प्रधानमन्त्रीपाखें रानी जमरा कुलरिया थप सिँचाइ व जलविद्युतया उलेज्या

नयाँ विकल्प संवाददाता
प्रकाशित मिती: २०८२ श्रावण १३, २१: ०३

कैलाली : प्रधानमन्त्री केपी शर्मा ओलीं रानी जमरा कुलरिया सिँचाइ आयोजनाअन्तर्गत थप सिँचाइ, जलविद्युत् व प्रसारण लाइनया थौं उलेज्या यानादीगु दु ।

प्रधानमन्त्री ओलीं १४ द्वः व ३०० हेक्टर सुविधाया सिँचाइ आयोजना व ४.७१ मेगावाट जलविद्युत् नापं प्रसारण लाइनया उलेज्या यानादिल ।

कैलालीया जानकी गाउँपालिका–९ कटासेय् च्वंगु सिँचाइ नहरपाखें उत्पादित विद्युत् ३३ केभी प्रसारण लाइनय् स्वाःगु दु । राष्ट्रिय गौरवया आयोजना जूगु रानी जमरा कुलरिया सिँचाइ आयोजनाया निगूगु चरणया ज्याझ्वः पूवनाः आः स्वंगूगु चरणया ज्याझ्वः सुरु जूगु खः ।

उगु आयोजनां टीकापुर, लम्कीचुहा व जानकी गाउँपालिकाय् सेवा बियावयाच्वंगुलिइ आः स्वंगूगु चरणअन्तर्गतया आयोजनापाखें भजनी, जोशीपुर, बर्दगोरिया, घोडाघोडीलिसेंया पालिकाय् सिँचाइ तब्याइगु व कृषि उत्पादन वृद्धि जुइ ।

प्रधानमन्त्री ओलीं उगु आयोजनायात नेपाःया जलस्रोत नापं ग्रामीण कृषि ख्यःया विकासय् ऐतिहासिक उपलब्धि धासें थुकिं नेपाःया ग्रामीण जीवनशैली, कृषि उत्पादन, ऊर्जा आत्मनिर्भरता व खाद्य सुरक्षाया चित्रण याइगु धयादिल ।

प्रधानमन्त्री ओलीं १२० दँन्ह्यःया स्थानीय किसानतय् मंकाः कुतः व परम्परागत सीपपाखें सुरु जूगु रानी जमरा कुलरिया प्रणालीयात आधुनिक स्वरूपय् तःधंकूगु न्ह्यथनादिसें स्थानीयतय् ब्वति व सरकारया समन्वयपाखें थौंया सफलताया जग थंगु खः धयादिल ।

प्रधानमन्त्री ओलीं राष्ट्रिय गौरवया सिँचाइ आयोजना—सिक्टा, बबई, महाकाली तेस्रो, भेरी–बबई व सुनकोशी–मरिन बहुद्देश्यीय आयोजनात याकनं पूवंकेत स्वापू दूगु निकायतय्त निर्देशन बियादिल ।