परराष्ट्रमन्त्री डा राणा व जर्मनीया विदेशमन्त्रीदथुइ निगूपक्षीय खँल्हाबल्हा

नयाँ विकल्प संवाददाता
प्रकाशित मिती: २०८२ असार २४, २१: १६

येँ : परराष्ट्रमन्त्री डा आरजु राणा देउवा व जर्मनीया विदेशमन्त्री डा जोहान डेविड वेडफुलदथुइ थौं निगूपक्षीय खँल्हाबल्हा जूगु दु । जर्मनीया बर्लिनय् नापलायेगु झ्वलय् नेपाल जर्मनी सम्बन्ध, निगूपक्षीय हित व मंकाः च्यूताःया थी थी विषयकय् खँल्हाबल्हा जूगु खः ।

उगु झ्वलय् मन्त्री डा राणां जर्मनी नेपाःया तःधंगु व पुलांगु विकास नापं व्यापार साझेदारमध्ये छगू मू देय् खः व जर्मनीपाखें आर्थिक, सामाजिकलिसेंया ख्यलय् मद्दिक ग्वाहालि दयाच्वंगु लुमंकादिसें जर्मनी सरकार नापं जर्मन नागरिकतय्त सुभाय् देछानादिल ।

मन्त्री डा राणां नेपाः व जर्मनीदथुइया निगूपक्षीय व्यापार–व्यवसाययात अझ प्रवद्र्धन यायेत सामूहिक कुतः जुइमाःगु व निगुलिं देय्या निजी ख्यःदथुइया सञ्जालयात हःपाः बिइमाःगुलिइ बः बियादिसें नेपालय् रासायनिक मल उत्पादन कारखानालिसेंया ख्यलय् जर्मनीया लगानीया निंतिं इनाप यानादिल ।

उगु झ्वलय् मन्त्री डा राणां सन् २०२६ य् तसकं म्ह्वः विकसित मुलुकपाखें स्तरोन्नति जुइधुंकाःया सम्भावित हाथ्या व ह्वःताःयात सहज नापं दिगो जुइकेत आवश्यक रणनीति दयेकाच्वना धकाः जानकारी बियादिसें अनंलिपा इलय् नं नेपालं जर्मनी, युरोपियन युनियन लिसें मेमेपिं साझेदारतपाखें स्रोत, प्रविधि व आर्थिक ग्वाहालिया अपेक्षा यानाच्वंगु नं धयादिल ।

अथे हे, मन्त्री डा राणां सन् २०२७ निसें २०२९ तकया निंतिं मानवअधिकार परिषद्या दुजः, २०२९ निसें २०३१ तकया निंतिं आर्थिक नापं सामाजिक परिषद्या दुजः व सन् २०३७ निसें २०३८ या निंतिं सुरक्षा परिषद्या अस्थायी दुजलय् नेपालं उम्मेदवारी ब्यूगु जानकारी बियादिसें ग्वाहालिया निंतिं इनाप यानादीबलय् विदेशमन्त्री डेविडं ग्वाहालि यायेगु प्रतिबद्धता प्वंकादीगु परराष्ट्रमन्त्रीया सचिवालयं धाःगु दु ।

जर्मनी नेपालया निंतिं युरोपया निगूगु तःधंगु पर्यटक स्रोत जूगु नापं निगू देय्दथुइ पर्यटनया तःधंगु सम्भावना दूगु जूसां नं तप्यंक हवाई सम्पर्कया अभावं थुकिं पूवंक लाभ काये मफयाच्वंगुलिं निगू देय्दथुइ तप्यंक उडान यायेत नं मन्त्री डा राणां उगु झ्वलय् इनाप यानादिल ।

नेपाःया ‘एयरलाइन्स’त युरोपियन युनियनया हवाई सुरक्षा धलखय् दुथ्यायेधुंकाः जूगु उडान प्रतिबन्धं यानाः नेपाः व युरोपदथुइ तप्यंक उडानत जुइमफुबलय् निगू देय्दथुइया पर्यटन प्रवद्र्धनय् तच्वकं असर लानाच्वंगु वय्कलं ध्वाथुइकादिल ।

नेपाल सरकारं नागरिक उड्डयन प्राधिकरणया पुनर्संरचना यायेत संसदय् निगू विधेयक पेस याःगु व प्रस्तावित कानुन विश्वया हे च्वन्ह्याःगु अभ्यास जक मखुसे इयु व आइकाओया सिफारिसकथं जूगुलिं नेपाःया एयरलाइन्सयात तयातःगु प्रतिबन्ध लिकायेत भूमिका म्हितेत इयुया छगू प्रभावशाली दुजः देय् नं जूगु जर्मनीयात इनाप यानादीबलय् जर्मनीया विदेशमन्त्री डेविडं उगु सम्बन्धय् नं थःपिंसं फक्व ग्वाहालि यायेगु आश्वासन बियादिल ।

नाप लायेगु झ्वलय् परराष्ट्रमन्त्री डा राणां नेपालय् जलवायु ह्यूपाःया अकल्पनीय असर लानाच्वंगु व थुकिं देसं थी थी बांमलाःगु लिच्वः फयेमालाच्वंगु खँ न्ह्यथनादिसें नेपालं न्ह्यःने न्ह्याकूगु जलवायु न्यायया अभियानय् जर्मनीलिसे नं ग्वाहालिया अपेक्षा यानादिल ।