् नेपाललिसेंया थुगु देय्तय्सं खाद्य असुरक्षा, कुपोषण, जलवायु ह्यूपाःथेंजाःगु मंकाः सङ्कटया सामना यानाच्वंगु व थुकिं जूगु उपलब्धियात नं खतराय् लाकाच्वंगु वय्कलं धयादिल । मन्त्री डा राणां नेपालं जलवायुजन्य विपद्, बःमलाःगु पूर्वाधार, जैविक विविधताया क्षय, प्रविधि नापं वित्तय् सीमित पहुँचथेंजाःगु बहुआयामिक हाथ्यातय् सामना यानाच्वंगु धयादिल ।

वय्कलं एफएओपाखें न्ह्याकूगु ‘फोर बेटर’ अथे धइगु ‘भिंगु प्यंगू’ थें हे बांलाःगु उत्पादन, बांलाःगु पोषण, बांलाःगु वातावरण व बांलाःगु जीवनं कृषि प्रणालीइ रुपान्तरणया नितिं महत्त्वपूर्ण भूमिका म्हितेफइ धकाः धयादिल । मन्त्री डा राणां बांलाःगु उत्पादनअन्तर्गत नेपालं जलवायुमैत्री खेती प्रणाली, पहाडी लागाय् अप्वः मू वंगु बाली व स्थानीय नवीनता नापं कृषिइ आधुनिकीकरण यानाच्वंगु व बांलाःगु पोषण अन्तर्गत विशेष समुदायतय्त ताःतयाः पोषिलो खाद्यान्न प्रवद्र्धन यानाच्वंगु धयादिल ।

अथे हे बांलाःगु वातावरणअन्तर्गत नेपालं पुनःप्रजनन कृषि, चा नापं लः व जैविक विविधता संरक्षणय् प्राथमिकता ब्यूगु व बांलाःगु जीवनपाखे मिसा, युवालिसें चीधंपिं किसान लिसें सीमान्तकृत समुदायतय्त उद्यमशीलता, सामाजिक सुरक्षा, ग्रामीण पूर्वाधार व सेवाय् पहुँच तब्याकाः जीविकोपार्जनय् सुधार हया धइगु मन्त्री डा राणाया धापू दु ।

मन्त्री डा राणां कृषि ख्यलय् नेपालय् ६० प्रतिशतस्वयां अप्वः जनशक्ति संलग्न जुयाच्वंगु व राष्ट्रिय उत्पादनय् कृषिया २३ प्रतिशत योगदान दूगु न्ह्यथनादिसें कृषि रोजगारीया माध्यम जक मखुसे पोषण व जीवनयापनया माध्यम जूगु नं धयादिल ।