अरनिको राजमार्गया धौख्यः–साँगा सतकब्वय् ज्या दिकल

नयाँ विकल्प संवाददाता
प्रकाशित मिती: २०८२ असार १९, २१: २५

काभ्रेपलाञ्चोक : स्तरोन्नती जुयाच्वंगु अरनिको राजमार्गअन्र्तगत साँगा–धौख्यः सतकब्वया ज्या वा वःगुलिं दिकूगु दु । मनसुन वनेधुंकाः हाकनं ज्या न्ह्याइगु आयोजनां धाःगु दु ।

उगु सतकब्वया पुलबजार लागाय् धाःसा स्थानीयतय् अवरोधं यानाः प्यलान्ह्यःनिसें ज्या जुइफूगु मदुनि । उगु लागाया थ्यंमथ्यं २ सः मिटर लागाय् तब्याकेगु ज्या दिनाच्वंगु सतक विभागया सूर्यविनायक–धौख्यः, धौख्यः–सिन्धुली–बर्दिबास सतक आयोजनां धाःगु खः । ज्याकुथिया कथं धौख्यलय् छगू किलोमिटर मू सतक पक्की याःसां नं मनसुनं यानाः थप पक्की यायेफूगु मदु ।

दक्व सामग्री तयारी अवस्थाय् दःसां नं वाः वःगुलिं धौख्यलं भ्वँतपाखेया सतक नापं भ्वँतया जनागाल लागाय् छगू किमी सतक पक्की मजूनिगु आयोजनाया इन्जिनियर विष्णुप्रसाद खनालं जानकारी बियादिल ।

खनालया कथं सतक तब्याकेगुलिसें भ्वँतया लागाय् थ्यंमथ्यं ५० गू बिजुलीया पोल चीकेमाःगु नापं २८ किमीइ छखाछेँ चीकेगु ज्या नं दिनाच्वंगु खः । भ्वँत सहरया प्यखेरं चण्डेश्वरी खुसिंनिसें भ्वँतया चुकया प्यकालँतक थ्यंमथ्यं छगू किमी सतकया ढल निर्माण ज्या जुयाच्वंसां नं वा वःगुलिं ज्या दिनाच्वंगु खः । पुलबजार लागाय् धाःसा ‘सेन्टर लाइन’या विषययात कयाः स्थानीयतय्सं अबरोध याःगुलिं प्यलान्ह्यःनिसें तब्याकेगु ज्या हे दिनाच्वंगु खः । सेन्टर लाइनपाखें जःखः ७५÷७५ फिट (सच्छि व ५० फिट)मध्ये नं सच्छि व ४० फिटय् ज्या जुयाच्वंगुलिइ स्थानीयतय्सं निखेरंया छेँपाखें बराबर छुटे यायेमाःगु विषयकय् विवाद पिकयाः निर्माण ज्या अबरुद्ध याःगु खः ।

सतकया डिजाइन कथं हे सतकया दथुं बराबर छुटे याइगु जूगुलिं स्थानीयतय्सं छेँया दुरीइ बराबर यायेमाः धयाः विवाद सिर्जना याःगुलिं निर्माण ज्या दिनाच्वंगु खनालं कनादिल । वय्कःया कथं तक्वःमछि याःगु सरोकारवालालिसें भ्वँत नगरपालिकाया जनप्रतिनिधि व स्थानीयतदथुइ जूगु सहलहं छुं नं लिच्वः पिकाये फूगु मदुनि । स्थानीयतय् अवरोधलिसें मापदण्डदुनेया छेँ–टहरा चीकेमाःगु, बिजुलीया पोल तब्याकेगु, अप्टिकल फाइबर, हाइटेन्सनया पोल लिकायेमाःगु ज्या दिनाच्वंगु धाःगु दु । पुलबजार लागाय् अवरोध जूगुलिं भ्वँतया मू सहर लागाय्तकं निर्माण ज्या दिनावयाच्वंगु खः ।

थ्व हे दथुइ अरनिको राजमार्गअन्तर्गत ख्वपया सूर्यबिनायकनिसें काभ्रेपलाञ्चोकया धौख्यलय्तकया सतक खुगू लेनय् तब्याकेगु ज्या इलय् हे क्वचाइमखुगु जूगु दु । आयोजनां ल्यंदनिगु थ्यंमथ्यं खलाया इलय् तब्याकेगु ज्या सिधइमखु धकाः धायेधुंकूगु खः । वि.सं. २०७९ पुस २४ निसें सुरु याःगु १६ किलोमिटर ताःहाकःगु थ्व सतक ३६ ला दुने पूवंकेगु आज्जु कयातःगु खः । उगु सतकब्व सूर्यविनायकं साँगातक व साँगां धौख्यःतक यानाः निब्वय् ब्वथलाः उगु कथं ठेक्का सम्झौता जुयाः तब्याकेगु ज्या जुयाच्वंगु खः ।

थौंतक निब्वया तब्याकेगु ज्या ५० प्रतिशतया लिक्क ज्या जुइधुंकूगु आयोजनां धाःगु खः । उगु आयोजनाअन्तर्गत न्हापांगु चरणय् साँगांनिसें धौख्यः ८.४ किमी सतकब्व तब्याकेगु ज्याया निंतिं ४ अर्ब ५ क्वति ६४ लख ध्यबाय् व निगूगु चरणय् सुरु जूगु सूर्यविनायक–साँगा सतकब्व ३ अर्ब ८८ क्वति ९३ लख ध्यबाय् सम्झौता जूगु खः ।

आयोजनाया सिनियर डिभिजनल इञ्जिनियर नापं सूचना अधिकारी सजना अधिकारीया कथं क्वःछिनातःगु ईदुने तब्याकेगु ज्या सिधइमखुगुलिं ई थपे यायेमालीगु जूगु दु । वय्कःया कथं मापदण्डदुनेया छेँ–टहरा थुनेत, सिमा, विजुलीया पोल नापं अप्टिकल फाइबरया केबल प्रतिस्थापन यायेमाःगुलिं इलय् ज्या सुरु यायेमफूगु खः । अथे हे साँगाँ–धौख्यः ब्वय् भ्वँतया सहरी लागाय् ताँलिसें व्यक्तिगत छेँया विवाद नापं मापदण्डदुने लाःगु छेँ थुने मफुगुलिं लिबाःगु अधिकारीया धापू खः । क्वःछिनातःगु ईतकया दुने थ्यंमथ्यं ६५ प्रतिशत भौतिक निर्माण जुइ धकाः धाःगु दु ।