‘बैंकिङ क्षेत्रयात्र प्रविधिमैत्री व पारदर्शी दयेका यंकेमाः’

नयाँ विकल्प संवाददाता
प्रकाशित मिती: २०८२ श्रावण ११, २०: ४६

येँ : नेपाल राष्ट्र बैंकया वरिष्ठ डेपुटी गभर्नर नीलम ढुङ्गानां आः वइगु दिनय् बैंकिङ क्षेत्रयात अझं अप्वः प्रविधिमैत्री व पारदर्शी दयेका यंकेमाःगु खँ ल्ह्वनादीगु दु ।

आर्थिक मिडिया एसोसिएसन नेपाल (इमान)पाखें थौं थन ग्वसाःग्वःगु ‘इमान संवादः फ्युचर अफ बैंकिङ’ सहलहय् वय्कलं बैंकिङ क्षेत्रयात आधुनिक प्रविधिमैत्री, पारदर्शी व जनता केन्द्रित दयेकाः सेवा प्रवाहयात अझं याकन यायेमाःगु खँय् बः बियादिल । वय्कलं धयादिल, “डिजिटल वित्तीय सेवाया द्रुत विकास व ग्राहकमैत्री प्रणालीया विकासं बैंकिङ क्षेत्रय् भविष्य क्वःछिइ ।”

इमानया नायः रोयल आचार्यं बैंकिङ प्रणालीया विकासय् सञ्चारमाध्यमया भूमिका महत्वपूर्ण जुइगु धयादिसें सकस्यां थःथःगु भूमिका निष्पक्ष जुयाः म्हितेमाः धयादिल । इमान संवादं नीति निर्माता, नियामक निकाय व सरोकार दूपिं निकाय दथुइ ताँया कथं ज्या याइगु वय्कलं विश्वास प्वंकादिल ।

इमानपाखें ग्वसाःग्वःगु ‘इमान संवाद’यात आः वइगु दिनय् अर्थतन्त्रया थी थी पक्षय् स्वानाः मदिक्कं सञ्चालन यायेगु धयादिसें वय्कलं ज्याझ्वः पाखें अर्थसम्बन्धी थी थी ख्यःया समस्या लिसें ज्यंकेया उपायनापं माःगु सुझाः कालबिल यायेगु मञ्चया कथं विकास यानाः यंकेगु धयादिल ।

थौं बैंकिङ प्रणालीया भविष्य, डिजिटल प्रविधि व वित्तीय सुरक्षाबारे सहलह यायेगु नापनापं अर्थतन्त्रया थी थी पक्षया बारे सुझाः कालबिल जूगु खः ।